Tokiofa e Tuaga Haau he Fakapotopotoaga

“Kua toka he Atua e tau fahi tino takitaha ke he tino, tuga e finagalo ki ai a ia.”—1 KORI. 12:18.

1, 2. (a) Ko e heigoa ne fakakite kua maeke he tau tagata oti ke fai tuaga ke tokiofa he fakapotopotoaga? (e) Ko e heigoa e tau hūhū ka fakatutala ki ai he vala tala nei?

TALI MAI he tau vahā i tuai a Isaraela, ko e fakapotopotoaga e fakaholoaga ha Iehova ke atihake fakaagaaga e tau tagata haana mo e foaki ki a lautolu e tau takitakiaga. Ma e fakatai, he mole e kautū e tau Isaraela ke he maaga ko Ai, ne “totou ai e [Iosua] e tau kupu oti he fakatufono, ko e monuina mo e malaia; ke lata mo e tau mena oti kua tohia ke he tohi he fakatufono . . . ki mua he fakapotopotoaga oti a Isaraela.”—Iosua 8:34, 35.

² He senetenari fakamua V.N., ne tala age e aposetolo ko Paulo ke he motua Kerisiano ko Timoteo ko e fakapotopotoaga Kerisiano ko e “fale he Atua” mo e “ko e pou foki ia mo e fakaveaga he kupu moli.” (1 Timo. 3:15) Ko e “fale” he Atua he vahā nei ko e tau matakainaga Kerisiano mooli he lalolagi katoa. He veveheaga 12 he tohi omoomoi fakamua ha Paulo ke he tau Korinito, ne fakatatai e ia e fakapotopotoaga ke he tino he tagata. Ne pehē a ia, pete he kehekehe e feua he tau faahi tino takitaha, kua aoga oti ai. “Kua toka he Atua e tau fahi tino takitaha ke he tino, tuga e finagalo ki ai a ia,” he tohi e Paulo. Ne fakakite foki e ia ko e “tau fahi tino kua talahaua e tautolu kua kelea, kua au atu he eke fakamitaki ai.” (1 Kori. 12:18, 23) Ko e mena ia, ko e matagahua he tagata tututonu he fale he Atua kua nakai mitaki atu po ke talahaua kelea ke he taha Kerisiano tua fakamooli. Ka kua kehekehe ai. Maeke fēfē mogoia ia tautolu ke moua e tuaga ha tautolu he fakaholoaga he Atua mo e tokiofa ai? Ko e heigoa e tau vala ka lauia ke he tuaga ha tautolu he fakapotopotoaga? Ti maeke fēfē ia tautolu ke ‘fakakite ke he tau tagata oti e mafiti ha tautolu’?—1 Timo. 4:15.

Tokiofa Fēfē e Tuaga ha Tautolu?

3. Ko e heigoa taha puhala ke moua e tautolu e tuaga he fakapotopotoaga mo e fakakite kua tokiofa ai e tautolu?

³ Taha puhala ke moua e tautolu e tuaga he fakapotopotoaga mo e fakakite kua tokiofa ai e tautolu, he kaufakalataha katoatoa ke he “fekafekau fakamoli mo e loto matala” mo e Kau Fakatufono ne hukui ai. (Totou Mataio 24:45-47.) Lata ia tautolu ke kumikumi e tau tali ha tautolu ke he takitakiaga ne moua e tautolu mai he vahega fekafekau. Ma e fakatai, ke he tau tau loga kua moua e tautolu e tau takitakiaga hakotika ke he tau mena tui mo e tauteuteaga, fakafiafiaaga, mo e fakaaoga hehē he Internet. Omaoma fakamakai nakai a tautolu ke he fakatonuaga mitaki nei ke puipui fakaagaaga ai a tautolu? Ka e kua e tomatomaaga ke fakatoka ke taute tumau e tapuakiaga he magafaoa? Kua tokaloto nakai e tautolu e tomatomaaga ia mo e tuku kehe taha afiafi ma e matagahua ia? Kaeke ko e tau tagata nofo tokotaha a tautolu, kua fakatoka nakai e tautolu e magaaho ke fakaako fakatagata e tau Tohiaga Tapu? To fakamonuina e Iehova a tautolu takitokotaha mo e tau magafaoa, kaeke ke muitua a tautolu ke he takitakiaga he vahega fekafekau.

4. Ko e heigoa kua lata ke manamanatu a tautolu ki ai ka taute e tau fifiliaga?

⁴ Liga talahau he falu ko e tau mena tuga e fakafiafiaaga mo e tau mena tui mo e tauteuteaga ko e fifiliaga ni he tagata. Ka ko e Kerisiano fakamooli ne tokiofa e tuaga haana he fakapotopotoaga, kua nakai lata ke fakavē hokoia e tau fifiliaga ke he tau manako fakatagata. Lata ke manamanatu fakalahi ke he onoonoaga ha Iehova tuga ne fakakite mai he haana Kupu, ko e Tohi Tapu. Kua lata e fekau i loto ke eke mo ‘hulu ke he ha tautolu a tau hui, mo e maama ke he ha tautolu a puhala.’ (Sala. 119:105) Kua pulotu foki a tautolu ke manamanatu ke he puhala he tau fifiliaga ne taute e tautolu nukua lauia ha tautolu a gahua mo e falu tagata foki i loto mo fafo he fakapotopotoaga.—Totou 2 Korinito 6:3, 4.

5. Ko e ha kua lata ia tautolu ke puipui ke he agaaga tūtokotaha?

⁵ “Ko e agaga haia kua gahua ai ni ainei kia lautolu kua faliuliu,” ti holofa lahi ke tuga e matagi ne fafagu e tautolu. (Efeso 2:2) Maeke he agaaga ia ke taute a tautolu ke manamanatu kua nakai lata a tautolu mo e takitakiaga he fakatokatokaaga ha Iehova. Mooli, kua nakai manako a tautolu ke tuga a Tioterefe, ne ‘nakai talia e ia e aposetolo ko Ioane.’ (3 Ioa. 9, 10) Lata ia tautolu ke puipui neke tupu e agaaga tūtokotaha. Ke he tau kupu po ke tau mena taute, kia nakai totoko e tautolu e halavaka he matutakiaga ne fakaaoga e Iehova he vahā nei. (Nume. 16:1-3) Ka kua lata ia tautolu ke tokiofa e kotofaaga ha tautolu ke kaufakalataha mo e vahega fekafekau. Ti nakai kia lata ia tautolu ke eketaha ke omaoma mo e muitua ki a lautolu ne takitaki ha tautolu a fakapotopotoaga?—Totou Heperu 13:7, 17.

6. Ko e ha kua lata ia tautolu ke kumikumi e tau tuaga fakatagata ha tautolu?

⁶ Taha puhala foki ke fakakite kua tokiofa e tautolu e tuaga ha tautolu he fakapotopotoaga, he kumikumi fakalahi ke he tau tuaga fakatagata ha tautolu mo e taute e tau mena oti kua maeke ia tautolu ke ‘nava ke he ha tautolu a feua’ mo e tamai e lilifu ki a Iehova. (Roma 11:13) Maeke e falu ke paionia tumau. Kua gahua e falu ke he tau puhala pauaki he fekafekauaga mau tuga e tau misionare, tau leveki faifano, mo e tau tagata he magafaoa Peteli he lalolagi katoa. Tokologa e matakainaga ne lagomatai ke he talagaaga he tau Fale he Kautu. Ko e laulahi he tau tagata ha Iehova hane taute e tau mena oti ke leveki e tau manako fakaagaaga he tau magafaoa ha lautolu mo e putoia katoatoa ke he fekafekauaga he tau faahi tapu takitaha. (Totou Kolose 3:23, 24.) Maeke ia tautolu ke mauokafua ka foaki fakamakai a tautolu ke he fekafekauaga he Atua ti taute ai e tau mena oti ke fekafekau loto katoa ki a ia, to haia tumau a tautolu ke he tuaga he fakaholoaga haana.

Tau Vala ne Lauia Ai e Tuaga

7. Fakamaama e puhala kua maeke he tau tutūaga ha tautolu ke lauia e tuaga ha tautolu he fakapotopotoaga.

⁷ Kua aoga ke kumikumi hifo e tau tuaga ha tautolu ha ko e falu magaaho, kua fakavē e tuaga ha tautolu he fakapotopotoaga ke he mena kua maeke po ke iloa e tautolu ke taute. Ma e fakatai, kua kehe e matagahua he matakainaga taane he fakapotopotoaga mai he matakainaga fifine. Ko e tau he moui, malolō tino, mo e falu vala foki ne fakaohooho a tautolu ke maeke ke taute he fekafekauaga ha Iehova. “Ko e malolo he tau fuata ko e ha lautolu a fulufuluola haia,” he talahau he Tau Fakatai 20:29, “ko e lilifu foki he tau tagata momotua ko e ulu hina haia.” Kua liga maeke he tau fuata ikiiki he fakapotopotoaga ke lahi e mena ka taute ha ko e malolō he vahā fuata ha lautolu, ka kua aoga lahi a lautolu ne momotua ke he fakapotopotoaga ha ko e pulotu mo e iloilo ha lautolu. Lata foki ia tautolu ke tokaloto ko e tau mena oti ne maeke ia tautolu ke taute he fakatokatokaaga ha Iehova kua fakavē ke he fakaalofa noa he Atua.—Gahua 14:26; Roma 12:6-8.

8. Lahi fēfē e lauiaaga he tau manako ke he tau mena kua taute e tautolu he fakapotopotoaga?

⁸ Kua fakamaama he fakataiaga ke he tau tamafifine tokoua ko e lafu, e taha vala kua lauia e tuaga ha tautolu he fakapotopotoaga. Ne paase tokoua a laua mai he aoga tokoluga. Tatai e tau tutūaga ha laua. Ne taute he tau matua ha laua e tau mena oti ke fakamalolō ki a laua ka mole e paase, ke foli atu ke he gahua paionia tumau. He paase ai, ne taute taha he gahua paionia, ka e kamata taha ke gahua tupe tumau. Ko e heigoa e kehekeheaga? Ko e tau manako. He fakahikuaga, ne igatia a laua mo e taute e tau mena ne manako. Mooli nakai e mena ia ke he tokologa ia tautolu? Lata ia tautolu ke manamanatu fakahokulo ke he mena ka manako a tautolu ke taute he fekafekauaga he Atua. Maeke nakai a tautolu ke fakaholo ki mua e fakalataha ha tautolu ki ai, pete ka lata ke hikihiki e tau tutūaga ha tautolu?—2 Kori. 9:7.

9, 10. Ko e heigoa kua lata ia tautolu ke taute ka nakai ha ha ia tautolu e makutu ke gahua fakalahi ke he fekafekauaga ha Iehova?

⁹ Ka e kua ka nakai ha ha ia tautolu e makutu ke gahua fakalahi ke he fekafekauaga ha Iehova mo e hihiga ke tote ne mena ka taute he fakapotopotoaga? He tohi haana ke he tau Filipi, ne pehē a Paulo: “Ko e Atua ni, kua gahua ki loto ia mutolu ke tupu ai e loto ke he hana finagalo fakaalofa, kia gahua foki ki ai.” E, maeke ia Iehova ke gahuahua ki loto ha tautolu ti lauia ai ha tautolu a finagalo, po ke tau manako.—Filipi 2:13.

¹⁰ Ti nakai kia lata ia tautolu ke ole ki a Iehova ke maeke ia tautolu ke manako ke taute e finagalo haana? Ko e mena ia ni ne taute he Patuiki ko Tavita ha Isaraela i tuai. Ne liogi a ia: “Iehova na e, kia fakailoa mai kia au hāu a tau puhala; kia fakaako mai e koe au ke he hau a tau hala. Kia takitaki e koe au ke he mena moli mai ia koe, mo e fakaako mai kia au, ha ko koe ko e Atua he haku a fakamouiaga; kua tatali au kia koe ke he aho oti.” (Sala. 25:4, 5) Maeke foki ia tautolu ke taute pihia he liogi to fakatupu e Iehova i loto ha tautolu e manako ke fakafiafia a ia. He manamanatu a tautolu ke he puhala ne logona e Iehova ko e Atua mo e Tama haana hagaao ke he tau mena ne taute e tautolu he fekafekau ki a laua, kua puke e tau loto ha tautolu ke he loto fakaaue ma laua. (Mata. 26:6-10; Luka 21:1-4) Maeke he logonaaga ia he loto fakaaue ke omoomoi a tautolu ke ole ki a Iehova ke taute a tautolu ke manako ke mafiti e tupu fakaagaaga. Ne foaki he perofeta ko Isaia e fakataiaga ke he aga kua lata ke feaki e tautolu. He magaaho ne logona e ia e leo ha Iehova ne hūhū: “Ko hai ke fakafano atu e au? ko hai foki ke fano ma mautolu?” ne tali e perofeta: “Ko au hanai, kia fakafano atu e koe au.”—Isaia 6:8.

Kitia Fēfē e Mafiti?

11. (a) Ko e heigoa e manako kua lata ma e tau matakainaga taane ke foli atu ma e tau matagahua he fakatokatokaaga? (e) Maeke fēfē he matakainaga taane ke foli atu ma e kotofaaga he fakapotopotoaga?

¹¹ Ha kua 289,678 e tagata ne papatiso he lalolagi katoa he tau he fekafekauaga he 2008, kua kitia maali e manako lahi ma e tau matakainaga taane ke takitaki. Kua lata fēfē he matakainaga taane ke tali atu ke he manako nei? Mukamuka, he eketaha ke fakalautatai mo e tau mena kua lata ma e tau fekafekau lagomatai mo e tau motua ne fakatoka mai he tau Tohiaga Tapu. (1 Timo. 3:1-10, 12, 13; Tito 1:5-9) Eketaha fēfē e matakainaga taane ke fakalautatai mo e tau poakiaga pihia he Tohiaga Tapu? He makaukau ke he fekafekauaga, he leveki fakamakutu e tau kotofaaga haana he fakapotopotoaga, he gahua malolō ke fakaholo ki mua e aoga he tau tali haana he tau feleveiaaga Kerisiano, mo e he fakakite e fiafia fakatagata ke he tau matakainaga talitonu. Ati fakakite ai kua tokiofa e ia e tuaga haana he fakapotopotoaga.

12. Maeke fēfē he tau fuata ke fakakite e makutu ha lautolu ma e kupu mooli?

¹² Ko e heigoa kua maeke he tau matakainaga taane ikiiki, mua atu ki a lautolu ne fuata mui ke taute ke he fakapotopotoaga? Maeke ia lautolu ke lali fakamakamaka ke tupu ‘ke he pulotu mo e loto matala kua fakalata ke he agaga’ he iloa e tau Tohiaga Tapu. (Kolo. 1:9) He eke mo tau tagata fakaako makutu he Kupu he Atua mo e makaukau ke he tau feleveiaaga he fakapotopotoaga ka lafi mooli ke he mafiti fakaagaaga ia. Maeke foki he tau fuata taane ke gahua fakalahi ke lata ke huhū atu ke he “gutuhala kua lahi [“ne takitaki atu ke he matagahua,” NW]” he tau puhala kehekehe he fekafekauaga mau. (1 Kori. 16:9) He tutuli e matafeua he fekafekauaga ha Iehova ko e puhala fiafia mooli he moui mo e puhala kua fua mai e tau monuina loga.—Totou Fakamatalaaga 12:1.

13, 14. Ko e heigoa e tau puhala kua maeke he tau matakainaga fifine ke fakakite kua tokiofa e lautolu e matagahua ha lautolu he fakapotopotoaga?

¹³ Maeke foki he tau matakainaga fifine ke fakakite kua tokiofa e lautolu ha lautolu a kotofaaga he fai vala ke he fakamooliaga he Salamo 68:11. Totou ai e tautolu: “Kua vagahau mai [a Iehova] ke he kupu; kua lahi e kau [“tau fifine,” NW] ne fakamatala.” Taha he tau puhala aoga lahi kua maeke he tau matakainaga fifine ke fakakite e loto fakaaue ha lautolu ma e tuaga ha lautolu he fakapotopotoaga he fai vala ke he gahua taute tutaki. (Mata. 28:19, 20) Ti ko e putoia katoatoa ke he fekafekauaga mo e he fakamakai ke foaki noa ma e gahua ia, ne fakakite he tau matakainaga fifine kua tokiofa e lautolu e matagahua ha lautolu he fakapotopotoaga.

¹⁴ He tohi ki a Tito, ne pehē a Paulo: “Kia pihia foki e tau fifine motua, kia gali ha lautolu a tau mahani, . . . kia eke mo [tau faiaoga] ke he tau mena mitaki; kia fakaako a lautolu ke he tau tamāfine ke fakaalofa ke he tau tane ha lautolu, kia fakaalofa foki ke he tau fanau ha lautolu. Kia mahani fakalatalata a lautolu mo e nakai matagaoi, kia nonofo kaina, kia mahani mitaki, kia omaoma ke he tau tane ha lautolu, neke eke fakakelea e kupu he Atua.” (Tito 2:3-5) Eke mooli e tau matakainaga fifine motua mo fakaohoohoaga mitaki ke he fakapotopotoaga! He fakalilifu e tau matakainaga taane ne takitaki mo e taute e tau fifiliaga pulotu ke he tau puhala he moui tuga e tau mena tui, tauteuteaga mo e fakafiafiaaga, kua fakatoka e lautolu e fakafifitakiaga mitaki ma e falu ti fakakite e fakalilifu ma e tuaga ni ha lautolu he fakapotopotoaga.

15. Ko e heigoa ka taute he matakainaga fifine nofo tokotaha ke fahia ke he matimati?

¹⁵ Falu magaaho kua liga uka e matakainaga fifine nofo tokotaha ke moua e tuaga haana he fakapotopotoaga. Ne pehē taha matakainaga fifine ne tupu e mena nei ki ai: “Fa mahani e moui nofo tokotaha ke matimati.” He hūhū ki a ia kua fahia fēfē ke he mena ia, ne pehē a ia: “Lagomatai he liogi mo e fakaako au ke liu moua e tuaga haaku. Ne fakaako au hagaao ke he puhala ne kitekite mai a Iehova ki a au. Ti foli atu au ke lagomatai e falu he fakapotopotoaga. Ne lagomatai he mena nei au ke nakai manamanatu ni ki a au.” Hagaao ke he Salamo 32:8, ne tala age a Iehova ki a Tavita: “To fakatonu e au kia koe, mo e kitekite au kia koe.” E, kua fiafia a Iehova ki a lautolu oti ko e tau fekafekau takitaha haana, putoia e tau matakainaga fifine nofo tokotaha, mo e to lagomatai e ia a lautolu oti ke moua e tuaga ha lautolu he fakapotopotoaga.

Taofimau e Tuaga Haau!

16, 17. (a) Ko e ha e talia he uiina ha Iehova ke fai vala he fakatokatokaaga haana ko e fifiliaga mitaki lahi mahaki ka taute e tautolu? (e) Maeke fēfē ia tautolu ke taofimau e tuaga ha tautolu he fakatokatokaaga ha Iehova?

¹⁶ Kua futia fakaalofa e Iehova haana tau fekafekau takitaha ke he fakafetuiaga mo ia. Ne pehē a Iesu: “Nakai maeke ia taha ke hau kia au, ka nakai futia mai he Matua ne fakafano mai au.” (Ioane 6:44) Mai he tau piliona tagata he lalolagi, kua foaki e Iehova ki a tautolu takitaha e uiina ke eke mo vala he fakapotopotoaga haana he vahā nei. He talia e uiina nei ko e fifiliaga mitaki lahi mahaki ne taute e tautolu. Kua foaki ke he tau momoui ha tautolu e amaamanakiaga mo e fai kakano. Ti ko e olioli mo e fiafia ha a ia kua moua e tautolu e tuaga he fakapotopotoaga!

¹⁷ “Iehova na e, kua fiafia na au ke he mena ne tu ai hāu a fale,” he talahau he salamo. Ne lologo foki e ia: “Kua tu haku hui ke he mena molemole; to fakamonu au kia Iehova ki mua he fakapotopotoaga.” (Sala. 26:8, 12) Kua fai tuaga e Atua mooli ma tautolu takitaha he fakatokatokaaga haana. He matutaki ke muitua ke he takitakiaga fakateokarasi mo e fakamakai nakai noa ke he fekafekauaga he Atua, maeke ia tautolu ke taofimau e tuaga uho ha tautolu he fakaholoaga ha Iehova.

Manatu Nakai e Koe?

• Ko e ha kua tonu ke talahau kua fai tuaga e tau Kerisiano oti he fakapotopotoaga?

• Fakakite fēfē e tautolu kua tokiofa e tautolu ha tautolu a tuaga he fakatokatokaaga he Atua?

• Ko e heigoa e tau vala ka lauia ha tautolu a tuaga he fakapotopotoaga?

• Maeke fēfē he tau Kerisiano fuata mo e lalahi ke fakakite kua tokiofa e lautolu e tuaga ha lautolu he fakaholoaga he Atua?

[Tau Fakatino he lau 16]

Maeke fēfē he tau matakainaga taane ke foli atu ke he tau kotofaaga he fakapotopotoaga?

[Fakatino he lau 17]

Maeke fēfē he tau matakainaga fifine ke fakakite kua tokiofa e lautolu e tuaga ha lautolu he fakapotopotoaga?