Ko e Heigoa he Tau Liogi Haau ne Fakakite Hagaao ki a Koe?
‘Ko e Fanogonogo Liogi na e, to o atu kia koe e tau tagata oti kana.’—SALA. 65:2.
1, 2. Ko e ha e tau fekafekau a Iehova ne maeke ke liogi mauokafua ki a Ia?
KUA nakai fakateligatuli a Iehova ke he tau ole he tau fekafekau fakamooli haana. Maeke a tautolu ke mauokafua kua logona e ia a tautolu. Pete he totou miliona e Tau Fakamoli a Iehova ne liogi ke he Atua he magaaho taha, to nakai fai ka moua e ‘sikinolo lavelave.’
2 He mauokafua kua logona he Atua e tau ole haana, ne lologo e salamo ko Tavita: ‘Ko e Fanogonogo Liogi na e, to o atu kia koe e tau tagata oti kana.’ (Sala. 65:2) Ne tali e tau liogi a Tavita ha ko ia ko e tagata tapuaki fakamooli a Iehova. Liga maeke ia tautolu ke hūhū hifo ki a tautolu: ‘Kua fakakite nakai he tau olelalo haaku kua falanaki au ki a Iehova ti ko e tapuakiaga meā e mena ne mua atu e aoga ki a au? Ko e heigoa he tau liogi haaku ne fakakite hagaao ki a au?’
Liogi Fakatokolalo ki a Iehova
3, 4. (a) Ko e heigoa e aga kua lata ke moua e tautolu he liogi ke he Atua? (e) Ko e heigoa kua lata ke taute e tautolu kaeke kua tupetupe e “manamanatu” ha ko e agahala hagahaga kelea?
3 Ka manako a tautolu ke talia e tau liogi, kua latatonu a tautolu ke liogi fakatokolalo ke he Atua. (Sala. 138:6) Kua lata ia tautolu ke ole ki a Iehova ke kumikumi a tautolu tuga ne taute e Tavita he pehē: “Ko e Atua na e, kia kumi e koe kia au mo e kitekite ke he hoku loto; kia kamatamata e koe au mo e kitekite ke he haku a manamanatu. Mo e kitekite kia au po ke ne ha ia au ha mahani ke mamahi ai; kia takitaki foki e koe au ke he puhala tukulagi.” (Sala. 139:23, 24) Kia nakai ni liogi a tautolu ka e mumuitua foki ke he kamatamata he Atua mo e fakatonuaga he Kupu haana. Maeke ia Iehova ke takitaki a tautolu “ke he puhala tukulagi,” he lagomatai a tautolu ke tutuli e puhala ne takitaki ke he moui tukulagi.
4 Ka e kua ka tupetupe a tautolu ha ko e “manamanatu” hagaao ke he agahala hagahaga kelea? (Totou Salamo 32:1-5.) He lali ke tautaofi hifo e loto manamanatu agahala ka fakalolelole a tautolu, tuga ni e akau ka magomago ha ko e velagia he vahā mafana. Ha kua agahala a Tavita, ne galo e ia e olioli haana ti liga gagao ai. Kua fakatotoka mooli a ia he talahau ai ke he Atua! Manamanatu la ke he olioli ne logona hifo e Tavita he ‘fakamagalo e Iehova hana tau holifono.’ He talahau e agahala ke he Atua ka tamai e totokaaga, mo e ko e lalagoaga he tau motua Kerisiano to lagomatai foki e tagata ne hehē ke liu moua e malolō fakaagaaga.—Fakatai 28:13; Iako. 5:13-16.
Olelalo ke he Atua mo e Fakaaue ki a Ia
5. Ko e heigoa e kakano ke olelalo ki a Iehova?
5 Ka fakaatukehe a tautolu ha ko e tau kakano kehekehe, kua lata ia tautolu ke fakagahua e fakatonuaga ha Paulo: “Aua neke fakaatukehe a mutolu ke he taha mena taha; ka kia fakailoa atu ke he Atua e tau manako ha mutolu ke he tau mena oti kana ke he liogi, mo e ole[lalo], katoa mo e fakaaue.” (Filipi 4:6) Ko e kakano he olelalo “ke tutala fakatokolalo.” Mua atu he magaaho hagahaga kelea po ke favaleaga, kua lata ia tautolu ke olelalo ki a Iehova ma e lagomatai mo e takitakiaga.
6, 7. Ko e heigoa e tau kakano kua lata he totoku foki e tau fakaaue ke he tau liogi ha tautolu?
6 Kaeke ke liogi ni a tautolu ka manako ke he taha mena, ko e heigoa kua fakakite hagaao ke he tau fatuakiloto ha tautolu? Ne pehē a Paulo kua lata ia tautolu ke fakailoa e tau manako ha tautolu ke he Atua “katoa mo e fakaaue.” Ha ha mooli ia tautolu e kakano ke fakaaue tuga ne talahau e Tavita: “Iehova na e, ko e hau ni e mua ue atu mo e malolo, mo e fulufuluola, mo e lilifu, mo e fakahekeaga; ha ko e mena ha ha ia koe e tau mena oti ke he lagi, mo e lalolagi; Iehova na e, hau ni e kautu, kua tokoluga ue atu a koe kua mua ue atu ni a koe he tau mena oti kana. . . . Hanai, ha mautolu a Atua na e, kua fakaaue atu a mautolu kia koe, mo e fakaheke atu ke he hau a higoa lilifu.”—1 Nofo. 29:11-13.
7 Ne fakaaue a Iesu ke he Atua ma e tau mena kai mo e areto mo e uaina ne fakaaoga ke he Kaiaga Afiafi he Iki. (Mata. 15:36; Mare. 14:22,23) He nakai ni fakakite e loto fakaaue pihia, kua lata ia tautolu ke “fakaheke atu . . . kia Iehova” ma e “hana tau [“gahua homo ue atu,” NW] kua eke ke he fanau he tau tagata,” ma e haana “tau fakafiliaga tonu,” mo e haana kupu, po ke fekau, ne ha ha i ai mogonei he Tohi Tapu.—Sala. 107:15; 119:62, 105.
Liogi ma e Falu
8, 9. Ko e ha kua lata ia tautolu ke liogi ma e tau matakainaga Kerisiano?
8 Kua liogi mooli a tautolu ma tautolu ni, ka e lata foki e tau liogi ha tautolu ke putoia e falu—pihia mo e tau Kerisiano ne nakai iloa e tautolu e tau higoa. Pete he nakai iloa he aposetolo ko Paulo e tau matakainaga oti i Kolose, ne tohi e ia: “Kua fakaaue atu a mau[tolu] ke he Atua, ko e Matua he Iki ha tautolu ko Iesu Keriso, kua liogi nakai noa ma mutolu. He fanogonogo atu a mau[tolu] ke he tua ha mutolu kia Keriso Iesu, mo e fakaalofa ha mutolu ke he tau tagata tapu oti kana.” (Kolo. 1:3, 4) Ne liogi foki a Paulo ma e tau Kerisiano i Tesalonia. (2 Tesa. 1:11, 12) Ko e tau liogi pihia kua lahi e mena ne talahau hagaao ki a tautolu mo e puhala ne onoono a tautolu ke he tau matakainaga Kerisiano ha tautolu.
9 Ko e tau liogi ha tautolu ma e tau Kerisiano fakauku mo e ha lautolu a tau hoa he ‘tau mamoe kehe’ kua fakakite e manamanatu ha tautolu ma e fakatokatokaaga he Atua. (Ioane 10:16) Ne ole a Paulo ke he tau matakainaga tapuaki ke liogi ke maeke ke ‘foaki mai e vagahau kia ia ka fakamatala atu e mena galo he tala mitaki.’ (Efeso 6:17-20) Igatia nakai a tautolu mo e liogi ma e falu Kerisiano he puhala ia?
10. To lauia fēfē a tautolu ka liogi ma e falu?
10 Ko e liogi ma e falu ka hiki e aga ha tautolu ki a lautolu. Ka nakai fiafia mooli a tautolu ke he tagata ka e liogi a tautolu ma haana, maeke fēfē a tautolu ke nakai fakaalofa ke he tagata ia? (1 Ioa. 4:20, 21) Ko e tau liogi pehēnei kua atihake mo e fakatupu ki mua e kaufakalataha mo e tau matakainaga ha tautolu. Mua atu, kua fakakite he tau liogi pihia kua ha ha ia tautolu e fakaalofa tuga he Keriso. (Ioane 13:34, 35) Ko e mahani ia ko e vala he fua he agaaga he Atua. Kua igatia nakai a tautolu mo e liogi ma e agaaga tapu, he ole ki a Iehova ke lagomatai a tautolu ke fakatātā haana fua he fakaalofa, fiafia, mafola, fakauka, totonu, mahani mitaki, tua, mahani molu, mo e manako fakalatalata? (Luka 11:13; Kala. 5:22, 23) Ka pihia, to fakakite he tau kupu mo e tau gahua ha tautolu kua mahani mo e momoui ai a tautolu ke he agaaga.—Totou Kalatia 5:16, 25.
11. Ko e ha ne pehē a koe kua tonu ke ole ke he falu ke liogi ma tautolu?
11 Ka iloa e tautolu kua matamata e tau tama ha tautolu ke kaihā he kamatamata he aoga, kua lata ia tautolu ke liogi ma lautolu ti fakaaoga foki e tau Tohiaga Tapu ke lagomatai a lautolu ke mahani fakamooli mo e ke nakai taute ha mena hehē. Ne tala age a Paulo ke he tau Kerisiano i Korinito: “Kua ole atu a [mautolu] ke he Atua, kia nakai eke e mutolu ha mena kelea.” (2 Kori. 13:7) Ko e tau liogi fakatokolalo pihia kua fakafiafia a Iehova mo e vagahau mitaki hagaao ki a tautolu. (Totou Tau Fakatai 15:8.) Maeke ia tautolu ke ole ke he falu ke liogi ma tautolu tuga ne taute he aposetolo ko Paulo. “Kia liogi a mutolu ma mautolu,” he tohi e ia, “ha kua taofi e mautolu ha ha ia mautolu e loto manamanatu hifo mitaki, kua loto a mautolu ke mahani mitaki ke he tau mena oti kana.”—Hepe. 13:18.
Fai Mena Foki ne Fakakite he Tau Liogi ha Tautolu
12. Ko e heigoa kua lata ke eke mo tau vala aoga lahi he tau liogi ha tautolu?
12 Kua fakakite kia he tau liogi ha tautolu ko tautolu ko e Tau Fakamoli fiafia mo e makutu ha Iehova? Kua hagaaki katoatoa kia e tau olelalo ha tautolu ke felauaki mo e finagalo he Atua, fakamatala e fekau he Kautu, fakatokoluga e pule katoatoa a Iehova, mo e fakatapu e higoa haana? Kua lata e tau mena nei ke eke mo tau vala aoga lahi he tau liogi ha tautolu, tuga ne fakakite he liogi fakatai a Iesu, ne kamata aki e tau kupu: “Ha mautolu a Matua na e, ha ha he lagi, kia tapu hau a higoa. Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.”—Mata. 6:9, 10.
13, 14. Ko e heigoa kua fakakite he tau liogi ha tautolu hagaao ki a tautolu?
13 Kua fakakite he tau liogi ha tautolu ke he Atua e tau fatuakiloto, tau manako, mo e tau mena ne finagalo ki ai a tautolu. Iloa e Iehova e tau mena he tau loto ha tautolu. Talahau he Tau Fakatai 17:3: “Kua fai kapiniu ke tunu ai e ario, mo e gutuumu ke tunu ai e auro; ka ko Iehova, kua kamatamata ai e tau loto.” Kua kitia he Atua e tau loto ha tautolu. (1 Samu. 16:7) Iloa e ia e puhala ne logona hifo e tautolu hagaao ke he ha tautolu a tau feleveiaaga, gahua he fonua, mo e tau matakainaga fakaagaaga. Kua mataala a Iehova ke he tau mena ne manamanatu a tautolu ke he “tau matakainaga” he Keriso. (Mata. 25:40) Iloa e ia e manako mooli ha tautolu ke he tau mena ne liogi a tautolu ke moua po kua fatiaki noa ni a tautolu he tau kupu loga. “Ka liogi,” he ui e Iesu, “aua neke pola mau ha mutolu a tau kupu, tuga e tau motu kehe; ha ko e mena piko na lautolu, ko e tau kupu loga ha lautolu ke talia mai ai a lautolu.”—Mata. 6:7.
14 Ko e tau kupu liogi ha tautolu kua fakakite foki e lahi he falanaki ha tautolu ke he Atua. “Kua eke a koe [Iehova] mo taue maku,” he talahau e Tavita, “ko e kolo uka mai ia ia kua fai fi mai. To nofo tukulagi au ke he hāu a fale uta fano ti tua ni au ke he malu he hāu a tau tapakau.” (Sala. 61:3, 4) Kua tuga na ‘fofola atu hana [Atua] fale lā ki luga ia tautolu,’ ti olioli e tautolu e haohao mitaki mo e levekiaga puipui haana. (Fakakite. 7:15, NW) Ko e mafanatia ha ia ke fakatata ki a Iehova he liogi mo e mauokafua kua ‘ha ha ia tautolu’ a ia he tau magaaho kua kamatamata e tua ha tautolu!—Totou Salamo 118:5-9.
15, 16. Liga lagomatai fēfē he liogi a tautolu ke mailoga ko e heigoa e manako ha tautolu ke hokotia ke he tau tuaga kotofa?
15 Ko e tau liogi fakamooli ki a Iehova hagaao ke he tau fatuakiloto ha tautolu ka lagomatai a tautolu ke mailoga e tuaga mooli he tau fatuakiloto. Tuga anei, ko e makai ke fekafekau he kotofaaga leveki he tau tagata he Atua kia ko e manako fakatokolalo mooli ke lagomatai mo e eketaha a tautolu ke taute e mena kua maeke ia tautolu ke fakatupu ki mua e tau mena he Kautu? Po kua manako a tautolu ke “fia mua” po ke loto foki ke ‘pule ke he’ falu? Nakai ko e tau puhala a ia he tau tagata a Iehova. (Totou 3 Ioane 9, 10; Luka 22:24-27.) Ka ha ha ia tautolu e tau manako hehē, ko e liogi fakamooli ki a Iehova ko e Atua ka fakakite e tau hehē ia mo e lagomatai a tautolu ke hiki neke vakavaka hifo e tau mahani ia.
16 Ko e tau hoana Kerisiano ne liga manako lahi ke he tau taane ha lautolu ke eke mo tau fekafekau lagomatai ti liga eke mo tau leveki, po ke tau motua he magaaho fakamui. Maeke he tau matakainaga fifine nei ke gahua fakalataha mo e tau logonaaga ne fakakite e lautolu he tau liogi fakatagata ha lautolu he eketaha ke fakakite e tau mahani mitaki. Kua aoga lahi e mena nei, ha ko e tau kupu mo e tau mahani he magafaoa he tagata taane kua lauia e puhala ne kitia he fakapotopotoaga a ia.
Hukui e Falu ka Liogi he Toloaga
17. Ko e ha kua mitaki e matakavi ogoogonoa ka liogi tokotaha a tautolu?
17 Fa mahani a Iesu ke fano kehe mai he moto tagata ke liogi tokotaha ke he Matua haana. (Mata. 14:13; Luka 5:16; 6:12) Lata foki a tautolu ke moua e matakavi ogoogonoa. He liogi fakatotoka he tau tuaga nakai hohā, kua liga maeke ia tautolu ke taute e tau fifiliaga kua fakafiafia a Iehova mo e tumau e malolō fakaagaaga ha tautolu. Ka e, liogi foki a Iesu he toloaga tagata, ti kua lata ke manamanatu ke he puhala ke taute fakamitaki ai e mena nei.
18. Ko e heigoa falu manatu kua lata he tau matakainaga taane ke tokaloto ka hukui e fakapotopotoaga he liogi he toloaga?
18 He tau feleveiaaga ha tautolu, ne hukui he tau tagata taane fakamooli e fakapotopotoaga ka liogi he toloaga. (1 Timo. 2:8) Kua lata he tau matakainaga Kerisiano ke maeke ke pehē “amene,” kakano, “ti pihia ni” he matahiku he liogi ia. Ka taute pihia, kua lata ia lautolu ke talia e mena ne talahau. Nakai fai mena ofomate po ke fakahanoa e liogi fakatai a Iesu. (Luka 11:2-4) Lafi ki ai, ne nakai talahau fakamatafeiga e ia e tau manako po ke tau lekua he tau tagata takitaha he toloaga haana. Ko e tau tupetupe fakatagata ko e tau matakupu kua lata ma e liogi tokotaha, nakai ke he toloaga. Ti ka eke mo hukui ke liogi ma e matakau, kua lata ke fakamamao a tautolu he talahau e tau mena ne nakai lata ke iloa fakahanoa.
19. Kua lata ke fēfē e mahani ha tautolu ka liogi he toloaga?
19 Ka fai hukui kua liogi ma tautolu he toloaga, kua lata a tautolu ke fakakite e “matakutaku [fakalilifu] ke he Atua.” (1 Pete. 2:17) Liga ha ha i ai e magaaho tonu mo e matakavi ma e falu gahua ka nakai latatonu he feleveiaaga Kerisiano. (Fakama. 3:1) Tuga anei, kua liga lali e taha tagata ke tui lima po ke totō auloa e tau lima ka liogi. Liga fakatupetupe po ke fakatauhele he mena nei e falu, putoia a lautolu ne ahiahi mai ne nakai tatai e taofiaga mo tautolu. Kua liga tui lima fakalotomatala e falu hoa mau, ka e ka tau kuku a laua he liogi auloa, kua liga fakatupetupe he aga ia a lautolu ne kitia ai. Ti liga manatu a lautolu kua hagaaki e hoa ke he fakafetuiaga lotofakavihi ha laua ka e nakai fakalilifu ki a Iehova. Mai he fakalilifu hokulo ki a Ia, “kia eke e [ta]utolu e tau mena oti kana ke fakaheke ai ke he Atua” mo e kalo kehe he aga ka liga fakatauhele, fakaofo, po ke fakatupetupe ha tagata.—1 Kori. 10:31, 32; 2 Kori. 6:3.
Liogi ma e Heigoa?
20. To fakamaama fēfē e koe e Roma 8:26, 27?
20 He falu magaaho, kua liga nakai iloa e tautolu e mena ke talahau he tau liogi ha tautolu takitokotaha. “Ha kua nakai iloa e tautolu e tau mena kua lata ke ole atu ai e tautolu,” he tohi e Paulo, “ka ko e [a]gaga [tapu] ni, kua ole a ia ma tautolu ke he tau oi kua nakai maeke ke fakamatala atu. Ka ko ia [Atua] kua kumi e tau loto, kua fioia e ia po ke heigoa e finagalo he [a]gaga.” (Roma 8:26, 27) Ne loga e liogi ne fakatoka e Iehova ke fakamau hifo he tau Tohiaga Tapu. Talia e ia e tau ole omoomoi nei ko e tau manako kua loto a tautolu ki ai mo e fakamooli ai. Na iloa he Atua a tautolu mo e kakano he tau mena ne fakatupu e ia e agaaga haana ke vagahau puhala he tau tagata tohia Tohi Tapu. Kua tali e Iehova e tau olelalo ha tautolu ka “ole,” po ke hulalo e agaaga ma tautolu. Ka eke ke mahani lahi a tautolu mo e Kupu he Atua, ko e tau mena kua lata ke liogi a tautolu ke moua, ka mafiti ke manatu.
21. Ko e heigoa ka kumikumi a tautolu ki ai he vala tala ka mui mai?
21 He iloa ai e tautolu, kua lahi e mena ne fakakite he tau liogi ha tautolu hagaao ki a tautolu. Tuga anei, kua liga fakakite ai e puhala ne fakatata a tautolu ki a Iehova mo e puhala ne iloa mitaki e tautolu e Kupu haana. (Iako. 4:8) He vala tala ka mui mai, to kumikumi a tautolu ke he falu liogi mo e tau talahauaga he liogi ne fakamau he Tohi Tapu. Ko e heigoa e lauiaaga he kumikumiaga ia ke he tau Tohiaga Tapu ka moua e tautolu he liogi ke he Atua?
To Tali Fēfē e Koe?
• Ko e heigoa e aga kua lata ka liogi a tautolu ki a Iehova?
• Ko e ha kua lata ia tautolu ke liogi ma e tau matakainaga ha tautolu?
• Ko e heigoa he tau liogi ha tautolu ka fakakite hagaao ki a tautolu mo e tau fatuakiloto ha tautolu?
• Kua lata ke fēfē e mahani ha tautolu ka liogi he toloaga?
[Fakatino he lau 4]
Fakaheke mo e fakaaue tumau nakai a koe ki a Iehova?
[Fakatino he lau 6]
Ko e aga ha tautolu ka liogi he toloaga kua lata ke fakalilifu tumau a Iehova