Tala Tuai 2: Matematekelea a Lautolu ne Mahani Kelea he Tukuaga

Ko e heigoa e kamataaga he tala tuai?

“Ke he tau tagata pulotu Heleni fakamua atu, ko ia ne mua atu e fakaohooho ke he tau manatu tuai he Tukuaga ko Plato.”—Histoire des enfers (The History of Hell), ha Georges Minois, lau 50.

“Mai he lotouho he senetenari ke 2 aki AD ko e tau Kerisiano ne fai fakaakoaga ke he pulotu Heleni ne kamata ke logona hifo e lata ke fakakite e tua ha lautolu ke he manatu ia . . . Ko e fakaakoaga ne latatonu mo lautolu ko e Platonism [tau fakaakoaga ha Plato].”—The New Encyclopædia Britannica (1988), Volume 25, lau 890.

“Ne fakamau he fakaakoaga he Lotu e tupu maiaga he tukuaga mo e tumau tukulagi haana. He mole agataha e mate, ko e tau tino ha lautolu kua mamate he tuaga agahala ne o hifo ke he tukuaga, ko e matakavi ne matematekelea he fakahala ke he tukuaga, ko e ‘afi tukulagi.’ Ko e fakahala katoa he tukuaga ko e vevehe tukulagi mai he Atua.”—Catechism of the Catholic Church, fufuta 1994, lau 270.

Ko e heigoa ne talahau he Tohi Tapu?

“Ha ko lautolu kua momoui, kua iloa e lautolu to mamate a lautolu; ka ko lautolu ne mamate nakai iloa e lautolu ha mena, . . . ha kua nakai fai gahua, po ke manamanatu, po ke mena kua iloa, po ke iloilo ke he tukuaga [po ke, Seoli], kua fina atu ki ai a koe.”—Fakamatalaaga 9:5, 10.

Ko e kupu Heperu Sheol, kua hagaao ke he “matakavi he tau tagata mamate,” ne fakaliliu “tukuaga” he falu Tohi Tapu. Ko e heigoa ne talahau he kupu nei hagaao ke he tuaga he tau tagata mamate? Kua mamahi kia a lautolu i Seoli ke fakafeilo aki e tau hepehepe ha lautolu? Nakai, ha ko lautolu kua ‘nakai iloa ha mena.’ Kakano haia he magaaho ne matematekelea e tupuna ko Iopu he gagao kelea lahi mahaki, ne ole a ia ke he Atua: “Fufu e koe au i Seoli.” (Iopu 14:13) Ti ko e heigoa mogoia e kakano he ole haana kaeke ko Seoli ko e matakavi ke fakakikiveka tukulagi ai? Ko e tukuaga ne fakamaama he Tohi Tapu ko e luo ne tanu e tau tagata ti nakai fai gahua ai.

Nakai kia felauaki ti lagotatai lahi e fakamaamaaga nei he tukuaga mo e Tohiaga Tapu? Ko e heigoa e matahavala, kua mua atu e kelea, ka fakatupu e Atua he fakaalofa ke fakakikiveka tukulagi e tagata? (1 Ioane 4:8) Kaeke ko e tala tuai e afi tote, ka e kua e lagi?

Fakatatai e tau kupu Tohi Tapu nei: Salamo 146:3, 4; Gahua 2:25-27; Roma 6:7, 23