Nakai Tiaki e Ieremia

KUA fakalolelole nakai a koe ti logona hifo e manako ke tiaki?—a Tokologa ne pihia. Na pihia foki e fuata ko Ieremia. Ka e nakai toka e ia e tau mena ne talahau po ke taute he falu ke mahala ai a ia. Kia tutala la hagaao ke he puhala ne uho pauaki a Ieremia ke he Atua, ka e logona hifo e ia e manako ke tiaki.

Ato fanau a Ieremia, ne fifili he Atua mooli ko Iehova a ia ke eke mo perofeta ke hataki e tau tagata, ko lautolu ne nakai fakafiafia e Atua. Iloa nakai e koe e mena ne tala age e Ieremia ki a Iehova he tau tau fakamui?— “Nakai iloa e au ke vagahau, ha ko e tama tote au.”

Kua tali fēfē e Iehova a Ieremia he manatu e koe?— He puhala totonu ka e mauokafua, pehē a ia: “Aua neke pehe mai a koe, Ko e tama tote au; ha ko e mena fano ni a koe kia lautolu oti ke fakafano atu e au a koe ki ai, ko e tau mena oti foki ke poaki atu e au kia koe to vagahau atu ai e koe. Aua neke matakutaku.” Ko e ha? “Ha ko e mena laveaki e au a koe,” he talahau e Iehova.—Ieremia 1:4-8.

Tuga agaia ni he totoku fakamua, ne fakalolelole a Ieremia he mogo fakamui. Ha kua vā ai ki a ia he fekafekau ke he Atua. “Kua eke au mo mena ke feki ai ke he aho oti, kua va e tau tagata oti kia au,” he talahau e ia. Ti fifili a ia ke tiaki. “Nakai talahau e au a [Iehova], ti nakai vagahau foki e au ke he hana higoa,” he ui e ia. Ka e tiaki mooli kia e ia?

“Ke he haku loto,” he ui e Ieremia, ‘kua eke e kupu a Iehova tuga ne mena ha i ai ke he haku loto e afi kaka kua puipui ai ke he haku a tau hui motua, ti oti e manava haku he fakauka.’ (Ieremia 20:7-9) Pete he matakutaku a Ieremia he falu magaaho, ko e fakaalofa haana ki a Iehova ati nakai tiaki e ia. Kitekite la ke he puhala ne puipui a Ieremia ha kua nakai tiaki e ia.

Ne tala age e Iehova ki a Ieremia ke hataki e tau tagata to moumou a Ierusalema ka nakai hiki e tau puhala kelea ha lautolu. He tala age e Ieremia e hatakiaga ia, ne ita e tau tagata ti pehē: “Kua lata ke mate e tagata nai.” Ka e olelalo a Ieremia ki a lautolu ke ‘fanogonogo ke he leo a Iehova.’ Ti pehē a ia: ‘Kia iloa e mutolu kaeke ke kelipopo e mutolu au, kua tamate e mutolu e tagata nakai hala, ha ko e mena fakafano mai e Iehova au ke fakamatala atu kia mutolu.’ Iloa nakai e koe e mena ne tupu mogoia?—

Pehē e Tohi Tapu: “Ti pehe age e tau iki mo e motu oti, ke he tau ekepoa mo e tau perofeta, Nakai lata ke mate e tagata nai, ha kua vagahau mai a ia kia tautolu ke he higoa a Iehova ha tautolu a Atua.” Ko e magaaho ne nakai toka e Ieremia e matakutaku ke fakatupu a ia ke tiaki ai, kua puipui e Iehova a ia. Kitekite la mogonei ke he mena ne tupu ki a Uria, ko e taha perofeta ha Iehova, ne kehe lahi e mena ne taute.

‘Ne perofeta mai a Uria ke he tau mena kelea ke hohoko ki Ierusalema tuga ne tau kupu oti a Ieremia’ he talahau he Tohi Tapu. Ka ko e magaaho ne ita e Patuiki ko Iehoakima ki a Uria, iloa nakai e koe mena ne taute e Uria?— Ne matakutaku a ia, ti tiaki e finagalo he Atua mo e hola ki Aikupito. Ti fakafano atu he patuiki e tau tagata taane ke kumi a ia ti liuaki mai ai a ia. He liuaki mai a ia, iloa nakai e koe e mena ne taute he patuiki kelea?Ne keli e ia a Uria ke he pelu!—Ieremia 26:8-24.

Ko e ha ne puipui e Iehova a Ieremia ka e nakai puipui a Uria, he talahau e koe?— Liga na matakutaku foki a Ieremia tuga a Uria, ka e nakai tiaki e Ieremia e fekafekau ki a Iehova mo e hola ai. Ne nakai tiaki e ia. Ko e heigoa e fakaakoaga ka fakaako e tautolu mai he fakafifitakiaga ha Ieremia, he talahau e koe?—He falu magaaho to uka ia tautolu ke taute e tau mena ne talahau he Atua, ka kua lata ia tautolu ke falanaki tumau mo e omaoma ki a Ia.