Kakano ne Nakai Fakatepetepe a Iesu

NUKUA iloa e Iesu kua gagao lahi e kapitiga uho haana ko Lasalo. Ne ta atu he tagata uta fekau ki a Iesu e ogo ha Maria mo Mareta, ko e lafu mahakitaga ha Lasalo. Hau ai e tagata uta fekau i Petania ne nonofo ai a Lasalo mo e lafu mahakitaga haana. Talitonu ai e lafu mahakitaga to fakamalolō e Iesu e tugaane ha laua, pete he nonofo mamao a lautolu he faahi atu he Vailele ko Ioritana. Ne iloa e laua na fakamalolō e Iesu e tau tagata ne nonofo mamao.—Mataio 8:5-13; Ioane 11:1-3.

Magaaho ne hoko atu e tagata uta fekau ki a Iesu mo e tala age e ogo momoko, ne nakai fai mena a Iesu ne taute ki ai. Pehē e Tohi Tapu: “Ati nofo mau ai a ia ke he ua e aho ke he mena ne nofo ai.” (Ioane 11:6) Iloa nakai e koe ko e ha ne nakai fakatepetepe a Iesu ke lagomatai a Lasalo?—a Fakatutala la a tautolu ke he mena nei.

Ne iloa e Iesu kua mate a Lasalo mai he gagao haana. Ko e mena ia, ne tala age a ia ke he tau aposetolo haana: “Kia liliu a a tautolu ki Iutaia.” Ne totoko e lautolu: “Ko e aho tuai nai ne kolo e tau tagata Iutaia ke tauliti a koe, to liu haele atu kia a koe ki ai?” Fakamaama e Iesu: “Kua mohe tuai ha tautolu a kapitiga ko Lasalo; ka e fano au ke fafagu a ia.”

“Ko e Iki na e, kaeke kua mohe a ia,” he tali he tau aposetolo, “to moui ni.” Fakamaama e Iesu mogonei: “Kua mate tuai a Lasalo.” Ati talahau e ia e mena ne liga fakaofo a lautolu: “Kua fiafia foki au ha ko mutolu, he nakai ha i ai au . . . ka e o a a tautolu kia ia.”

Ne vagahau fakamalolō a Toma: ‘Ati o foki a a tautolu, kia mamate ai a tautolu fakalataha mo Iesu.’ Iloa e Toma to liu e tau fī ke lali ke tamate a Iesu, ti liga to tamate foki e tau aposetolo. Ka kua o oti ni a lautolu. Kau ko e ua e aho he mole, ne hohoko a lautolu ki Petania, ko e maaga ha Lasalo. Kavi ke he hogofulu ma lima e tau satatio [po ke, tolu e kilomita] he mamao mo Ierusalema.—Ioane 11:7-18.

Iloa nakai e koe e kakano ne fiafia a Iesu he nakai hoko atu tuai a ia?— Na fakaliu tu mai e Iesu falu tagata he magaaho fakamua, ka ko lautolu ia ne nakaila leva ia e mamate he magaaho ne liu a Iesu fakamomoui. (Luka 7:11-17, 22; 8:49-56) Ka ko e tino ha Lasalo kua fai aho tuai i loto he tukuaga. Nakai fai tagata ne fakauaua kua mate mooli a ia!

Magaaho ne logona he mahakitaga ha Lasalo ko Mareta kua tata age a Iesu ki Petania, ne poi atu a ia ke fonofono a Iesu. “Ko e Iki na e, ane nofo a koe i hinai, po kua nakai mate haku tugane,” he ui e ia. “To tu mai ni hau a tugane,” he fakamafana e Iesu ki a ia. Ne poi atu a Mareta mo e ui fakatekiteki ke he haana matakainaga, ko Maria: “Kua hau tuai e akoako, kua ui mai kia koe.”

Ne fina atu agataha a Maria ki a Iesu. Manatu e moto tagata kua fina atu a ia ke he tukuaga, ti mumui atu a lautolu. Magaaho ne kitia e Iesu a Maria mo e tau tagata i ai hane tagi hake, ti “tagi” foki a Iesu. Nakai leva ati hohoko atu oti a lautolu ke he tukuaga ne pupuni aki e maka lahi. Ti poaki a Iesu: “Uta kehe atu ā e maka.” Ka e nakai talia e Mareta he pehē: “Ko e Iki na e, kua elo tuai a ia, nukua po fa tuai a ia.”

Ne omaoma e tau tagata ki a Iesu ti utakehe e maka. Ne fakaaue a ia he liogi tuai ke he Atua he iloa e ia to foaki he Atua e malolō ki a ia ke fakaliu tu mai a Lasalo. Ati ui atu a Iesu “mo e leo lahi, Lasalo na e, ati hau a ki fafo.” Ne hau a Lasalo ki fafo, kua “lili gaia.” Ti poaki e Iesu: “Vevete e mutolu a ia, ti tuku atu a ia ke fano.”—Ioane 11:19-44.

Maama nakai ia koe mogonei e kakano ne nakai fakatepetepe a Iesu?— Ne iloa e ia ko e fakatali to fakamatala fakamitaki a ia hagaao ke he haana Matua, ko Iehova. Ha kua fifili e ia e magaaho ne mua atu e mitaki, tokologa ne tua ke he Atua. (Ioane 11:45) Maeke nakai ia koe ke kitia e mena ka fakaako e tautolu mai he fakafifitakiaga ha Iesu?—

Maeke foki ia koe ke fifili e magaaho mitaki ke fakamatala hagaao ke he tau mena homo ue atu ne taute mo e nakaila taute he Atua. Liga maeke ia koe ke tutala ke he tau kapitiga he aoga po ke tau faiaoga haau hagaao ke he tau mena ia. He haia foki he poko aoga, falu fuata ne fakaaoga e magaaho ke talahau hagaao ke he tau monuina mua ue atu ka tamai he Kautu he Atua ke he tau tagata. Mooli, kua nakai maeke ia koe ke fakaliu tu mai a lautolu ne mamate, ka e maeke ia koe ke lagomatai e falu ke o mai ke iloa e Atua kua maeke mo e ka liu fakamomoui e tau fakahele ha tautolu ne mamate.