Lotu—Fifiliaga Haaku po ke Tau Matua Haaku?

TOKOLOGA e tagata i Polani ne pehē ke he Tau Fakamoli a Iehova, “Na fanau au ke he lotu haaku, to mate hifo ni au ki ai.” Kakano he mena ia, ke he onoonoaga ha lautolu, kua taha ni e lotu ne holo mai he taha atuhau ke he taha atuhau. Moua nakai e koe e aga pihia ke he lotu he matakavi haau? Ko e heigoa ne fa moua mai he manatu pihia? Ne hihiga e lotu ke tuga ko e mena aga mau ti ko e puhala ni he magafaoa. Maeke nakai e mena nei ke tupu ki a lautolu e Tau Fakamoli a Iehova ne moua e tufaaga homo ue atu fakaagaaga mai he tau matua po ke tau tupuna ha lautolu?

Nakai tupu e mena ia ki a Timoteo, ne feaki he matua fifine mo e tupuna fifine fakamooli haana ke talitonu mo e fakaalofa ke he Atua mooli. Ne iloa e Timoteo e tau Tohiaga Tapu mai he “vaha tote [po ke, mukemuke].” Fai magaaho he mole, ko Timoteo fakalataha mo e matua fifine mo e tupuna fifine haana, ne talitonu ko e mena hako e lotu Kerisiano. Ne “iloa tonuhia” e ia e tau mena ne logona e ia mai he tau Tohiaga Tapu hagaao ki a Iesu Keriso. (2 Timo. 1:5; 3:14, 15) Ti pete he eketaha e tau matua Kerisiano he vahā nei ke lagomatai e tau fanau ha lautolu ke eke mo tau fekafekau ha Iehova, kua lata ni he tau fanau ke feaki e manako ia.—Mare. 8:34.

Igatia e tagata mo e lata ke talitonu mooli ha ko e iloa tonuhia ai, kaeke ke fekafekau a ia ki a Iehova mai he fakaalofa mo e fakatumau e mahani fakamooli ke he ha tuaga ni. To mauokafua mo e fakavē malolō mogoia e tua haana.—Efeso 3:17; Kolo. 2:6, 7.

Ko e Matagahua he Fanau

“Na logona hifo tumau e au kua ha ha he Tau Fakamoli a Iehova e lotu mooli,” he fakamaama e Albert,a ne tupu hake he magafaoa he Tau Fakamoli, “ka e uka ia au ke talia e tau talahauaga ha lautolu ke he puhala kua lata ia au ke takitaki aki e moui haaku.” Kaeke ko e fuata a koe, liga pihia foki e manatu haau. Ko e ha he nakai lali ke kitia e tau mena ne putoia ke he puhala ne manako e Atua ke momoui ai a tautolu ti moua e fiafia he taute e finagalo haana? (Sala. 40:8) “Ne kamata mooli au ke liogi,” he talahau e Albert. “He magaaho fakamua, ne uka ia au. Ka e eketaha fakamalolō ni au ke liogi. Nakai leva mogoia, ne logona hifo e au na fai aoga au ke he fofoga he Atua ka lali au ke taute e mena tonu. Ne fakamalolō he mena nei au ke taute e tau hikihikiaga kua lata.” He feaki e fakafetuiaga tata mo Iehova, kua maeke ia koe ke feaki e manako ke taute e tau mena ne manako a ia ki a tautolu.—Sala. 25:14; Iako. 4:8.

Manamanatu ke he pelē ne fitā he pelē e koe, tuga e pelē pepa, po ke sipote pauaki. Ka nakai iloa e koe e tau matafakatufono po ke nakai iloa mitaki a koe ke pelē, to liga ahumate ai. Ka iloa e koe e tau matafakatufono mo e maeke ke pelē fakamitaki e koe, to nakai kia amaamanaki lahi a koe ki ai, ti kumi magaaho foki ke pelē? Pihia foki e tau gahua faka-Kerisiano. Ti eketaha ke tauteute ma e tau feleveiaaga Kerisiano. Fai vala ki ai. Pete ni e tau tau moui haau, na maeke foki he fakafifitakiaga haau ke fakamalolō e falu!—Hepe. 10:24, 25.

Ko e mena taha ia foki ka tutala a koe ke he falu hagaao ke he tua haau. Kua lata foki e mena nei ke taute mai he fakaalofa, nakai ha ko e matagahua. Hūhū hifo ki a koe ni: ‘Ko e ha ne manako au ke tutala ke he falu hagaao ki a Iehova? Ko e heigoa e tau kakano ne moua e au ke fakaalofa ki a Ia?’ Kua lata ia koe ke iloa a Iehova ko e Matua fakaalofa. Ne pehē a Ia puhala ia Ieremia: ‘To kumi e koe au, ti moua ai e koe au, ka kumi e koe au mo e haau a loto katoa.’ (Iere. 29:13, 14) Ko e heigoa he mena nei kua liga lata ia koe ke taute? “Na hiki e au e puhala manamanatu haaku,” he talahau e Jakub. “Ne fano au ke he tau feleveiaaga mo e fano he fonua tali mai he vahā tote, ka e tuga ko e tau matagahua noa ni anei. Ko e magaaho la ne iloa mitaki e au a Iehova mo e feaki e fakafetuiaga fakatagata mo ia, ati putoia lahi au ke he kupu mooli.”

Ko e lafiaga mitaki mo e atihake ne aoga lahi ke moua e koe e fiafia he gahua haau ke he fonua. “Ko ia kua feoaki mo e tau tagata iloilo, kua iloilo ni a ia,” he talahau he fakatai omoomoi. (Fakatai 13:20) Ti kumi ke kapitiga mo lautolu ne tutuli e tau foliaga fakaagaaga mo e fiafia he fekafekauaga ha Iehova. Ne pehē a Jola: “Ne moua e au kua atihake e lafiaga he tau fuata tokologa ne manamanatu fakaagaaga. Ne kamata au ke fakalataha tumau mo e olioli lahi ke he gahua he fonua.”

Ko e Matagahua he Tau Matua

“Kua loto fakaaue lahi au ke he tau matua haaku he fakaako au hagaao ki a Iehova,” he talahau e Jola. E, maeke he tau matua ke malolō lahi e fakaohoohoaga ke he tau fifiliaga he tau tama ha lautolu. Ne tohia he aposetolo ko Paulo: “Ko mutolu foki, ko e tau matua tane, . . . kia leveki [e fanau ha mutolu] ke he tau kupu akonaki mo e tau kupu fakamafana [ha Iehova].” (Efeso 6:4) Kua fakakite fakamaali he fakatonuaga omoomoi nei e matagahua he tau matua ke fakaako e tau fanau ha lautolu ke he tau puhala ha Iehova, nakai ha lautolu. He nakai tō ke he tau loto he tau tama ha mutolu e tau mena ne liga manako a mutolu ke moua, kua homo atu mooli ka maeke ia mutolu ke lagomatai a lautolu ke taute e tau foliaga he tau momoui ha lautolu ke momoui fakatatau ke he tau finagalo ha Iehova!

Maeke ia koe ke fakaako e tau kupu ha Iehova ke he fanau haau mo e “vagahau ki ai, ka nofo a koe ke he hau a fale, ti pihia foki ka fano a koe ke he puhala, ti pihia foki ka takoto a koe, ti pihia foki ka matike ai a koe.” (Teu. 6:6, 7) “Na lahi e tutala ha mautolu ke he tau puhala kehekehe he fekafekauaga gahua mau,” he manatu e Ewa mo Ryszard, ko e tau matua ne tolu e tama taane. Ko e fua? “Ne manako e fanau taane ke huhū he Aoga Fekafekau Fakateokarasi he vahā ikiiki, eke mo tau tagata fakailoa, ti fakahiku fifili ne lautolu ke papatiso. He magaaho fakamui, ne fekafekau a lautolu he Peteli po ke tau paionia.”

Kua aoga lahi e fakafifitakiaga mitaki he tau matua. Pehē a Ryszard, “Ne fakamalolō a maua ke nakai ua e puhala moui, taha i kaina ti taha foki he fakapotopotoaga.” Ko e mena ia, hūhū hifo ki a koe: ‘Ko e heigoa ne kitia he tau fanau haaku ke he haaku moui? Kitia nakai e lautolu e fakaalofa mooli ki a Iehova? Mailoga nakai e lautolu e fakaalofa nei he tau liogi mo e taute tumau e fakaako fakatagata haaku? Kua kitia nakai e lautolu ke he aga haaku he gahua ke he fonua, fakafiafiaaga, mo e tau koloa he tino mo e tau mena haaku ne talahau hagaao ke he falu he fakapotopotoaga?’ (Luka 6:40) To kitia he fanau e puhala moui haau he tau aho takitaha mo e mailoga e nakai tatai he tau mena haau ne talahau mo e tau mena haau ne taute.

Ko e matagahua aoga lahi e akonaki he feaki tama. Pete ia, kua talahau he Kupu omoomoi he Atua ki a tautolu ke “fakaako a e tama ke lata mo e hana puhala.” (Fakatai 22:6) Ne talahau e Ewa mo Ryszard, “Ne fakatoka e maua e magaaho ke fakaako takitokotaha e tau tama ke he Tohi Tapu.” Mooli, kua uta ni ke he tau matua ke fifili kaeke kua lata e tau tama ke fakaako takitokotaha. Ke he ha tuaga ni, kua lata ke fakaigati e tau tama. Kua lata e mena nei ke maeke ke hikihiki mo e fakalotomatala. He nakai tala age hokoia ni ke he tau fanau ha mutolu ko e mena kelea e falu leo kofe, ma e fakatai, he ha he fakakite ki a lautolu e puhala ke taute e tau fifiliaga iloilo, puhala ne putoia e tau matapatu fakaakoaga he Tohi Tapu?

Liga iloa mooli he fanau haau e mena kua amanaki a koe mai ia lautolu ti liga taute e lautolu e tau manako haau. Ka e lata ia koe ke hokotia ke he tau loto ha lautolu. Manatu, “ko e tau fatuakiloto he tagata, ko e vai hokulo haia; ka ko e tagata loto manamanatu, to utu mai ai e ia.” (Fakatai 20:5) Kia fakalotomatala, ke kitia ha lekua ne liga hufia ke he tau loto he fanau haau, ti taute taha mena fakamafiti. He nakai tauage, fakakite kua manamanatu a koe, ti hūhū e tau hūhū kua lata. Ka e fakaeneene ke nakai hūhū toko. Ko e manamanatu mooli haau ka hokotia ke he loto mo e lagomatai a koe ke lagomatai a lautolu.

Ko e Matagahua he Fakapotopotoaga

Maeke nakai a koe ko e taha he tau fekafekau he Atua ke lagomatai e tau fuata he fakapotopotoaga ke loto fakaaue ke he tufaaga fakaagaaga kua moua e lautolu? Pete ko e matagahua he tau matua ke fakamahani e tau fanau ha lautolu, kua maeke falu he fakapotopotoaga, mua atu ke he tau motua, ke lalago e tau laliaga he tau tama. Kua mua atu e aoga ke lagomatai a lautolu he tau magafaoa ne nakai fakalataha oti ke he fakapotopotoaga.

Ko e heigoa he tau motua ka taute ke lagomatai a lautolu ne fuata ke fakaalofa ki a Iehova mo e ke logona hifo kua aoga mo e kua loto fakaaue ki a lautolu? Ko Mariusz, ko e leveki he fakapotopotoaga i Polani, ne pehē: “Kua lata e tau motua ke matutaki, matutaki, matutaki mo lautolu ne ikiiki. Nakai ni ka tutupu e tau lekua ka e pihia foki he falu magaaho—he gahua he fonua, ka hili e tau feleveiaaga, po ke ka inu tī.” He ha he hūhū ki a lautolu ne ikiiki ko e heigoa e logonaaga ha lautolu hagaao ke he fakapotopotoaga? Ko e atāina ke matutaki pihia ka futiaki fakatata a lautolu ne ikiiki ke he fakapotopotoaga mo e fakamalolō a lautolu ke logona ko lautolu ko e vala he fakapotopotoaga.

Kaeke ko e motua a koe, kua iloa nakai e koe e tau fuata he fakapotopotoaga haau? Pete kua fekafekau a ia ko e motua he mogonei, ko Albert ne totoku fakamua, ne lauia ke he tau kamatamata kehekehe he vahā fuata mui. Pehē a ia, “He vahā fuata haaku, ne manako au ke he ahiahi leveki.” Maeke foki e tau motua ke fakakite e fiafia fakatagata ke he tau fuata he liogi ma e malolō fakaagaaga ha lautolu.—2 Timo. 1:3.

Kua mitaki ma lautolu ne ikiiki ke putoia ke he tau gahua he fakapotopotoaga. Neke hagaaki a lautolu ke tutuli e tau foliaga he lalolagi. Maeke nakai ia mutolu ne momotua ke gahua mo lautolu he fonua mo e kapitiga mo lautolu? Fakaaoga taha magaaho fiafia mo lautolu ne ikiiki, he feaki e aga falanaki mo e fakakapitiga. Ne manatu e Jola: “Ne fakakite he matakainaga fifine paionia e fiafia fakatagata ki a au. Ko e fano laia au mo ia he fonua ha ko e manako ni haaku.”

Ko e Fifiliaga Fakatagata Haau

Tau fuata mui, hūhū hifo: ‘Ko e heigoa e tau foliaga haaku? Ka nakaila papatiso au, eke nakai e au e papatisoaga mo foliaga haaku?’ Ko e fifiliaga ke papatiso kua lata ke hake mai he loto kua puke he fakaalofa ki a Iehova, nakai ha ko e muitua ke he puhala he magafaoa.

E, kia eke a Iehova mo Kapitiga mooli haau, mo e taute e kupu mooli mo koloa uho haau. Ne fakailoa e Iehova mai he perofeta ko Isaia: “Aua neke kitekite fano a koe, ha ko au ko e hau a Atua.” To fakalataha a Iehova mo koe ka fakatumau a koe ke kapitiga mo ia. To fakamalolō mooli e ia a koe mo e ‘taofi tumau a koe ke he haana a lima matau ne ha i ai e mahani tututonu.’—Isaia 41:10.

[Matahui Tala]

[Fakatino he lau 4]

Lali ke maama e mena ne toka he loto he tama haau

[Fakatino he lau 6]

Ko e fifiliaga ke papatiso kua hake mai he loto kua puke he fakaalofa ki a Iehova