Kia Fakamafana e Fakapotopotoaga
“Kia fetomaaki a mutolu, mo e fefakamafanaki a mutolu.”—1 TESA. 5:11.
1. Ko e heigoa e tau monuina he ha ha he fakapotopotoaga Kerisiano, ka ko e heigoa e tau lekua ne haia agaia i ai?
KO E monuina lahi mooli ke eke mo taha he fakapotopotoaga Kerisiano. Ha ha ia koe e fakafetuiaga mitaki mo Iehova. Ko e falanaki haau ke he Kupu he Atua e takitakiaga kua puipui a koe mai he tau fua kelea he puhala moui nakai faka-Kerisiano. Kua takatakai a koe he tau kapitiga mooli ne manako ke kautū a koe. E, loga e tau monuina. Ka ko e laulahi he tau Kerisiano kua taufetului ke he tau lekua kehekehe. Liga lata e falu ia lautolu ke lagomatai ke maama e tau mena hokulo lahi ke he Kupu he Atua. Falu kua gagao po ke fakaatukehe, po ke liga matematekelea a lautolu ha ko e tau fua he tau fifiliaga nakai iloilo. Ti momoui a tautolu oti he lalolagi nakai mahani Atua.
2. Kua lata ke tali atu fēfē a tautolu ke he tau tuaga uka he tau matakainaga ha tautolu, ti ko e ha?
2 Nakai fai ia tautolu ne manako ke kitia e tau matakainaga Kerisiano ha tautolu hane matematekelea po ke taufetului. Ne fakatatai he aposetolo ko Paulo e fakapotopotoaga ke he tino ti pehē “kaeke foki ke mamahi e taha fahi tino, ti mamahi fakalataha ai e tau fahi tino oti.” (1 Kori. 12:12, 26) He tau tuaga pihia, kua lata ia tautolu ke eketaha ke lalago e tau matakainaga ha tautolu. Loga e tala faka-Tohiaga Tapu ne lagomatai he tau tagata he fakapotopotoaga e falu ke kautū mo e fahia mai he tau paleko. He fakatutala a tautolu mogonei ke he tau tala ia, manamanatu ke he puhala ka foaki e koe e lagomatai ke he tau puhala pihia kua fakamaama. Lagomatai fakaagaaga fēfē e koe e tau matakainaga haau ti atihake e fakapotopotoaga a Iehova?
“Ati Takitaki Age Ai e Laua a Ia”
3, 4. He puhala fe ne lagomatai e Akula mo Pisila a Apolo?
3 He nofo a Apolo i Efeso, ne fitā a ia he eke mo tagata fakamatala makutu. Ti “kua malolo foki hana loto,” he talahau he tala ia Gahua, “kua vagahau atu ai a ia, mo e fakaako fakamakutu atu a ia ke he tau kupu he Iki, ko e papatisoaga a Ioane hokoia ne iloa e ia.” Ha kua nakai iloa e Apolo e papatisoaga “ke he higoa he Matua, mo e Tama, mo e [a]gaga [t]apu” liga kakano kua fakamatala ki a ia e tau tutaki ha Ioane Papatiso po ke tau tutaki ha Iesu ato hoko ke he Penetekoso 33 V.N. Pete kua makutu a Apolo, ka e fai matakupu aoga agaia ne nakai maama e ia. Lagomatai fēfē he feoakiaga mo e tau matakainaga kua tua a ia?—Gahua 1:4, 5; 18:25; Mata. 28:19.
4 Ko e hoa Kerisiano ko Akula mo Pisila ne logona a Apolo he vagahau fakamalolo he sunako, ti uta a ia mo laua, mo e fakaako fakalahi atu a ia. (Totou Gahua 18:24-26.) Ko e mena mitaki lahi mahaki anei ne taute. Mooli, kua tutala fakamitaki mo e ke he puhala lagomatai a Akula mo Pisila ki a Apolo, he nakai taute a ia ke logona kua tuhituhi ki a ia. Ko e mena ne tupu ko e nakai iloa e ia e fakamauaga tuai he fakapotopotoaga Kerisiano fakamua atu. Kua loto fakaaue mooli a Apolo ke he tau hoa foou haana he tala age e tau vala tala aoga lahi nei ki a ia. He iloa e vala tala nei, kua “lagomatai fakalahi” e Apolo e tau matakainaga haana i Akaia mo e fakamatala fakamalolo ai.—Gahua 18:27, 28.
5. Ko e heigoa e lagomatai fakaalofa kua foaki he tokologa he tau tagata fakailoa he Kautu, mo e ko e heigoa e fua?
5 Tokologa he fakapotopotoaga Kerisiano he vahā nei kua loto fakaaue lahi ke he tau matakainaga ne lagomatai a lautolu ke maama e Tohi Tapu. Loga e kapitiga uho ne tamata he tau tagata fakaako mo e tau faiaoga ha lautolu. Laulahi ai, ko e lagomatai e tau tagata ke maama e kupu mooli kua lata ke taute e fakaholoaga tumau he tau fakatutalaaga mo lautolu ke he loga e tau mahina. Pete ia, kua makai e tau tagata fakailoa he Kautu ke taute e tau foakiaga ia ha kua mailoga e lautolu e mena ne putoia ke he moui mo e mate. (Ioane 17:3) Ko e fiafia mooli ke kitia e tau tagata ne maama e kupu mooli, moui fakatatau ki ai, mo e fakaaoga e tau momoui ha lautolu ke taute e finagalo a Iehova!
“Talahaua a Ia he Tau Matakainaga”
6, 7. (a) Ko e ha ne fifili e Paulo a Timoteo ke eke mo hoa faifano? (e) Ko e heigoa ne lagomatai a Timoteo ke tupu ki mua?
6 He ahiahi atu e aposetolo ko Paulo mo Sila ki Luseta he fenoga misionare ke uaaki, ne feleveia a laua mo e fuata ne higoa ko Timoteo, liga kua 20 e tau he moui haana. “Kua talahaua a ia he tau matakainaga i Luseta mo Ikonio.” Ko Eunike, ko e matua fifine ha Timoteo, mo e ko Loi, ko e tupuna fifine haana ko e tau Kerisiano tukulele a laua, ka ko e matua taane haana ne nakai tua. (2 Timo. 1:5) Liga mahani a Paulo mo e magafaoa nei he ahiahi atu fakamua haana ke he matakavi he tau tau fakamua atu. Ka e fakakite pauaki mogonei he aposetolo e fiafia ki a Timoteo ha kua tuga kua kehe lahi e fuata taane nei. Ti ko e taliaaga he kau he tau motua he fakapotopotoaga, ne eke a Timoteo mo lagomatai ke he gahua misionare mo Paulo.—Totou Gahua 16:1-3.
7 Lahi mahaki e mena ne ako mai e Timoteo he hoa motua haana. Ka e holo ki mua a ia ti nakai leva, ne mauokafua a Paulo ke fakafano atu a Timoteo ke ahiahi e tau fakapotopotoaga mo e eke mo hukui haana. Kavi ke he 15 e tau ne olioli e Timoteo e feoakiaga ha Paulo, ko e fuata taane nakai la magamaga e manamanatuaga ti liga mahani mā, ne tupu ki mua ke hokotia ke eke mo leveki mitaki lahi mahaki.—Filipi 2:19-22; 1 Timo. 1:3.
8, 9. Ko e heigoa ka taute he tau tagata he fakapotopotoaga ke fakamalolō e tau fuata? Talahau e fakataiaga.
8 Tokologa he tau tagata taane mo e tau fifine fuata he fakapotopotoaga Kerisiano he vahā nei kua aoga lahi. Ka fakamalolō mo e feaki he tau hoa manamanatu fakaagaaga, to maeke he tau fuata nei ke foli atu mo e talia e tau matagahua lalahi he tau tagata a Iehova. Onoono viko ke he fakapotopotoaga ha mutolu! Kitia nakai e koe kua fai tama fuata ka foaki e lautolu a lautolu tuga ne taute e Timoteo? Mo e haau a lagomatai mo e fakamalolōaga, liga eke a lautolu mo tau paionia, tau tagata he Peteli, tau misionare, po ke tau leveki faifano. Ko e heigoa haau ka taute ke lagomatai a lautolu ke hokotia ke he tau foliaga ia?
9 Ko Martin, ko e tagata he magafaoa Peteli ke 20 e tau ne manatu mo e fakaaue ke he fiafia he leveki takaiaga ki a ia he 30 e tau kua mole he gahua tokoua he fonua. Ne tutala fakamakai e leveki hagaao ke he gahua haana he Peteli he mogo ne fuata a ia. Fakamafana e ia a Martin ke manamanatu ke fakaatā a ia ke gahua he fakatokatokaaga a Iehova he puhala taha nei. Ne logona hifo e Martin e uho lahi he fakatutalaaga nei nukua lauia e tau fifiliaga ne taute e ia he mogo fakamui. Ko hai ne iloa e mitaki ka taute e koe ma e tau kapitiga ikiiki he tutala mo lautolu hagaao ke he tau foliaga fakaagaaga?
“Fakamafana a Lautolu kua Manava Tote”
10. Fēfē e logonaaga ha Epaferoti, ti ko e ha?
10 Ne loa mo e mategūgū e fenoga a Epaferoti mai i Filipi ki Roma ke ahiahi e aposetolo ko Paulo ne nofo he fale puipui ha ko e tua haana. Ko e tagata fano fenoga nei kua eke mo hukui he tau tagata Filipi. Nakai ni uta e ia e tau mena fakaalofa ha lautolu ke he aposetolo ka e pulega foki a ia ke nofo mo ia ke taute e tau mena ke lagomatai a Paulo he tuaga uka haana. He haia i Roma, ne gagao a Epaferoti ti “fetamakina kua mate.” He manatu kua kaumahala a ia ke he kotofaaga haana, ne fakaatukehe a Epaferoti.—Filipi 2:25-27.
11. (a) Ko e ha kua nakai lata ia tautolu ke ofo ka fai he fakapotopotoaga kua fakaatukehe? (e) Ko e heigoa ne fakamalolō e Paulo ke lata mo e mena ne tupu ki a Epaferoti?
11 Fakatupu he tau peehiaga kehekehe e tau tagata ke matematekelea mai he fakaatukehe he vahā nei. Ko e tau numera mai he World Health Organization ne talahau e tokologa ke he 1 mai he 5 e puke tagata ne liga matematekelea mai he fakaatukehe he taha magaaho he tau momoui ha lautolu. Nakai hao e tau tagata a Iehova mai he fakaatukehe. Ko e tau lekua he levekiaga he magafaoa, gagao e tino, fakaloleloleaga he tau kaumahala he tagata ni, po ke tau mena ne liga lafi ke he tau logonaaga matematekelea. Ko e heigoa ka taute he tau tagata Filipi ke lagomatai a Epaferoti? Ne tohi e Paulo: “Kia talia e mutolu a ia ke he Iki mo e fiafia oti ni; kia fakahelehele foki e mutolu a lautolu kua pihia. Ha ko e mena, fetamakina kua mate a ia ha ko e gahua a Keriso, kua nakai kuku e ia hana moui, kia fakakatoatoa e ia e tau mena ne toe ke he ha mutolu a fekafekau mai kia au.”—Filipi 2:29, 30.
12. Ko e heigoa e punaaga he fakamafanaaga ki a lautolu ne fakaatukehe?
12 Kua lata foki ia tautolu ke fakamalolō e tau matakainaga kua fakalolelole po ke fakaatukehe. Loga mooli e tau mena atihake ka talahau e tautolu hagaao ke he fekafekauaga ha lautolu ki a Iehova. Liga taute e lautolu e tau hikihikiaga lalahi he tau momoui ha lautolu ke maeke ke eke mo tau Kerisiano po ke fekafekau he gahua mau. Loto fakaaue a tautolu ke he tau laliaga ia, ti fakamafana e tautolu a lautolu kua loto fakaaue foki a Iehova. Ka taofi he fuakau po ke tino gagao e falu ia lautolu ne tua fakamooli he taute e tau mena ne taute e lautolu he taha magahala, kua moua e lautolu e fakalilifu ha tautolu ma e tau tau loga ha lautolu ke he fekafekauaga. Ko e heigoa ni e mena ne tupu, ne fakatonu e Iehova ke he tau fekafekau fakamooli oti haana: “Kia fakamafana a lautolu kua manava tote, kia lagomatai kia lautolu kua lolelole, kia fakauka ke he tau tagata oti kana.”—1 Tesa. 5:14.
‘Fakamagalo Totonu Atu mo e Fakamafana Atu ke he Tagata Na’
13, 14. (a) Ko e heigoa e hagahaga kelea lahi mahaki ne taute he fakapotopotoaga Korinito, ti ko e ha? (e) Ko e heigoa e lauiaaga he tuku ki tua mai he fakapotopotoaga?
13 Ne fehagai e fakapotopotoaga Korinito he senetenari fakamua mo e tuaga he tagata ne nakai fakatokihala ke he mahani feuaki. Ne fakatauhele he mahani haana e meā he fakapotopotoaga ti fakalialia foki ke he tau tagata nakai tua. Ati hataki fakahako e Paulo e tagata ia ke tuku kehe mai he fakapotopotoaga.—1 Kori. 5:1, 7, 11-13.
14 Lauia mitaki e akonaki ia. Ne puipui e fakapotopotoaga mai he fakaohoohoaga hehē, ti matala e manamanatuaga he tagata agahala mo e ke fakatokihala mooli a ia. He fakavēaga ke he tau gahua he tagata ke lata mo e fakatokihala, ne fakakite e Paulo he tohi ke uaaki haana ke he fakapotopotoaga kua lata e tagata ke fakaatā ke liu mai. Ka e nakai kuenaia he mena kua lata ke taute. Hataki foki e Paulo e fakapotopotoaga ke ‘fakamagalo atu mo e fakamafana totonu atu [ke he tagata agahala ne fakatokihala], neke mahala a ia ke he momoko haana kua lahi ue atu.’—Totou 2 Korinito 2:5-8.
15. Lata ke onoono fēfē a tautolu ke he tau tagata mahani kelea ne fakatokihala ti kua fakaatā ke liliu mai ke he fakapotopotoaga?
15 Ko e heigoa ne fakaako e tautolu mai he tala nei? Ko e mena momoko ki a tautolu ka tuku ki tua mai he fakapotopotoaga e tau tagata. Liga ekefakakelea e lautolu e higoa he Atua mo e totoku fakalialia e fakapotopotoaga. Liga agahala foki a lautolu ki a tautolu takitokotaha. Ka e, ka fifili e tau motua ke kumikumi e mena ne tupu, fakatatau mo e takitakiaga a Iehova, ti kua lata e tagata ne fakatokihala ke liu fakaatā mai ke he fakapotopotoaga, ne fakakite he mena nei kua fakamagalo e Iehova a ia. (Mata. 18:17-20) Nakai kia eketaha a tautolu ke fifitaki a Ia? Mooli, ka favale mo e nakai fakamagalo to tuga ke totoko a Iehova. Ke maeke ke lafi ke he mafola mo e kaufakalataha he fakapotopotoaga he Atua mo e moua e taliaaga a Iehova, nakai kia lata ia tautolu ke “fakamau ha [ta]utolu a fakaalofa” ke he tau tagata agahala ne tokihala mooli mo e fakaatā ke liliu mai?—Mata. 6:14, 15; Luka 5:7.
“Kua Aoga a Ia kia Au”
16. Ko e ha ne ita a Paulo ki a Mareko?
16 Ko e taha tala he Tohi Tapu kua fakakite ki a tautolu e nakai lata ke fakafualoto ki a lautolu ne fakaita a tautolu. Ma e fakatai, ko Ioane Mareko ne fakaita lahi mahaki e aposetolo ko Paulo. Fēfē? He kamata e fenoga misionare fakamua ha Paulo mo Panapa, ne fano foki a Mareko ke lagomatai a laua. Ka e fai magaaho he fenoga ha lautolu ti nakai iloa mitaki e kakano, ne toka e Ioane Mareko e tau hoa haana ti liu ki kaina. Ne ita lahi a Paulo ha ko e fifiliaga nei ha kua pulega tuai ke lata mo e fenoga ke uaaki, ne taufetoko a ia mo Panapa po kua lata a Mareko ke matutaki atu e fenoga mo laua. He mailoga e mena ne tupu ke he fenoga fakamua, ne nakai loto a Paulo ke fenoga a Mareko mo laua.—Totou Gahua 13:1-5, 13; 15:37, 38.
17, 18. Iloa fēfē e tautolu na fakamafola e taufetoko ha Paulo mo Mareko, ti ko e heigoa ka fakaako e tautolu mai he mena nei?
17 Maaliali ai, ne nakai fakaatā e Mareko a ia ke fakalolelole lahi mahaki ha kua nakai talia e Paulo, ti matutaki e gahua misionare haana he matakavi kehe fakalataha mo Panapa. (Gahua 15:39) Ne fakakite he mena ia e tua fakamooli mo e mauokafua haana ke he mena ne tohi e Paulo hagaao ki a ia he tau tau fakamui. Ko Paulo mogonei he fale puipui i Roma, ne fakaako ki a Timoteo puhala he tau tohi. He tohi taha ia, ne pehē a Paulo: “Kia o mai a mua mo Mareko; ha kua aoga a ia kia au ke he gahua.” (2 Timo. 4:11) E, kua holo ki mua a Mareko mogonei ke he kitiaaga ha Paulo.
18 Ha ha i ai e fakatonuaga ke fakaako mai he mena nei. Ne feaki e Mareko e tau mahani he misionare mitaki. Nakai tupetupe a ia he nakai talia e Paulo he magaaho fakamua. Ko Mareko mo Paulo ko e tau tagata taane fakaagaaga, ti nakai faitaua tukulagi a laua. Mamao ligo ai, ne mailoga e Paulo he mogo fakamui ko e lagomatai mitaki a Mareko. Ti ka kautū e tau matakainaga taane he tau tuaga uka mo e tau lekua fakamua, ko e mena hako ke taute ko e matutaki atu mo e fakatumau ke lagomatai e falu ke tupu ki mua fakaagaaga. Kua fakamafana e fakapotopotoaga ha ko e mahani mitaki.
Ko e Fakapotopotoaga mo Koe
19. Ko e heigoa e lagomataiaga ka foaki he tau tagata oti he fakapotopotoaga Kerisiano ke he taha mo e taha?
19 He “tau aho fakamui [nei] to hohoko mai ai e tau aho uka,” kua lata a koe mo e lagomatai he haau a tau matakainaga he fakapotopotoaga, ti manako foki a lautolu ke he haau. (2 Timo. 3:1) Liga nakai iloa tumau he tau Kerisiano takitaha e puhala ke taute ke kautū ke he tau tuaga kua fehagai mo lautolu, ka ko Iehova ni ne iloa. Ti maeke a Ia ke fakaaoga e tau tagata kehekehe he fakapotopotoaga—putoia a koe—ke lagomatai e falu ke mumui he puhala hako. (Isaia 30:20, 21; 32:1, 2) Ti ko e mena ia, kia tokaloto e tomatoma he aposetolo ko Paulo! Kia “fetomaaki a mutolu, mo e fefakamafanaki a mutolu, tuga foki he eke e mutolu.”—1 Tesa. 5:11.
To Tali Fēfē e Koe?
• Ko e ha kua lata ke fakamafana e falu he fakapotopotoaga Kerisiano?
• Ko e heigoa e tau tuaga uka ka lagomatai e koe e falu ke kautū mai ai?
• Ko e ha kua lata ke moua e tautolu e lagomatai he falu he fakapotopotoaga ha tautolu?
[Fakatino he lau 11]
Ka taufetului e matakainaga Kerisiano mo e tuaga uka, maeke ia tautolu ke lagomatai
[Fakatino he lau 12]
Tokologa e fuata he fakapotopotoaga Kerisiano he vahā nei kua aoga lahi