Fakatata Atu ke he Atua
Uho e Mahani Totonu ki a Iehova
FAKATOKOLUGA, mahekeheke, manako tuaga. Ko e tau aga pihia kua aga mau ki a lautolu ne fakamakamaka ke kautū he lalolagi nei. Ka e fakatata lahi kia he tau aga pihia a tautolu ki a Iehova ko e Atua? Nakai pihia, kua uho e mahani totonu he tau tagata tapuaki ha Iehova ki a ia. Moua e tala nei he fakamauaga ia Numera veveheaga 12. Tupu e mena nei he tutakale i Sinai, he mole e fakahaoaga a Isaraela mai Aikupito.
Ko Miriama mo Arona ko e lafu fakamua a Mose, ne “vagahau [po ke, totoko]” hagaao ke he tehina tote ha laua. (Kupu 1) He nakai tutala noa hagaao ki a Mose, ne totoko a laua ki a ia he liga fakaholofa e tau fegui ha laua ke he falu he kemuaga. Ko Miriama ne totoku fakamua ne kamata e fegui. Ko e kakano fakamua ha laua he loma ha kua faihoana a Mose ke he fifine Kuso. Kua mahekeheke kia a Miriama neke hola kehe e onoonoaga mai he fifine kehe nei—ne nakai ko e Isaraela?
Hagahaga kelea atu foki e tau mahani loma. Ne fakatumau a Miriama mo Arona ke pehē: “Ko Mose tokotaha kia kua vagahau mai ai e Iehova? ka e nakai kia vagahau mai foki ia maua nai?” (Kupu 2) Ko e fatuakiloto mooli kia he loma ko e loto lahi ke he pule mo e matalahi?
I loto he tala, ne nakai tali e Mose e mahani loma. Ne fakauka mooli a ia ke he tau ekefakakelea. Ko e mahani fakauka haana ne fakamooli e talahauaga he Tohi Tapu hagaao ki a ia “kua totonu ue atu a ia” he fuga kelekele.a (Kupu 3) Ne nakai lago e Mose a ia. Ne fanogonogo a Iehova ti lalago e Ia a Mose.
Ko Iehova ne kitia e mahani loma. Mua atu, na fifili e Iehova a Mose. He totoko ke he tau tagata loma, ne fakamanatu he Atua ki a laua e fakafetuiaga uho lahi Haana mo Mose: “Kua fakafehagaoaki a maua ti vagahau ai a maua mo ia . . . ko e heigoa e mena nakai matakutaku ai a mua ke fai kupu [po ke, totoko ki a] Mose?” (Kupu 8) He totoko ki a Mose, kua hala mooli a laua he totoko ke he Atua. He vagahau fakahanoa pihia, maeke ia laua ke lauia he ita lahi he Atua.
Ko Miriama, ne fegui mua ai, ne moua he lepela. Ne fakamafiti a Arona ke kumi atu ki a Mose ke ole ma Miriama. Manamanatu la—kua falanaki e tuaga a Miriama mogonei ke he lagomataiaga he tagata ne vagahau kelea a laua ki ai! Ne taute totonu e Mose e mena ne tala age ki a ia ke taute. He tutala fakamua laia he tala nei, ne olelalo a Mose he liogi ki a Iehova ke lata mo e mahakitaga haana. Ne fakamaulu a Miriama, ka kua fakauka a ia ke he fakamā ke fitu e aho he puipui kehe ai.
Kua foaki mai he tala nei ki a tautolu e maamaaga ke he tau mahani ne uho ki a Iehova mo e tau aga ne totoko e ia. Ka manako a tautolu ke fakatata ke he Atua, kua latatonu ia tautolu ke huo kehe e tau mahani oti he fakatokoluga, mahekeheke, mo e manako tuaga ne liga kitia e tautolu ia tautolu. Ko ia ne totonu ne ofania e Iehova. Ne mavehe mai e ia: “Ko e tau tagata mahani molu [po ke, totonu], to eke ma lautolu e motu; ti fakafiafia foki e lautolu a lautolu ha ko e monuina [po ke mafola] kua lahi.”—Salamo 37:11; Iakopo 4:6.
[Matahui Tala]
a Ko e mahani totonu ko e mahani ne foaki e loto malolō ke he tagata ke fakauka ke he tau nakai fakafili tonu fakalataha mo e fakamanavalahi ka e nakai taui atu.