Fakatumau e Tau Kapitiga he Lalolagi Nakai Fakaalofa
“Kua tala atu e au e tau mena ia kia mutolu, kia feofanaki a mutolu.”—IOANE 15:17.
1. Ko e ha ne lata e tau Kerisiano he senetenari fakamua ke fakatumau ko e tau kapitiga tata?
HE PŌ fakahiku haana he lalolagi, ne fakamalolō e Iesu e tau tutaki fakamooli haana ke fekapitigaaki tumau. Fakamua he magaaho afiafi, ne talahau e ia to fakakite he fakaalofa ne fakatātā e lautolu ke he taha mo e taha, ko e tau tutaki haana a lautolu. (Ioane 13:35) Kua lata e tau aposetolo ke fakatumau ko e tau kapitiga tata kaeke ke fakauka a lautolu ke he tau kamatamata ne ha ha i mua mo e ke taute e gahua ka nakai leva ti kotofa age e Iesu ki a lautolu. Mooli, ne talahaua e tau Kerisiano he senetenari fakamua he malolō e mahani fakamooli ha lautolu ke he Atua mo e ke he taha mo e taha.
2. (a) Ko e heigoa ka eketaha a tautolu ke taute, ti ko e ha? (e) Ko e heigoa e tau hūhū ka fakatutala a tautolu ki ai?
2 He vahā nei, ko e fiafia ha ia ke fakalataha mo e fakatokatokaaga he lalolagi katoa ne mumui e tau tagata i ai ke he fakafifitakiaga ne fakatoka he tau Kerisiano ia he senetenari fakamua! Kua eketaha a tautolu ke omaoma e poaki ha Iesu ke fakatātā e fefakaalofaaki mooli. Pete ia, he tau aho fakamui nei, ko e laulahi he tau tagata kua nakai fakamooli mo e mahala ke fakakite e fakaalofa. (2 Timo. 3:1-3) Ko e tau kapitiga ne moua e lautolu kua fakateaga mo e lotokai. Ke fakatumau e fakamailoga ha tautolu ko e tau Kerisiano mooli, lata ia tautolu ke kautū mai he tau aga pihia. Kia fakatutala ai a tautolu ke he tau hūhū ne mui mai: Ko e heigoa e fakavēaga he tau kapitiga mitaki? Maeke fēfē ia tautolu ke moua e tau kapitiga mitaki? Magaaho fe ka liga lata ia tautolu ke fakaoti e fakafetuiaga kapitiga? Ti maeke fēfē ia tautolu ke fakatumau e tau kapitiga kua atihake?
Ko e Heigoa e Fakavēaga he Tau Kapitiga Mitaki?
3, 4. Ko e heigoa e fakavēaga he tau kapitiga malolō lahi, ti ko e ha?
3 Ko e tau kapitiga malolō lahi kua fakavē ke he fakaalofa ki a Iehova. Ne tohi he Patuiki ko Solomona: “Kaeke foki ke kautu e tagata kia ia ne tokotaha, to totoko atu kia ia tokoua; ko e toua kave tolu nakai momutu vave ia.” (Fakama. 4:12) He magaaho ka eke a Iehova mo toua kave tolu ke he tau kapitiga, to mauokafua e fakafetuiaga kapitiga ia.
4 Mooli, ko lautolu ne nakai fakaalofa ki a Iehova kua maeke foki ke moua e tau kapitiga mitaki. Ka e, he magaaho ka futia fakalataha e tau tagata he fetataiaki e fakaalofa ke he Atua, to malolō e kapitiga ha lautolu. Ka tutupu e tau fekehekeheaki, to fakafehagai e tau kapitiga mooli ke he puhala kua fakafiafia ki a Iehova. Ka lali e tau tagata totoko ke he Atua ke fakatupu e feveheveheaki, ne mailoga he tau fī nei e malolō he tau fakafetuiaga kapitiga he tau Kerisiano mooli. Tali mai he fakamauaga tuai, ne fakakite he tau fekafekau ha Iehova e makai ha lautolu ke fehagai ke he mate ka e nakai afo he taha e taha.—Totou 1 Ioane 3:16.
5. Ko e ha ne mauokafua lahi e fakafetuiaga kapitiga ha Ruta mo Naumi?
5 Nakai fakauaua, ko e tau kapitiga mitaki lahi ka olioli e tautolu ko e tau tagata ne fakaalofa ki a Iehova. Kitekite ke he fakafifitakiaga ha Ruta mo Naumi. Ne feaki he tau fifine nei e taha fakafetuiaga kapitiga ne uho lahi mahaki ne fakamau i loto he Tohi Tapu. Ko e ha ati mauokafua lahi e kapitiga ha laua? Ne fakakite e Ruta e kakano he pehē a ia ki a Naumi: “To eke e motu hau mo motu haku, to eke e Atua hau mo Atua haku. . . . Kia eke pihia e Iehova kia au, mo e lafilafi e ia ki ai, kaeke ke vevehe kehe a taua mo koe ato vevehe he mate.” (Ruta 1:16, 17) Kitia maaliali ai, ne moua e Ruta mo Naumi e fakaalofa hokulo ma e Atua, ti fakaatā e laua e fakaalofa nei ke fakaohooho e puhala ne fehagaiaki a laua. Ko e fua, ne fakamonuina e Iehova e tau fifine tokoua nei.
Puhala ke Moua e Tau Kapitiga Mitaki
6-8. (a) Tupu mai he heigoa e tau kapitiga mauokafua? (e) Fakalotomatala fēfē a koe ke moua e tau kapitiga?
6 Kua fakatātā he fakafifitakiaga ha Ruta mo Naumi na nakai amanaki ti moua noa e tau kapitiga mitaki. Kua fakavē ai ke he fetataiaki e fakaalofa ki a Iehova. Ka ko e tau kapitiga mauokafua kua tupu mai he gahua lahi mo e foakiaga fakatagata. Ko e fanau foki i loto he tau magafaoa Kerisiano ne tapuaki ki a Iehova kua lata ke gahua ke moua e fakafetuiaga kapitiga tata. Moua fēfē mogoia e koe e tau kapitiga mitaki?
7 Kia fakalotomatala. Ne fakamafana he aposetolo ko Paulo e tau kapitiga haana he fakapotopotoaga i Roma “kia fakamalolo ke he [“puhala he fakamokoi,” NW].” (Roma 12:13) He muitua ke he puhala mooli kua putoia e tau lakaaga loga kua taute takitaha he magaaho. Pihia foki, he fakamokoi kua putoia e tau gahua ikiiki kua taute tumau. Nakai fai tagata foki ka fakamokoi ma haau. (Totou Tau Fakatai 3:27.) Taha puhala ka fakamokoi a koe, he uiina e tau tagata kehekehe he fakapotopotoaga ke taumafa auloa mo koe ke he kai mukamuka. Maeke nakai a koe ke taute tumau ai mo vala he fakaholoaga haau ke fakakite e fakamokoi ke he tau matakainaga he fakapotopotoaga haau?
8 Taha puhala ke fakalotomatala a koe ke moua e tau kapitiga, he uiina e tau tagata kehekehe ke fakalataha mo koe he gahua fakamatala. Ka tū a koe i mua he gutuhala he tagata kehe ti logona e hoa haau ne vagahau mai he loto hagaao ke he fakaalofa haana ki a Iehova, kua futiaki fakatata lahi a koe ke he matakainaga ia.
9, 10. Ko e heigoa e fakafifitakiaga ne fakatoka e Paulo, ti liga fifitaki fēfē e tautolu a ia?
9 Fakalahi atu ha mutolu a tau loto po ke, fakaalofa. (Totou 2 Korinito 6:12, 13.) Kua logona hifo kia e koe kua nakai taha e tagata he fakapotopotoaga haau ka maeke ia koe ke kapitiga ki ai? Ka pihia, kua fakakaupā kia e onoonoaga haau ke he tagata kua lata ke kapitiga ki ai? Ne fakatoka he aposetolo ko Paulo e fakafifitakiaga mitaki he fakalahi atu e fakaalofa haana. He taha magaaho, ne nakai manatu a ia to kapitiga tata a ia mo lautolu ne nakai ko e tau Iutaia. Pete ia, ne eke a ia mo “aposetolo ke he tau tagata kehe.”—Roma 11:13.
10 Lafi ki ai, ne nakai fakamahao a Paulo ke kapitiga mo lautolu he atuhau ni haana. Tuga anei, ne kapitiga tata a ia mo Timoteo pete kua kehekehe mamao e tau tau moui mo e tau feakiaga. He vahā nei, tokologa e fuata ne tokiofa e fakafetuiaga kapitiga ne moua e lautolu mo e tau matakainaga kua motua hake he fakapotopotoaga. “Fai kapitiga fifine fakahele lahi au ne 50 tumā e tau moui,” he talahau e Vanessa ne 20 tumā e tau moui. “Maeke ia au ke tala age ki a ia e tau mena ne maeke ia au ke tala age ke he tau kapitiga he atu tau haaku. Ti ofaofa lahi mahaki e ia au.” Moua fēfē e tau kapitiga pihia? Pehē a Vanessa: “Ne kumi e au ke moua e kapitiga nei ti nakai fakatali ke hau ai ki a au.” Fakamakai nakai a koe ke atihake e tau kapitiga mo lautolu ne nakai tatai e tau tau moui mo koe? To palepale mooli e Iehova a koe ma e tau laliaga haau.
11. Ko e heigoa kua fakaako e tautolu mai he fakafifitakiaga ha Ionatana mo Tavita?
11 Kia fakamooli. “Kua fakaalofa e kapitiga ke he tau aho oti kana; kua fanau foki e matakainaga ke lata ai mo e aho matematekelea,” he tohi e Solomona. (Fakatai 17:17) He tohi e tau kupu ia, liga tokaloto e Solomona e fakafetuiaga kapitiga ne olioli he matua taane haana, ko Tavita, mo Ionatana. (1 Samu. 18:1) Ne manako e Patuiki ko Saulo ke moua he tama haana ko Ionatana e nofoaiki i Isaraela. Ka e talia e Ionatana nukua fifili e Iehova a Tavita ma e kotofaaga nei. Nakai tatai mo Saulo, ne ai mahekeheke a Ionatana ki a Tavita. Ne nakai fakavihia e ia e fakahekeaga ne moua e Tavita, ti nakai talitonu a ia ke he pikopiko ne fakapuloa e Saulo hagaao ki a Tavita. (1 Samu. 20:24-34) Tatai nakai a tautolu mo Ionatana? Ka moua he tau kapitig ha tautolu e tau kotofaaga, fiafia nakai a tautolu ki a lautolu? Ka matematekelea a lautolu he tau mena uka, kua fakamafana mo e lalago nakai e tautolu a lautolu? Ka logona e tautolu e tau tala noa hagahaga kelea hagaao ke he kapitiga, mafiti nakai a tautolu ke talitonu ki ai? Po ke lalago fakamooli nakai e tautolu e kapitiga ha tautolu, ke tuga a Ionatana?
Magaaho ka Lata ke Fakaoti e Fakafetuiaga Kapitiga
12-14. Ko e heigoa e paleko ne fehagai mo e falu tagata fakaako Tohi Tapu, ti maeke fēfē ia tautolu ke lagomatai a lautolu?
12 He kamata e tagata fakaako Tohi Tapu ke taute e tau hikiaga ke he puhala moui haana, liga fehagai a ia mo e paleko mooli hagaao ke he tau kapitiga. Liga fai kapitiga a ia ne fiafia ke fakalataha ki ai ka kua nakai moui fakatatau ke he tau tutūaga he Tohi Tapu. He vahā kua mole, ne liga lafi tumau a ia mo lautolu. Ka e mogonei, kua kitia e ia ko e tau gahua he tau kapitiga haana to liga fakaohooho kelea ki a ia, ti logona hifo e ia kua lata ni ke fakakaupā e matutaki haana mo e tau kapitiga pihia. (1 Kori. 15:33) Pete ia, liga logona hifo e ia ka nakai lafi mo lautolu, kua nakai fakamooli a ia ki a lautolu.
13 Kaeke ko e tagata fakaako Tohi Tapu a koe ne fehagai mo e paleko nei, manatu to fiafia e kapitiga mooli he lali a koe ke fakamitaki e moui haau. Liga manako foki a ia ke fakalataha mo koe ke fakaako hagaao ki a Iehova. Ke he taha faahi, ko e tau kapitiga fakavai to “vagahau kelea ai a lautolu,” ha kua nakai poi a koe mo lautolu “ke he matahavala ia ni kua mua ue atu.” (1 Pete. 4:3, 4) Ti ko e tau kapitiga nei ne nakai fakamooli ki a koe, nakai ko koe.
14 Ka tiaki he tau kapitiga fakamua ne nakai fakaalofa ke he Atua e tau tagata fakaako Tohi Tapu, to eke e tau matakainaga he fakapotopotoaga mo kapitiga ha lautolu. (Kala. 6:10) Iloa lahi nakai e koe a lautolu ne ō atu he tau feleveiaaga ha mutolu hane fakaako e Tohi Tapu? Maeke nakai ia koe he falu magaaho ke foaki ki a lautolu e lafiaga atihake?
15, 16. (a) Lata ke fēfē e aga ha tautolu ka fakaoti e fekafekau he kapitiga ki a Iehova? (e) Fakakite fēfē e tautolu e fakaalofa ha tautolu ma e Atua?
15 Ka e kua ka fifili e kapitiga i loto he fakapotopotoaga ke tiaki a Iehova, ti liga lata ke tuku ki tua? Kua fakatupetupe lahi e tuaga ia. He fakamaama e aga haana he magaaho ne fakaoti he kapitiga tata e fekafekau ki a Iehova, ne pehē taha matakainaga fifine: “Logona hifo e au kua tuga fai mena i loto ia au kua mate. Manatu au kua tūmauokafua e kapitiga haaku ke he kupu mooli, ka kua nakai pihia a ia. Ne manamanatu au kua fekafekau ni a ia ki a Iehova ke fakafiafia e magafaoa haana. Ati kamata ai au ke filifilia e tau manako ni haaku. Kua hako nakai e tau kakano ne fekafekau ai au ki a Iehova?” Fahia fēfē e matakainaga fifine nei? “Ne tuku atu e au ki a Iehova e tau mena ne fakaatukehe ai au,” he talahau e ia. “Kua eketaha au ke fakakite ki a Iehova nukua ofania mooli e au a ia, nakai ni ha kua foaki mai e ia e tau kapitiga ma haaku i loto he fakatokatokaaga haana.”
16 Kua nakai amanaki a tautolu ke tumau e kapitiga mo e Atua kaeke ke kau a tautolu mo lautolu ne fifili ke kapitiga mo e lalolagi. Ne tohi he tutaki ko Iakopo: “Kua iloa nakai e mutolu ko e kapitiga mo e lalolagi ko e faitaua haia ke he Atua? Hanai, kaeke ke fia kapitiga taha mo e lalolagi, kua eke a ia mo fi ke he Atua.” (Iako. 4:4) Maeke ia tautolu ke fakakite e fakaalofa ke he Atua he falanaki to lagomatai e Ia a tautolu ke fahia ka galo e kapitiga, kaeke ke fakamooli a tautolu ki a Ia. (Totou Salamo 18:25.a) Ne fakahiku he matakainaga fifine ne totoku i luga e matakupu nei: “Ne iloa e au kua nakai maeke ia tautolu ke taute taha tagata ke fakaalofa ki a Iehova po ke fakaalofa ki a tautolu. Ko e fifiliaga ni he tagata he magaaho fakamui.” Ko e heigoa mogoia ha tautolu ka taute ke fakatumau e kapitiga atihake mo lautolu ne nonofo agaia i loto he fakapotopotoaga?
Fakatumau e Tau Kapitiga Mitaki
17. Vagahau fēfē e tau kapitiga mitaki ke he taha mo e taha?
17 Fakatumau e tau kapitiga ke fetataaki ha ko e matutakiaga mitaki. He totou e koe e tau tala Tohi Tapu ne putoia a Ruta mo Naumi, Tavita mo Ionatana, Paulo mo Timoteo, to mailoga e koe kua atāina e tau kapitiga mitaki ke tutala mo e fakalilifu ke he taha mo e taha. Hagaao ke he puhala kua lata ia tautolu ke fematutakiaki, ne tohi e Paulo: “Aua neke noa ha mutolu a tau kupu mo e fakaalofa, kia fakamasima ke he masima.” Kua hagaao fakatonu a Paulo ke he puhala kua lata ia tautolu ke tutala ki a lautolu “i tua,” ko lautolu a ia ne nakai ko e tau matakainaga Kerisiano ha tautolu. (Kolo. 4:5, 6) Kaeke kua lata mogoia ke fakalilifu e tau tagata nakai talitonu ne tutala a tautolu ki ai, kua lata ke mua atu foki e fakalilifu ke he tau kapitiga ha tautolu i loto he fakapotopotoaga!
18, 19. Lata ke fēfē e onoonoaga ha tautolu ke he ha fakatonuaga kua moua mai e tautolu he kapitiga Kerisiano, ti ko e heigoa e fakafifitakiaga ne fakatoka he tau motua i Efeso ma tautolu?
18 Kua uho e tau manatu he tau kapitiga mitaki ke he taha mo e taha, ti ko e matutakiaga ha lautolu kua lata ke fakaalofa mo e fakamooli. Ne tohi he patuiki pulotu ko Solomona: “Ko e puke lolo mo e mena manogi kua fakafiafia ai e loto; kua pihia foki e fakaalofa he kapitiga he tagata, he fakatonu mena e ia kua eke ni mo e loto.” (Fakatai 27:9) Pihia nakai e onoonoaga haau ke he fakatonuaga ne moua mai he kapitiga? (Totou Salamo 141:5.) Ka fakakite he kapitiga e tupetupe ke he falu puhala gahua ne taute e koe, liga fēfē la e aga haau? Mailoga nakai e koe ko e tau talahauaga ia ko e tau gahua he fakaalofa-totonu, po ke ita a koe?
19 Ne olioli he aposetolo ko Paulo e fakafetuiaga tata mo e tau motua he fakapotopotoaga i Efeso. Ne liga iloa e ia e falu tagata taane nei he eke fakamua a lautolu mo tau tagata talitonu. Ka e he feleveiaaga fakahiku haana mo lautolu, ne foaki e ia ki a lautolu e falu fakatonuaga lautonu. Tali atu fēfē a lautolu? Ne nakai ita e tau kapitiga ha Paulo. Ka e loto fakaaue a lautolu he manamanatu a ia ki a lautolu, ti tagi foki a lautolu he manatu to nakai liu kitia a ia.—Gahua 20:17, 29, 30, 36-38.
20. Ko e heigoa ka taute he kapitiga fakaalofa?
20 Kua nakai ni talia he tau kapitiga mitaki e fakatonuaga pulotu ka e foaki ai foki e lautolu. Mooli, kua lata ia tautolu ke mailoga e magaaho ke “eke ha [ta]utolu ni a feua.” (1 Tesa. 4:11) Ti lata foki ia tautolu ke mailoga to igatia a tautolu mo e “talatala atu hana mahani ke he Atua.” (Roma 14:12) Ka lata ai, to fakamanatu age fakatotonu he kapitiga fakaalofa e tau tutūaga ha Iehova ke he kapitiga haana. (1 Kori. 7:39) Ma e fakatai, ko e heigoa haau ka taute ka mailoga e koe e kapitiga nakaila mau kua fai logonaaga ke he tagata nakai talitonu? He matakutaku neke fakahagahaga kelea e fakafetuiaga kapitiga ha mua, to fakaumiumi kia a koe ke talahau e tau manatu haau? Po ke, ka fakaheu he kapitiga e fakatonuaga haau, ko e heigoa haau ka taute? To kumi he kapitiga mitaki e lagomatai he tau leveki fakaalofa ke liuaki mai e kapitiga ne holifono. Kua latatonu ke fakamalolō ke taute pihia. Pete ia, to nakai hagahaga kelea tumau e fakafetuiaga kapitiga ka fakavē ke he fakaalofa ki a Iehova.
21. Ko e heigoa ka taute e tautolu oti he falu magaaho, ka ko e ha ne aoga lahi ia tautolu ke fakatumau a fakafetuiaga kapitiga malolō i loto he fakapotopotoaga?
21 Totou Kolose 3:13, 14. Falu magaaho, to foaki e tautolu ke he tau kapitiga e kakano ke “mahani kelea [po ke, gugū]” ki a tautolu, mo e to taute po ke talahau foki e lautolu e tau mena ke fakaita a tautolu. “Ko e tau mena loga kua hehe ai a tautolu oti,” he tohi e Iakopo. (Iako. 3:2) Pete ia, ko e fifiliaga he kapitiga kua nakai ko e lagafiha e agahala ha tautolu ke he taha mo e taha, ka ko e puhala ne fakamagalo katoatoa e tautolu e tau matalekua ia. Kua aoga lahi mooli ke ati e tautolu e fakafetuiaga kapitiga malolō he matutaki fakamooli mo e fefakamagaloaki! Ka fakatātā e tautolu e fakaalofa pihia, to eke ai mo ‘pipi ke fakamaopoopo ai.’
[Matahui Tala]
a Salamo 18:25 (NW): “Mo e tagata ne mahani fakamooli to taute e koe e mahani fakamooli; mo e tagata nakai mahani hepehepe ti malolō, to nakai taute e koe e mahani hepehepe.”
To Tali Fēfē e Koe?
• Maeke fēfē ia tautolu ke moua e tau kapitiga mitaki?
• Magaaho fe ka liga lata ke fakaoti e fakafetuiaga kapitiga?
• Ko e heigoa kua lata ke taute e tautolu ke fakatumau e fekafetuiaga kapitiga malolō?
[Fakatino he lau 18]
Ko e heigoa e fakavēaga ati mauokafua e fakafetuiaga kapitiga ha Ruta mo Naumi?
[Fakatino he lau 19]
Fakakite tumau nakai e koe e fakamokoi?