Hiki he Tohi Tapu e Tau Momoui
Maeke fēfē he tagata ne kamata ula mariuana mo e tapaka he mogo ne tote agaia ke moua e malolō ke fakaoti e aga ia? Ko e heigoa ati maeke he tagata kege vale ke tautaofi e ita haana mo e kautū mai he vihiatia e tau tagata? Manamanatu la ke he tau mena ne talahau ai e laua.
VALA TALA FAKATAGATA
HIGOA: HEINRICH MAAR
TAU HE MOUI: 38
MOTU NE FANAU: KAZAKHSTAN
MOUI FAKAMUA: HUFIA KE HE MARIUANA MO E TAPAKA
MOUI HAAKU KUA MOLE: Ne fanau au he faahi toga i Kazakhstan, kavi ke 120 e kilomita mai he taone ha Tashkent. Ko e matakavi mō mo e vela he vahā mafana, hokotia ai ke he 45 e Celsius he vevela, mo e tō hifo muatua ki lalo he 10 e Celsius he vahā makalili—ko e tau tuaga mitaki ke tō e tau kulepi mo e tau mariuana.
Na tutupu mai e tau mamatua haaku i Sihamani. Ko e tau Kerisiano fakaevagelia a laua ka e nakai ō he tapu ha laua. Pete ia, ne fakaako e laua au ke ako manatu e liogi Ha Mautolu a Matua. He 14 e tau haaku he moui, ne fai magaaho ne fakaako he matua fifine mo e mahakitaga lahi haaku e Tohi Tapu mo e Tau Fakamoli a Iehova. Lagataha e fakateliga haaku ke he Tau Fakamoli tokoua ne fakaako mo e matua fifine haaku, ne fakakite ki a ia e higoa he Atua, ko Iehova, he Tohi Tapu tuai haana. Kua ofoofogia au he mena ia. Ne nakai matutaki he Matua Fifine e fakaako haana, ti nakai fai lakaaga atu foki e fakaako haaku ke he tau mena fakaagaaga. Pete ia, ke he magaaho fakamui he aoga, ne fatiaki he faiaoga ha mautolu e tau tala fakavai kehekehe hagaao ke he matakau lotu ne higoa ko e Tau Fakamoli a Iehova. Ha kua fitā e fina atu au mo e mahakitaga haaku ke he falu feleveiaaga he Tau Fakamoli a Iehova, ne tala age au ke he faiaoga haaku ko e tau mena ne fatiaki e ia kua nakai mooli.
He 15 e tau haaku he moui, ne fakafano atu au ki Leningrad, mogonei ko St. Petersburg, i Rusia, ke fakaako e matagahua. Ne tala age e au ke he kapitiga ne nofo mo au e mena tote ne iloa e au hagaao ki a Iehova. Pete ia, ne kamata au ke ula. He ahiahi atu au ke he kaina haaku i Kazakhstan, kua mukamuka ia au ke fakatau e mariuana, pete ni he nakai matafakatufono ke taute e mena ia. Ne lahi mahaki foki haaku inu vodka, mo e uaina ne taute i kaina.
Ne oti e aoga fakaako matagahua haaku ti matutaki ke he kautau Soviete ke he ua e tau. Ka kua manatu agaia e au falu he tau mena ne fakaako e au mai he Tohi Tapu he magaaho ne tote ai au. He fai magaaho, ne tala age e au ke he tau kapitiga kautau haaku hagaao ki a Iehova mo e papale e Tau Fakamoli ka logona e au e tau pikopiko hagaao ki a lautolu.
He oti e gahua fakakautau haaku, ne hiki au ki Sihamani. He haia he kemuaga he tau tagata ne omai ke he motu, ne moua e au e lagaki he tohi fakaako he Tohi Tapu ne taute he Tau Fakamoli. Ne totou fakamakai ai e au mo e fifili ko e mena ne talahau i loto kua moolioli. Pete ia, ne nakai maeke au ke fakaoti e hufia haaku ke he tapaka mo e mariuana. Fai magaaho he mole, ne hiki atu au tata ke he taone ha Karlsruhe. Ne feleveia au mo e taha he Tau Fakamoli a Iehova i ai, ti kamata a ia ke fakaako e Tohi Tapu mo au.
PUHALA NE HIKI HE TOHI TAPU E MOUI HAAKU: Leva tuai e manatu hifo e au ko e Tohi Tapu ko e Kupu he Atua. Ti mole e totou he tohi fakaako he Tohi Tapu ne moua e au, ne talitonu au kua tali he Tohi Tapu e tau hūhū aoga oti he moui. Ka e leva lahi ato maeke ia au ke hiki e tau aga haaku. Fakahiku ai, ne hokotia ke he loto haaku e fakatonuaga he Tohi Tapu ia 2 Korinito 7:1 mo e fifili ai au ke fakameā au “ke he tau mena oti ke kelea ai e tino katoa mo e agaga,” kakano, ke tiaki e au e mariuana mo e tapaka.
Ne teitei au ke oti mafiti e ula mariuana. Ka e ono e mahina ato tiaki katoa e ula tapaka haaku. Ne hūhū e Fakamoli ne fakaako e Tohi Tapu mo au ki a au he taha aho, “Ko e heigoa e kakano he moui haau?” Ne taute he mena ia au ke manamanatu hagaao ke he hufia haaku ke he tapaka. Loga e magaaho ne lali au ke oti e ula. Kua fifili au mogonei ke liogi fakamua to oho atu ke he kā tapaka, ka e nakai ole ke he Atua ma e fakamagalo he magaaho fakamui. He 1993, ne fakamau e au e aho ke oti e ula. Mo e lagomatai a Iehova, ne nakai aamo e au e kā tapaka tali mai he mogo ia.
PUHALA NE AOGA KI A AU: Mogonei kua atāina au mai he tauuka mo e hufia moumou he mariuana mo e tapaka, ti kua holo ki mua e malolō tino haaku. He vahā nei, ko au ko e tagata gahua foaki noa he la ofisa he Tau Fakamoli i Sihamani. Kua fiafia lahi au he fakaako e au ke fakagahua e pulotu he Tohi Tapu he moui haaku! He iloa e mena ne fakaako he Tohi Tapu kua foaki ke he moui haaku e amaamanakiaga mooli.
VALA TALA FAKATAGATA
HIGOA: TITUS SHANGADI
TAU HE MOUI: 43
MOTU NE FANAU: NAMIPIA
MOUI FAKAMUA: TAGATA KEGE VALE
MOUI HAAKU KUA MOLE: Ne tupu hake au he maaga tua i Ohangwena he matakavi faahi tokelau i Namipia. Ne tāfolo mo e tamate e tau tagata he maaga haaku, ke he magahala he felakutaki he tauaga he matakavi nei he atu tau 1980. He maaga haaku ne onoono ke he tama taane ko e toa, kaeke ko e tagata tau mitaki a ia mo e maeke ke tāfolo e falu tama taane! Ti fakaako au ke tau!
He tuku au mo e aoga, ne fano au ke nonofo mo e agikolo haaku ke he taone he faahi tahi ha Swakopmund. Nakai leva he hoko atu au, ne matutaki au mo e kege totoko he tau tagata taane fuata. Maeke a mautolu ke ō ke he tau matakavi he taone ne onoono hifo ke he tau tagata uli, tuga e tau hotela mo e tau fale kava, ke fakalagalaga latau. Loga e magaaho ne latau a mautolu mo e tau tagata leveki puipui mo e leoleo. He tau pō oti ne uta tumau e au e titipi mata loa ke leo ke hoka aki taha ka kunuene ki a au.
He taha pō, he tau ai mo e kege miha, ne teitei au kua mate. Ko e tagata he kege totoko ne hau i tua haaku mo e teitei ke hio e ulu haaku ka e moto he kapitiga kege a ia ati mole fakakū e fafagu. Pete ne tata lahi ke he mate, ne matutaki au ke vale lahi. Ka taufetoko au mo e ha tagata, tagata taane po ke fifine, ko au tumau ka moto mua a ia.
PUHALA NE HIKI HE TOHI TAPU E MOUI HAAKU: He feleveia fakamua au mo e taha he Tau Fakamoli a Iehova, ne totou he fifine ki a au e tau kupu mai ia Salamo 37 ti talahau ai ki a au haia he tohi a Fakakiteaga he Tohi Tapu e falu maveheaga homo ue atu ma e vahā anoiha. Ka kua nakai talahau e ia he mena fe he tohi e tau maveheaga nei, ne moua e au e Tohi Tapu ti totou katoa e tohi a Fakakiteaga he pō ia. Ne manako au ke he maveheaga ne totou e au ia Fakakiteaga 21:3, 4 na “[to] nakai tuai fai mate, po ke fakatutuku, po ke tagi, ti nakai tuai fai matematekelea.” He liliu mai e Tau Fakamoli, ne talia e au e manako ke fakaako Tohi Tapu.
Ne uka lahi ke hiki e puhala manamanatu mo e tau gahua haaku. Ka e fakaako e au mai ia Gahua 10:34, 35 kua “nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.” Ne fakamalolō foki au ke fakagahua e Roma 12:18: “Kaeke kua maeke ia mutolu, kia nonofo fakamitaki mo e tau tagata oti kana.”
He lafi ke he fakaakoaga ke tautaofi e ita haaku, ne maeke foki ia au ke oti e hufia malolō ke he tapaka. Kua tagi tumau au he liogi ki a Iehova ke lagomatai au. Ka e he magaaho fakamua ne nakai hako e tau puhala ne taute e au, he pehē kua ula e au e kā tapaka “fakahiku” haaku ti oti ti liogi he mogo fakamui. Ko e Fakamoli ne fakaako e Tohi Tapu mo au ne lagomatai au ke kitia e uho he liogi fakamua to lagaki e au e kā tapaka. Ne manako foki au ke kalo kehe he fio mo lautolu ne ula. Lafi ki ai, ne muitua e au e manatu ke tala age ke he tau kaugahua haaku hagaao ke he kelea he ula. Ne lagomatai mooli e mena nei, ha kua nakai liu au ke moua noa e tau kā tapaka—ti nakai liu e tau tagata ula he gahuaaga ke mai ki a au.
Fakahiku ai, ne maeke ia au ke oti e ula mo e tiaki e moui fakamua haaku. He mole e ono mahina he fakaako au mo e fakagahua e tau matapatu fakaakoaga he Tohi Tapu, ne lata au ke papatiso ko e taha he Tau Fakamoli a Iehova.
PUHALA NE AOGA KI A AU: Ne talitonu au kua moua he Tau Fakamoli a Iehova e lotu mooli he kitia e au e fakaalofa ne fakakite e lautolu, pete ne motu po ke lanu ha lautolu. Ato papatiso foki au ke eke mo Fakamoli, ne uiina he matakainaga palagi he fakapotopotoaga au ke he fale haana ke kai auloa. Tuga ni ko e miti. Ne nakaila nonofo fakafeheleaki au mo e palagi, ti nakaila kai auloa foki he kaina haana. Ko au mogonei he vala he tau matakainaga mooli he lalolagi katoa.
He vahā kua mole, ne lali e tau leveki puipui mo e tau leoleo ke omoi au ke hiki e puhala manamanatu mo e puhala gahua haaku ka e nakai kautū a lautolu. Ko e Tohi Tapu ni ne ha ha ai e malolō ke lagomatai au ke hiki e aga haaku mo e eke ai mo tagata fiafia.
[Blurb he lau 29]
“Kua tagi tumau au he liogi ki a Iehova ke lagomatai au”