Fakatata Atu ke he Atua
Manako a Ia ke Kautū a Tautolu
KUA amanaki lahi e tau matua fakaalofa ke kitia e tau fanau ha lautolu kua kautū, ke momoui fai kakano mo e fiafia. Ko Iehova, ko e Matua ha tautolu he lagi, kua manako pihia ke he tau fanau haana he lalolagi ke kautū. He fakakite e levekiaga hofihofi haana, ne tala mai e ia ki a tautolu e puhala ke kautū ai. Ma e fakatai, manamanatu la ke he tau kupu ne vagahau e ia ki a Iosua, ne fakamau ia Iosua 1:6-9.
Manamanatu la ke he fakatino, ne fakakite ke he faahi matau. He mole e mate a Mose, ko Iosua e takitaki foou ha Isaraela ne tokologa lahi mahaki. Ne mautauteute e tau Isaraela ke huhū atu ke he motu ne mavehe he Atua ke he tau tupuna ha lautolu. Tomatoma he Atua a Iosua. Ka muitua ai, to lagomatai ki a ia ke kautū. Ka e nakai ni ko Iosua tokotaha ne aoga mai he fakatonuaga nei. He fakagahua ai, to kautū foki a tautolu.—Roma 15:4.
Ne tala age a Iehova ki a Iosua ke fakamalolo mo e fakamanavalahi—nakai lagataha ka e lagatolu. (Kupu 6, 7, 9) Maaliali ai, to lata mooli a Iosua ke fakamalolo mo e loto toa ke kautū ai he takitaki a Isaraela ke he Motu he Maveheaga. Ka e moua fēfē e ia e tau mahani aoga lahi nei?
Maeke ia Iosua ke moua e fakamalolo mo e loto toa mai he tau kupu tapu. “Kia taofi e koe ke eke ai ke lata mo e fakatufono oti ne poaki atu ai a Mose haku a fekafekau kia koe,” he talahau e Iehova. (Kupu 7) He magaaho ia, ne liga gahoa ni e tohi he Tohi Tapu ne tohia kua moua e Iosua.a Ka ko e moua hokoia ni he Kupu he Atua, to nakai mavehe mai e kautūaga. Ke maeke ke aoga mai i ai, kua lata ke ua e mena ka taute e Iosua.
Fakamua, kua lata ia Iosua ke fakapuke tumau e loto haana ke he kupu he Atua. Pehē a Iehova: “Kia [“totou fakatekiteki,” NW] ai a koe ke he aho katoa mo e po.” (Kupu 8) Taha e tohi ne talahau: “Ne poaki e Atua ki a Iosua ke manatu e Fakatufono Haana he ‘totou kalamukalamu’ ki a ia ni, ‘manamanatu’ ki ai, po ke ‘fakaata fakahokulo’ ai.” Ko e totou mo e manamanatu fakahokulo ke he Kupu he Atua he tau aho takitaha to lagomatai a Iosua ke fehagai mo e tau paleko i mua.
Uaaki, kua lata ia Iosua ke fakagahua e tau mena ne fakaako e ia mai he Kupu he Atua. Ne tala age a Iehova ki a ia: “Kia taofi e koe ke eke ai ke lata mo e tau mena oti kua tohi ai; ti monuina [po ke, kautū], a koe ke he tau puhala oti ke fano ai a koe.” ((Kupu 8) Ko e kautūaga a Iosua kua matutaki mo e taute haana he finagalo he Atua. Fai puhala foki kia? Kua kautū tumau e finagalo he Atua.—Isaia 55:10, 11.
Ne muitua e Iosua e fakatonuaga a Iehova. Ti ko e fua, ne moua e ia e moui ne pukeina mo e fiafia, ko e tagata tapuaki fakamooli ha Iehova.—Iosua 23:14; 24:15.
Manako nakai a koe ke moua e moui fai kakano tuga ha Iosua? Manako a Iehova ke kautū a koe. Ka e nakai ni ko e moua hokoia he Kupu haana, ko e Tohi Tapu. Ko e taha Kerisiano kua leva e mahani fakamooli, ne fakakite: “Kia taaki mai e manatu he Tohi Tapu, ti tuku ai ke he loto haau.” Kaeke ke fakapuke tumau e koe e loto haau aki e kupu he Atua mo e fakagahua ke he moui haau e tau mena ne fakaako e koe, ‘to kautū a koe ke he tau puhala oti,’ tuga a Iosua.
[Matahui Tala]
a Ko e tau kupu omoomoi ne moua e Iosua ne liga putoia e tau tohi lima ha Mose (Kenese, Esoto, Levitika, Numera, mo Teutaronome), ko e tohi a Iopu, mo e taha po ke ua e salamo.