‘Kia Fakatumau a Mutolu ke he Fakaalofa he Atua’
“Kia fakatumau a mutolu ke he fakaalofa he Atua, ti fakatalitali ke he fakaalofa [noa] he Iki ha tautolu ko Iesu Keriso, kia hoko atu ke he moui tukulagi.”—IUTA 21.
1, 2. Fakakite fēfē e Iehova e fakaalofa haana ki a tautolu, ti iloa fēfē e tautolu kua nakai amanaki noa ni a ia ti fakatumau a tautolu ke he fakaalofa haana?
KO IEHOVA ko e Atua kua fakakite e fakaalofa haana ki a tautolu ke he tau puhala loga ue atu. Nakai fakauaua ai, ko e fakakiteaga mua ue atu he fakaalofa ha Iehova ko e foakiaga he poa lukutoto. Kua fakaalofa lahi mahaki a ia ke he tau tagata ti fakafano mai e ia e Tama fakahele haana ke he lalolagi ke mate ma tautolu. (Ioane 3:16) Ne taute e Iehova e mena nei ha kua manako a ia ke momoui tukulagi a tautolu, mo e manako foki a ia ke aoga tukulagi a tautolu mai he fakaalofa haana!
2 Ka kua maeke kia a tautolu ke manatu to amanaki noa ni a Iehova ti fakatumau a tautolu ke he fakaalofa haana, pete ne mena kua fifili e tautolu ke taute? Nakai. Ia Iuta kupu 21, ne totou e tautolu e tomatomaaga nei: “Kia fakatumau e mutolu a mutolu ke he fakaalofa he Atua, ti fakatalitali ke he fakaalofa he Iki ha tautolu ko Iesu Keriso, kia hoko atu ke he moui tukulagi.” Ko e talahauaga “kia fakatumau e mutolu a mutolu ke he fakaalofa he Atua” ne kakano kua lata ke fai mena ka taute e tautolu. Ko e heigoa mogoia ha tautolu kua lata ke taute ke tumau ke he fakaalofa he Atua?
Maeke Fēfē a Tautolu ke Tumau ke he Fakaalofa he Atua?
3. Ko e heigoa ne talahau e Iesu kua aoga lahi ki a ia ke tumau ke he fakaalofa he haana Matua?
3 Moua e tautolu e tali ke he hūhū ia he tau kupu ha Iesu ne talahau he pō fakahiku he moui haana he lalolagi nei. Ne pehē a ia: “Kaeke ke omaoma [po ke, muitua] e mutolu haku a tau poaki, ti tumau a mutolu ke he haku a fakaalofa; tuga au ne oma [po ke, muitua] e tau poaki he haku a Matua, mo e tumau au ke he hana fakaalofa.” (Ioane 15:10) Maaliali ai, ne logona hifo e Iesu ko e muitua ke he tau poaki ha Iehova kua aoga lahi ke fakatumau e tuaga mitaki mo e haana Matua. Ti kaeke kua mooli e talahauaga ia ke he Tama mitaki katoatoa he Atua, nakai kia mooli foki ma tautolu?
4, 5. (a) Ko e heigoa e puhala pauaki kua maeke ia tautolu ke fakakite kua fakaalofa a tautolu ki a Iehova? (e) Ko e ha ne nakai fai kakano a tautolu ke tiaki e manatu ke omaoma e tau poakiaga a Iehova?
4 Fakamua, kua fakakite e tautolu kua fakaalofa a tautolu ki a Iehova he omaoma ki a ia. Ne talahau ai he aposetolo ko Ioane ke he puhala nei: “Ko e fakaalofa ke he Atua hanai, kia omaoma [po ke, muitua] a tautolu ke he tau poaki hana; nakai mamafa foki hana tau poaki.” (1 Ioa. 5:3) Mooli, ko e omaoma kua nakai ko e taha manatu talahaua tumau he lalolagi he vahā nei. Ka e mailoga e alaga kupu: “Nakai mamafa foki hana tau poaki.” Kua nakai ole a Iehova ki a tautolu ke taute e taha mena ne uka lahi ki a tautolu.
5 Ke fakatai: To ole nakai a koe ke he kapitiga fakahele ke lagaki taha mena ne iloa e koe kua mamafa lahi ke lagaki e ia? Nakai pihia! Kua mua atu e totonu ha Iehova ke he totonu ha tautolu ti mua atu foki haana a manamanatu ke he tau kaupāaga ha tautolu. Ne fakamafana he Tohi Tapu a tautolu ‘kua manatu e Iehova ko e kelekele ni a tautolu.’ (Sala. 103:14) To nakai ole a ia ki a tautolu ke taute e mena ne nakai maeke ia tautolu. Ti nakai fai kakano a tautolu ke tiaki e manatu ke omaoma e tau poakiaga a Iehova. Ke he taha faahi, kua pipiki mau a tautolu ke he omaoma hokoia—ko e puhala homo ue atu ke fakakite ke he ha tautolu a Matua he lagi kua fakaalofa mooli a tautolu ki a ia mo e manako ke tumau ke he fakaalofa haana.
Ko e Mena Fakaalofa Pauaki Mai ia Iehova
6, 7. (a) Ko e heigoa e loto manamanatu? (e) Fakataitai e puhala kua maeke he loto manamanatu ke lagomatai a tautolu ke tumau ke he fakaalofa he Atua.
6 He lalolagi uka lahi ne nonofo ai a tautolu, loga e tau fifiliaga kua lata ke taute ne putoia e omaoma ha tautolu ke he Atua. Maeke fēfē ke iloa mooli e tautolu ko e tau fifiliaga nei kua lagotatai mo e finagalo he Atua? Kua foaki mai e Iehova ki a tautolu e mena fakaalofa ke lagomatai fakalahi a tautolu ke he mena nei ko e omaoma. Ko e loto manamanatu. Ko e heigoa e loto manamanatu? Ko e mataala fakatagata pauaki. Kua gahua ai tuga e ikifakafili he loto, he taute a tautolu ke onoono ke he tau fifiliaga ne fehagai mo tautolu he moui po ke fakaata e tau gahua ne fitā he taute e tautolu mo e ke fokifoki ai kua mitaki po ke kelea, hako po ke hepe.—Totou Roma 2:14, 15.
7 Maeke fēfē a tautolu ke fakaaoga fakamitaki e loto manamanatu? Onoono ke he fakataiaga. Ne finatu e tagata fano hui ke he tutakale lahi. Kua nakai fai hala fano hui, nakai fai puhala tū, nakai fai pou fakamailoga. Ka kua mauokafua a ia he finatu ke he matakavi ne fano a ia ki ai. Puhala fe? Na fai kamapasi a ia. Kua ha ha ai e mata kamapasi ne fakamailoga e tau faahi ne fā mo e nila makeneta ne tuhi tumau ke he faahi tokelau. Ka nakai fai kamapasi a ia, to galomoki e hala he tagata fano hui nei. Pihia foki, ko e tagata ne nakai fai loto manamanatu kua galomoki he lali ke taute e tau fifiliaga mitaki, tonuhia, mo e tututonu he moui.
8, 9. (a) Ko e heigoa e tau fakakaupāaga he tau loto manamanatu ha tautolu kua lata ke tokaloto e tautolu? (e) Ko e heigoa ka taute e tautolu ke fai aoga mooli e loto manamanatu ha tautolu ki a tautolu?
8 Ka e tuga e kamapasi, kua fai kaupāaga e loto manamanatu. Kaeke ke tuku fakatata he tagata fano hui e makeneta ke he kamapasi haana, to tuhi kehe e nila mai he faahi tokelau. Tatai foki, kaeke ke fakaatā e tautolu e tau manako he loto ha tautolu ke taute e tau fifiliaga ha tautolu, ko e heigoa la ka tupu? To liga fakahehē he tau fatuakiloto lotokai ha tautolu e loto manamanatu. Kua hataki he Tohi Tapu a tautolu “kua mua ke he tau mena oti e loto he fakavai, ti gagao lahi ni a ia.” (Iere. 17:9; Fakatai 4:23) Lafi ki ai, ka nakai ha ha he tagata fano hui e mepe kua hako mo e falanaki ki ai, to tote po ke nakai aoga e kamapasi haana ki a ia. Pihia foki, ka nakai falanaki a tautolu ke he takitakiaga mooli mo e mauokafua he Kupu he Atua, ko e Tohi Tapu, kua liga nakai lagomatai foki e loto manamanatu ha tautolu. (Sala. 119:105) Momoko ai, tokologa e tagata he lalolagi nei ne tuku fakamua e tau manako he loto ka e tote po ke nakai muitua ke he tau tuaga ne fakavē he Kupu he Atua. (Totou Efeso 4:17-19.) Ko e mena haia ne tokologa lahi e tagata ne fai loto manamanatu ka e taute e tau mena kelea.—1 Timo. 4:2.
9 Kua lata a tautolu ke eketaha ke nakai pihia! Ka kia matutaki a tautolu ke fakaako mo e fakamahani he Kupu he Atua e tau loto manamanatu ha tautolu ke maeke ke fai aoga mooli ki a tautolu. Kua lata ia tautolu ke fanogonogo ke he loto manamanatu ha tautolu ne fakamahani he Tohi Tapu ka e nakai fakaatā e tau fatuakiloto ke pule ki a tautolu. He magaaho taha, kua lata ia tautolu ke lali ke fakalilifu e tau loto manamanatu he tau matakainaga Kerisiano fakahele ha tautolu. Kua eketaha katoatoa a tautolu ke kalo mai he fakatupetupe a lautolu, he tokaloto kua liga fakakikili lahi e loto manamanatu he tau matakainaga ha tautolu ke he ha tautolu ni.—1 Kori. 8:12; 2 Kori. 4:2; 1 Pete. 3:16.
10. Ko e heigoa e tau puhala tolu he moui ka fakatutala a tautolu mogonei ki ai?
10 Kia fakatutala a tautolu mogonei ke he tolu e faahi he moui ka fakakite e fakaalofa ha tautolu ki a Iehova he puhala he omaoma. Mooli, ko e tau tuaga takitaha ia, kua lauia e tau loto manamanatu ha tautolu, ka ke moua e tautolu e takitakiaga hako kua latatonu e loto manamanatu ha tautolu ke takitaki he tau tuaga he mahani ne omoomoi he Tohi Tapu. Ko e tau puhala tolu ke omaoma loto fakaalofa a tautolu ki a Iehova ko e: (1) Ofania e tautolu a lautolu kua ofania e Iehova, (2) fakakite e tautolu e fakalilifu ke he pule, mo e (3) eketaha a tautolu ke tumau e meā ke he fofoga he Atua.
Ofania a Lautolu kua Ofania e Iehova
11. Ko e ha kua lata ia tautolu ke ofania a lautolu kua ofania e Iehova?
11 Fakamua, lata ia tautolu ke ofania a lautolu kua ofania e Iehova. Ka hoko ke he tau feoakiaga, kua tuga e omomi (sponge) e tau tagata. Kua hihiga a tautolu ke mimiti hake e tau mena ne viko takai ia tautolu. Ne iloa mitaki he Tufuga ha tautolu e hagahaga kelea lahi—ti kua aoga lahi—e tau feoakiaga ke he tau tagata nakai mitaki katoatoa. Ti foaki e ia ki a tautolu e fakatonuaga iloilo: “Ko ia kua feoaki mo e tau tagata iloilo, kua iloilo ni a ia; ka ko ia kua kapitiga mo e tau tagata goagoa, to matematekelea ai a ia.” (Fakatai 13:20; 1 Kori. 15:33) Kua nakai manako taha ia tautolu ke “matematekelea.” Manako a tautolu oti ke moua e “iloilo.” Nakai fai mena ke taute a Iehova ke mua atu e iloilo ha kua fitā e iloilo ue atu a ia, po ke nakai maeke he ha tagata ke fakakelea a ia. Pete ia, ne fakatoka e ia e fakafifitakiaga fulufuluola ma tautolu ke he tau feoakiaga. Manamanatu la ki ai—ko e tau tagata nakai mitaki katoatoa fe ne fifili e Iehova mo tau kapitiga haana?
12. Ko e tau kapitiga fēfē ne fifili e Iehova?
12 Ne hagaao a Iehova ke he tupuna ko Aperahamo ko e “haku a kapitiga.” (Isaia 41:8) Ko e tagata nei kua mua atu e tua fakamooli, tututonu, mo e omaoma—ko e tagata he tua. (Iako. 2:21-23) Ko e kapitiga pihia ka fifili e Iehova. Ne kapitiga a ia mo e tau tagata pihia he vahā nei. Kaeke ke fifili e Iehova e tau kapitiga pihia, kua nakai kia latatonu ma tautolu ke fifili fakamitaki foki he feoaki a tautolu mo lautolu ne iloilo ti fakailoilo ai?
13. Ka fifili e tau kapitiga, ko e heigoa ka lagomatai a tautolu ke taute e tau fifiliaga mitaki?
13 Ko e heigoa ka lagomatai a koe ke taute e tau fifiliaga mitaki hagaao ke he mena nei? He fakaako e tau fakafifitakiaga he Tohi Tapu to fakaohooho mooli. Manamanatu ke he tuaga kapitiga ha Ruta mo e matua fifine fugavai haana ko Naumi, mo e ha Tavita mo Ionatana, po ke ha Timoteo mo Paulo. (Ruta 1:16, 17; 1 Samu. 23:16-18; Filipi 2:19-22) Ko e tau tuaga kapitiga nei kua malolō lahi ha ko e taha e kakano mua ue atu: Nukua fakavē ai ke he fakaalofa fakamooli ki a Iehova. Maeke nakai ia koe ke moua e tau kapitiga ne fakaalofa fakalahi ki a Iehova tuga ne taute e koe? Kia mafanatia kua tokologa e tau kapitiga pihia ka moua e koe he fakapotopotoaga Kerisiano. To nakai takitaki he tau kapitiga pihia a koe ke matematekelea ke he puhala fakaagaaga. Ka e, to lagomatai e lautolu a koe ke omaoma ki a Iehova, ke tupu fakaagaaga, mo e ke gana e tau mena ke lata mo e agaaga. (Totou Kalatia 6:7, 8.) To lagomatai e lautolu a koe ke tumau ke he fakaalofa he Atua.
Fakalilifu e Pule
14. Ko e heigoa ati fa uka ai ia tautolu ke fakakite e fakalilifu ke he pule?
14 Ko e puhala ke uaaki ka fakatātā e tautolu e fakaalofa ha tautolu ma Iehova kua putoia e pule. Latatonu ia tautolu ke fakakite e fakalilifu ke he pule. Ko e ha kua uka lahi mahaki ma tautolu ke taute e mena nei he falu magaaho? Taha kakano, ko e tau tagata he tau tuaga ke pule kua nakai mitaki katoatoa. Lafi ki ai, kua nakai mitaki katoatoa foki a tautolu. Kua taufetului a tautolu mo e hihiga pauaki ke totoko.
15, 16. (a) Ko e ha kua aoga ma tautolu ke fakalilifu a lautolu ne kotofa e Iehova e matagahua ki ai ke leveki e tau tagata haana? (e) Ko e heigoa e fakaakoaga uho ne ako e tautolu mai he puhala ne onoono a Iehova ke he totokoaga he tau Isaraela ki a Mose?
15 Liga manamanatu mogoia a koe, ‘Kaeke kua uka lahi ia tautolu ke fakalilifu e pule, ko e ha kua lata ia tautolu ke taute pihia?’ Ko e tali kua putoia e matakupu he pule katoatoa. Ko hai ka fifili e koe mo pule katoatoa haau? Ka fifili e tautolu a Iehova mo Pule Katoatoa ha tautolu, kua lata ia tautolu ke fakalilifu e pule haana. Ka nakai pihia, maeke nakai ia tautolu ke ui mooli a ia ko e Pule ha tautolu? Mua atu, ne fa fakagahua e Iehova e pule haana puhala he tau tagata nakai mitaki katoatoa ne kotofa e ia ki ai e matagahua ke leveki e tau tagata haana. Ka totoko a tautolu ke he tau tagata ia, to fēfē e onoonoaga ha Iehova ke he tau gahua ha tautolu?—Totou 1 Tesalonia 5:12, 13.
16 Ma e fakatai, he magaaho ne loma mo e totoko e tau Isaraela ki a Mose, ne lauia a Iehova ke he tau gahua totoko ha lautolu ke tuga kua taute fakahako ki a ia. (Nume. 14:26, 27) Kua nakai hiki e Atua. Kaeke ke totoko a tautolu ki a lautolu ne kotofa e ia ke he tau tuaga ke pule, kua totoko mooli a tautolu ki a Ia!
17. Ko e heigoa e aga hako kua lata ia tautolu ke taute atu ki a lautolu kua kotofa ki ai e pule he fakapotopotoaga?
17 Ne fakakite he aposetolo ko Paulo e aga hako ke taute atu ki a lautolu kua kotofa ki ai e tau matagahua he fakapotopotoaga Kerisiano. Ne tohi e ia: “Kia omaoma a mutolu ke he tau takitaki ha mutolu, mo e fifitaki [po ke, muitua] a mutolu ki ai; nukua leoleo a lautolu ke he tau agaga ha mutolu, to tala atu foki e lautolu e tala ki ai, kia eke ai e lautolu mo e fiafia, ka e aua neke eke mo e fakaatukehe; ha ko e mena nakai aoga ia kia mutolu.” (Hepe. 13:17) Mooli, kua lata ia tautolu ke eketaha ke feaki e aga omaoma mo e muitua pihia. Ka e manatu, kua gahua a tautolu ke tumau ke he fakaalofa he Atua. Nakai kia aoga e foliaga ia ke eketaha fakalahi a tautolu ki ai?
Tumau ke Meā ke he Fofoga a Iehova
18. Ko e ha ne manako a Iehova ki a tautolu ke tumau ke meā?
18 Ko e puhala ke toluaki kua fakatātā e tautolu e fakaalofa ha tautolu ma Iehova ko e eketaha a tautolu ke tumau e meā ke he fofoga haana. Kua fa gahua lahi e tau matua ke iloa mooli kua meā e fanau ha lautolu. Ko e ha? Taha e kakano, ko e meā kua aoga ke he malolō mo e levekiaga tino he tama. Lafi ki ai, kua fakaata mitaki he tama meā e magafaoa, he fakakite e fakaalofa mo e levekiaga he tau matua. Ma e tau kakano pihia, kua manako foki a Iehova ke mahani meā a tautolu. Kua iloa e ia ko e mahani meā kua aoga lahi ke he levekiaga tino ha tautolu. Ne iloa foki e ia kua fakakite he mahani meā ha tautolu a ia, ko e ha tautolu a Matua he lagi. Kua aoga lahi mahaki e mena ia, he liga futia mai e tau tagata ke he Atua ne fekafekau a tautolu ki ai ha kua mailoga e lautolu kua kehe a tautolu mai he tau tagata tokologa he lalolagi mahani kelea nei.
19. Iloa fēfē e tautolu kua aoga e meā fakatino?
19 Ko e tau puhala fe kua lata ia tautolu ke tumau ke meā? He tau puhala oti he tau momoui ha tautolu. I Isaraela i tuai, ne talahau fakamaaliali e Iehova ke he tau tagata haana kua aoga lahi ke meā fakatino. (Levi. 15:31) Ne hokotia e Fakatufono faka-Mose ke he tau matafekau tuga ke he tanu he tau otaota, fakameā e tau apa kapiniu, holoholo e tau lima, tau hui, mo e unu e tau mena tui. (Esoto 30:17-21; Levi. 11:32; Nume. 19:17-20; Teu. 23:13, 14) Ne fakamanatu ke he tau Isaraela kua tapu ha lautolu a Atua, ko Iehova—kakano kua “mea,” “tavana,” mo e “fakatapu.” Ko e tau fekafekau he Atua tapu kua lata ke tapu foki.—Totou Levitika 11:44, 45.
20. Ke he tau puhala fe kua lata a tautolu ke tumau ke meā?
20 Kua lata mogoia a tautolu ke meā e tau loto mo e tau tino. Kua eketaha a tautolu ke fakatumau e tau manatu ha tautolu ke meā. Kua muitua fakamooli a tautolu ke he tau tuaga ha Iehova ke he mahani meā, pete kua fakalialia e mahani fakataane mo e fifine he lalolagi ne takatakai ia tautolu. Mua atu e aoga he fakamakamaka a tautolu ke fakatumau e tapuakiaga ha tautolu ke meā, he kalo mai he ha ilaila he lotu fakavai. Kua tokaloto e tautolu e hatakiaga omoomoi ne fakamau he Isaia 52:11: “O kehe a, kia o kehe ā mutolu, kia o atu a mutolu he mena na; aua neke pipiki atu a mutolu ke he mena kelea; kia o atu ā mutolu mai loto ia ia; kia meā a mutolu.” He vahā nei, kia meā fakaagaaga tumau a tautolu he fakamamao mai neke pipiki ke he tau tapuakiaga fakavai ne kitia he ha tautolu a Matua he lagi kua nakai meā. Ma e fakatai, ko e kakano haia ne fehola kehe mooli a tautolu he tau fakamanatuaga mo e tau aho okioki he tau lotu fakavai ne talahaua he lalolagi he vahā nei. Mooli, ko e paleko ke tumau ke meā. Ka e eketaha e tau tagata a Iehova ke taute pihia ha kua lagomatai he mena nei a lautolu ke tumau ke he fakaalofa he Atua.
21. Maeke fēfē ia tautolu ke iloa mooli to tumau a tautolu ke he fakaalofa he Atua?
21 Kua manako a Iehova ki a tautolu ke tumau tukulagi ke he fakaalofa haana. Ka e igatia a tautolu oti mo e kitia mitaki kua taute e tautolu e tau mena oti kana ke tumau ke he fakaalofa he Atua. Taute e tautolu e mena nei he muitua ke he fakafifitakiaga ha Iesu mo e fakakite mooli e fakaalofa ha tautolu ma Iehova he omaoma ke he tau poakiaga Haana. Ka taute e tautolu pihia, kua mauokafua mooli a tautolu to nakai “maeke ke he tau mena ia ke fakamavehe a tautolu mo e fakaalofa he Atua, ha ia Keriso Iesu ha tautolu a Iki.”—Roma 8:38, 39.
Manatu Nakai e Koe?
• Maeke fēfē he loto manamanatu ha tautolu ke lagomatai a tautolu ke tumau ke he fakaalofa he Atua?
• Ko e ha kua lata ia tautolu ke ofania a lautolu kua ofania e Iehova?
• Ko e ha kua aoga ke fakalilifu e pule?
• Ko e heigoa e aoga he meā ke he tau tagata he Atua?
[Puha/Fakatino he lau 20]
KO E TOHI NE FALAHOOHO MAHANI MITAKI
Ke he fakaholoaga he fonoaga he faahimotu he 2008/2009, ne fakatoka mai e tohi ne 224 e lau, ne mataulu “Keep Yourselves in God’s Love.” Ko e heigoa e kakano he tohi foou nei? Kua talaga ke lagomatai e tau Kerisiano ke iloa mo e ofania e tau poakiaga ha Iehova, he hagaaki pauaki atu ke he mahani faka-Kerisiano. Ko e kumikumi fakamitaki ke he “Keep Yourselves in God’s Love” ka fakahokulo e mauokafua ha tautolu ko e momoui lagotatai mo e tau poakiaga ha Iehova ko e puhala mitaki lahi mahaki ke momoui mogonei ti takitaki atu ke he moui tukulagi he vahā anoiha.
Mua atu ke he mena ia, ko e tohi nei kua talaga ke lagomatai a tautolu ke kitia kua nakai mamafa e omaoma ki a Iehova. Ke he taha faahi, ko e puhala a ia he fakakite ki a Iehova e fakaalofa lahi mahaki ha tautolu ki a ia. Ti ko e tohi nei ka omoomoi ke hūhū hifo ki a tautolu ni, ‘Ko e ha kua omaoma au ki a Iehova?’
Ka taute he falu e hehē kelea he toka e fakaalofa ha Iehova, ko e lekua ne lauia ai e mahani ka e nakai ko e taofiaga. Ti kua aoga mooli mogoia ke fakamalolō e fakaalofa mo e loto fakaaue ha tautolu ma e tau fakatufono mo e tau matapatu fakaakoaga ha Iehova he takitaki e tau momoui ha tautolu ke he tau aho takitaha! Kua mauokafua a tautolu to lagomatai he tohi foou nei e tau mamoe ha Iehova he lalolagi katoa ke tutū mauokafua ke he mena hako, ke fakakite a Satani ko e pikopiko, mo e mua atu ke tumau ke he fakaalofa he Atua!—Iuta 21.
[Fakatino he lau 18]
“Kaeke ke omaoma e mutolu haku a tau poaki, ti tumau a mutolu ke he haku a fakaalofa; tuga au ne oma e tau poaki he haku a Matua, mo e tumau au ke he hana fakaalofa”