Tau Fuata Ikiiki—Kia Takitaki he Kupu he Atua
“Kia moua e koe e iloilo, ti moua e koe e pulotu.”—FAKATAI 4:5.
1, 2. (a) Ko e heigoa ne lagomatai e aposetolo ko Paulo ke fahia ke he tau taufetului i loto haana? (e) Maeke fēfē a koe ke moua e iloilo mo e pulotu?
“KA LOTO au ke he mena mitaki ke eke, ti ha ha ia au e kelea.” Iloa nakai e koe ko hai ne talahau e tau kupu ia? Ko ia ko e aposetolo ko Paulo. Pete he fakaalofa a Paulo ki a Iehova, fa fai magaaho ne taufetului a ia ke taute e mena mitaki. Fēfē e logonaaga haana ke he taufetului i loto haana? “Oi te, ko e tagata malaia au!” he tohi e ia. (Roma 7:21-24) Logona pihia nakai e koe tuga a Paulo? Uka nakai ia koe falu magaaho ke taute e mena mitaki? Taute kia he mena ia a koe ke hogohogo manava tuga a Paulo? Ka pihia, ua fakalolelole. Ne kautū a Paulo he fehagai mo e tau paleko ne feleveia mo ia, ti maeke foki ia koe.
2 Ne kautū a Paulo ha kua fakaatā e ia a ia ke takitaki he “tau kupu tonu.” (2 Timo. 1:13, 14) Ti ko e fua, ne moua e ia e iloilo mo e pulotu, po ke, maama ne lata ke fahia ke he tau paleko mo e ke taute e tau fifiliaga mitaki. Maeke ia Iehova ko e Atua ke lagomatai a koe ke moua e iloilo mo e pulotu. (Fakatai 4:5) Kua foaki e ia e fakatonuaga mua ue atu he haana a Kupu ko e Tohi Tapu. (Totou 2 Timoteo 3:16, 17.) Manamanatu ke he puhala ka aoga a koe mai he tau matapatu fakaakoaga he tau Tohiaga Tapu ka fehagai mo e tau matua haau, ka fakaaoga e tupe, mo e ka nakai fai tagata mo koe.
Takitaki he Kupu he Atua e Magafaoa
3, 4. Ko e ha kua liga paleko ki a koe ke omaoma ke he tau matafakatufono he tau matua haau, ka ko e ha ne taute he tau matua e tau matafakatufono?
3 Ko e paleko nakai ki a koe ke ha ha i lalo he tau matafakatufono he tau matua haau? Ko e ha ne liga logona pihia a koe? Taha kakano kua liga manako a koe ke lahi e atāina. Ko e logonaaga aga mau anei. Ko e vala a ia he tupu hake ke eke mo tagata lahi. Ka e he nofo he kaina, ha ha ia koe e matagahua ke omaoma ke he tau matua haau.—Efeso 6:1-3.
4 He moua e onoonoaga hako ke he tau matafakatufono mo e tau poakiaga he tau matua haau ka fakamukamuka lahi a koe ke muitua ki ai. Mooli, liga logona hifo e koe he falu magaaho tuga a Brielle,a ne 18 e tau he moui, kua talahau hagaao ke he tau matua haana: “Ne nimo katoatoa e laua e magaaho ne hohoko a laua ke he tau moui haaku. Nakai manako a laua ke fai talahauaga au, taute e fifiliaga, po ke eke mo tagata lahi.” Tuga a Brielle, liga logona hifo e koe kua taofi he tau matua haau ki a koe e atāina lahi kua lata ia laua ke atu, he manatu haau. Pete ia, kua taute he tau matua haau e tau matafakatufono matapatu ai ha kua manamanatu a laua ki a koe. Lafi ki ai, kua iloa he tau matua Kerisiano kua fai fakalagoaga a laua ki a Iehova ma e puhala ne leveki e laua a koe.—1 Timo. 5:8.
5. Maeke fēfē he omaoma ke he tau matua haau ke aoga ki a koe?
5 Mooli, ko e omaoma ke he tau matafakatufono he tau matua haau kua tuga e totogi he kaitalofa ne ole e koe he pege—ko e lahi he mahani fakamooli haau he totogi ai, kua hihiga lahi e pege ke matutaki ke atu e tupe haau ka ole. Pihia foki, kua latatonu a koe ke fakalilifu mo e omaoma ke he tau matua haau. (Totou Tau Fakatai 1:8.) Ko e lahi e omaoma haau, to lahi atu e atāina ka foaki atu he tau matua haau. (Luka 16:10) Mooli, ka fakatumau a koe ke moumou e tau matafakatufono, ua ofo ka fakatote hifo po ke ai fai tupe ka atu he tau matua haau.
6. Maeke fēfē he tau matua ke lagomatai e tau fuata ikiiki ke omaoma?
6 Taha puhala ka lagomatai he tau matua e tau fuata ikiiki ha lautolu ke omaoma e tau matafakatufono ne fakatoka e lautolu ko e fakafifitakiaga. Ko e omaoma fakamakutu ha laua ke he tau mena kua manako a Iehova ki ai kua lata ke fakakite na aoga e tau matafakatufono he Atua. To fakamukamuka lahi he mena nei ma e tau fuata ikiiki ke onoono ke he tau matafakatufono he tau matua ke he puhala taha ia. (1 Ioa. 5:3) Mua atu, na totoku he Tohi Tapu e tau magaaho ne foaki foki e Iehova ke he tau fekafekau haana e magaaho ke fakakite e manatu ha lautolu ke he tau matakupu pauaki. (Kene. 18:22-32; 1 Patu. 22:19-22) Liga fai magaaho kia ka age he tau matua ke he tau fanau ha lautolu ke fai manatu ke he tau matakupu kehekehe?
7, 8. (a) Ko e heigoa e paleko kua fehagai mo e falu fuata ikiiki? (e) Ko e heigoa e kitiaaga ka lagomatai a koe ke aoga mai he akonaki?
7 Ko lautolu e tau fuata ikiiki kua liga fehagai foki mo e paleko he fehagai mo e mena ne kitia e lautolu kua tuhituhi fakakelea he tau matua ha lautolu. He falu magaaho, liga logona hifo a koe tuga e tama taane tote ne higoa ko Craig, ne pehē, “Kua tuga e leoleo fakagalogalo e matua fifine haaku—he kumi tumau ke he tau puhala ne kaumahala ai au.”
8 Ko e fakatonutonu po ke akonaki kua fa moua mai he puhala tuhituhi. Fakakite he Tohi Tapu ko e akonaki, pete he hakotika katoatoa, kua uka ke talia. (Hepe. 12:11) Ko e heigoa ka lagomatai a koe ke aoga mai he akonaki kua moua e koe? Ko e manatu aoga ke tokaloto ko e fakatonuaga he tau matua haau kua tuga e fakalagalaga he fakaalofa ha laua ki a koe. (Fakatai 3:12) Kua manako a laua ke fakahao a koe mai he lauia ke he tau aga kelea mo e lagomatai a koe ke feaki e tau aga mitaki. Liga mailoga he tau matua haau ka kaumahala a laua ke fakatonu a koe, kua tatai mo e fakakite e vihiatia ki a koe! (Totou Tau Fakatai 13:24.) Pihia foki, maama ko e taute e tau hehē ko e vala he puhala fakaako. Ti ka fakatonu a koe, ko e ha he kumi e tau makauho he iloilo ke he mena ne talahau? “Ha kua mua he mitaki e mena ne fakafua aki [e iloilo] ke he mena ne fakafua aki e ario; mo e tau mena ke moua ai kua mua ia ke he auro.”—Fakatai 3:13, 14.
9. He nakai hagaaki ke he tuaga tuga kua nakai fakafili tonu, ko e heigoa ha lautolu ne ikiiki ka taute?
9 Ka e fai hehē foki e tau matua. (Iako. 3:2) Ka akonaki a koe, kua vagahau a laua falu magaaho mo e nakai manamanatu. (Fakatai 12:18) Ko e heigoa ka fakatupu e tau matua haau ke taute e mena nei? Kua liga tupetupe a laua, po ke liga onoono a laua ke he tau hehē haau ko e kaumahala he vala ha laua. He nakai hagaaki ke he mena ne logona hifo e koe kua nakai fakafili tonu, he ha he fakakite e loto fakaaue ma e manako fakamakai ha laua ke lagomatai? Ko e iloaaga ke talia e akonaki ka lagomatai foki a koe ka lahi hake.
10. Maeke fēfē a koe ke fahia mooli ke he tau matafakatufono mo e fakatonuaga fakamatua?
10 To manako nakai a koe ke mukamuka lahi ke talia mo e aoga mai he tau matafakatufono mo e tau fakatonuaga he tau matua haau? Ka pihia, kua lata a koe ke fakatupu ki mua e tau puhala matutakiaga haau. Liga taute fēfē e koe e mena ia? Ko e lakaaga fakamua ke fanogonogo. ‘Kia alumaki ke fanogonogo,’ he talahau he Tohi Tapu, “kia fakatuai ke vagahau atu, kia fakatuai ke he ita.” (Iako. 1:19) He nakai mafiti ke fakakite e tonuhia haau, lali ke tautaofi haau a tau logonaaga mo e hufia e tau mena ka tala atu he tau matua haau. Hagaaki ke he mena ne talahau, nakai ke he puhala ne talahau aki. Ti, liu talahau e tau kupu he tau matua haau ke he tau kupu ni haau ti fatiaki age fakalilifu e tau talahauaga ha laua. Ko e taute pihia e koe ka mafanatia a laua kua logona e koe e tau mena ne talahau e laua. Ka e kua ka manako a koe ke fakamaama e talahauaga po ke tau gahua haau? Laulahi he tau mena ne tutupu, kua pulotu ke ‘taofi haau a tau laugutu’ ato mole he muitua e koe e tau manako he tau matua haau. (Fakatai 10:19) Ka kitia agataha he tau matua haau kua fanogonogo a koe ki a laua, to hihiga lahi a laua ke fanogonogo ki a koe. Ko e puhala motua pihia kua fakakite mooli kua takitaki a koe he Kupu he Atua.
Takitaki he Kupu he Atua Ka Fatifati e Tupe
11, 12. (a) Hagaao ke he tupe, ko e heigoa ne fakamalolō he Kupu he Atua ki a tautolu ke taute, ti ko e ha? (e) Liga lagomatai fēfē he tau matua haau a koe ke fatifati e tupe?
11 “Eke foki e tau tupe mo mena ke malu ai,” he talahau he Tohi Tapu. Ka ko e kupu taha nei kua fakakite na mua atu e aoga he iloilo ke he tupe. (Fakama. 7:12) Kua fakamalolō he Kupu he Atua a tautolu ke mailoga e aoga he tupe, ka e nakai loto lahi ki ai. Ko e ha kua lata ia koe ke kalo he fakatupu e loto lahi ke he tupe? Manamanatu ke he fakataiaga nei: He tau lima he tagata tunu kai lotomatala, ko e titipi matila ko e koloa aoga lahi. Ka ko e titipi taha ia he tau lima he tagata nakai manamanatu po ke fakahanoa ka fakatupu e hagahaga kelea lahi mahaki. Ka fakaaoga fakalotomatala ai, maeke foki e tupe ke aoga. Pete ia, ko lautolu “kua manako ke maukoloa” kua fakahui tumau e tau tuaga kapitiga, tau fakafetuiaga magafaoa, ti pihia mo e fakafetuiaga ha lautolu mo e Atua. Ti ko e fua, ne hoka e lautolu a lautolu “ke he tau mena matematekelea loga.”—Totou 1 Timoteo 6:9, 10.
12 Maeke fēfē a koe ke iloa ke fatifati fakalotomatala e tupe? He ha he hūhū ke he tau matua haau ma e fakatonuaga ke he puhala ke fatifati aki e tupe haau? “Kia fanogonogo ai e tagata iloilo, kia tolomaki atu hana iloilo; ko ia ne pulotu foki ke moua ai e ia e iloilo ke pule ai,” he tohia e Solomona. (Fakatai 1:5) Ne ole e fifine fuata ko Anna ke he takitakiaga lotomatala he tau matua haana. Pehē a ia, “Ne fakaako he matua taane haaku au ke fakaholahola e tupe, ti fakakite e ia ki a au e uho he fakatokatoka e tau fatifatiaga tupe he magafaoa.” Fakaako pihia foki he matua fifine haana a ia ke he tau puhala kua aoga. “Ne fakakite e ia ki a au e aoga he fakatatai e tau totogi he tau koloa to fakatau,” he ui e Anna. Aoga fēfē ki a Anna? Tali e ia: “Maeke ia au mogonei ke leveki ne au e tau puhala fakatupe haaku. Ne tautaofi fakamitaki e au e fakatau haaku, ti moua e au e atāina mo e mafola e manamanatuaga he kalo mai he tau kaitalofa nakai aoga.”
13. Maeke fēfē a koe ke akonaki e koe a koe ka fakaaoga e tupe?
13 Maeke ia koe ke mafiti e moui kaitalofa ka fakatau holopī e koe e tau koloa po ke fakaaoga noa ni e tupe ke nava mai e tau kapitiga haau. Ko e heigoa ka lagomatai a koe ke kalo kehe he tau matahele nei? Ka fakaaoga e tupe, kua lata ia koe ke fakaako ke akonaki e koe a koe. Ko e mena anei ne taute e Ellena, ne 20 tumā e tau. “Ka fano au mo e tau kapitiga haaku,” he ui e ia, “ne fakatokatoka tuai ti fuafua ni e au e lahi he tupe haaku ka fakamole. . . . Pulotu foki ki a au ke fano ni ke he fale koloa mo e tau kapitiga haaku kua fakaeneene e fakaaoga he tupe ha lautolu pihia mo lautolu ka fakamafana au ke fakatatai mua e tau totogi ka e nakai fakatau e mena fakamua ne kitia e au.”
14. Ko e ha kua lata ia koe ke puipui mai he “fakavai he koloa”?
14 Ko e gahua mo e fatifati e tupe ko e vala aoga lahi he moui. Ka e pehē a Iesu kua hau e fiafia lahi ki a lautolu ne “manamanatu ke he tau mena fakaagaaga.” (Mata. 5:3, NW) Ne hataki e ia ko e fiafia he tagata ke he tau mena fakaagaaga ka fakaapitia he tau mena tuga e “fakavai he koloa.” (Mare. 4:19) Kua aoga mooli ke fakaatā e Kupu he Atua ke takitaki a koe mo e fakatumau e onoonoaga lagotatai ke he tupe!
Takitaki he Kupu he Atua Ka Nakai Fai Tagata mo Koe
15. Magaaho fe ka lahi e kamatamata he mahani fakamooli haau ke he Atua?
15 Magaaho fe he manatu haau ka lahi e kamatamata he mahani fakamooli haau ke he Atua—ka haia a koe mo e falu po ko koe ni tokotaha? Ka haia a koe he aoga po ke he gahuaaga, liga fakaaoga e koe e tau papaleaga fakaagaaga haau. Kua mataala a koe ke he hagahaga kelea fakaagaaga ka tupu. He magaaho ka okioki a koe ti fakataafu a koe mo e mukamuka lahi ke mahala ke he totokoaga he tau mahani mitaki haau.
16. Ko e ha kua lata ia koe ke manako ke omaoma ki a Iehova pete he nakai fai tagata mo koe?
16 Ko e ha kua lata ia koe ke manako ke omaoma ki a Iehova pete he nakai fai tagata mo koe? Manatu e mena nei: Maeke ia koe ke fakahukia e finagalo a Iehova po ke fakafiafia e loto haana. (Kene. 6:5, 6; Fakatai 27:11) Na lauia a Iehova he tau gahua haau ha ‘kua manatu e ia a koe.’ (1 Pete. 5:7) Manako a ia ki a koe ke fanogonogo ki a ia ke maeke ke aoga ai ni a koe. (Isaia 48:17, 18) He fakaheu he falu fekafekau a Iehova i Isaraela i tuai e fakatonuaga haana, ne fakahukia e lautolu a ia. (Sala. 78:40, 41) He taha faahi, ne fakaalofa hofihofi a Iehova ke he perofeta ko Tanielu, ha kua ui he agelu a ia “ko e tagata kua ofania lahi.” (Tani. 10:11) Ko e ha? Ne fakamooli tumau a Tanielu ke he Atua, nakai ni he toloaga ka e pihia foki ka nakai fai tagata mo ia.—Totou Tanielu 6:10.
17. Ko e heigoa e tau hūhū ka hūhū e koe ka fifili e tau fakafiafiaaga?
17 Ke fakatumau e fakamooli ke he Atua ka nakai fai tagata mo koe, kua lata ia koe ke feaki haau a “mahani . . . ke mailoga e tau mena mitaki mo e tau mena kelea” ti fakaako e tau mahani ia he “ako mua” e mena nukua iloa e koe kua hako. (Hepe. 5:14) Ma e fakatai, ka fifili e leo kofe kua fanogonogo a koe ki ai, tau kifaga kua kitekite e koe, po ke tau faahi he Internet ne fano ki ai a koe, hanei e mena ka lagomatai a koe ke fifili e mena hako mo e kalo kehe he mena hepe. Hūhū ki a koe e tau hūhū nā: ‘To atihake kia he vala tala nei au ke fakaalofa hofihofi noa po ke to fakaohooho au ke fiafia “ke he malaia [he taha]”?’ (Fakatai 17:5) ‘To lagomatai nakai he mena ia au ke “manako ke he mitaki” po ke taute ke uka ia au ke “fakavihia . . . e kelea”?’ (Amosa 5:15) Ko e mena haau ne taute ka nofo tokotaha kua fakakite e tau mena ne uho lahi ki a koe.—Luka 6:45.
18. Ko e heigoa kua lata ia koe ke taute ka taute fufū e koe e tau mahani hehē, ti ko e ha?
18 Ko e heigoa kua lata ia koe ke taute ka taute fufū e koe e tau mahani kua iloa e koe kua hehē? Manatu, “ko ia kua ufiufi hana tau holifono, nakai monuina a ia; ka ko ia kua fakakite mo e tiaki ai, kua ofania a ia.” (Fakatai 28:13) Ko e goagoa ha ia ke matutaki ke he puhala hehē ti “fakahukia e [a]gaga [t]apu he Atua”! (Efeso 4:30) Kua fai fakalagoaga mooli a koe ke he Atua, ke he haau a tau matua, mo e ki a koe ni ke fakakite e tau hehē. Hagaao ke he mena nei, ko e ‘tau patu he fakapotopotoaga’ ka lagomatai lahi ki a koe. Pehē e tutaki ko Iakopo: “Kia liogi a lautolu [mo e tagata mahani kelea], mo e fakatākai a ia ke he magalolo ke he higoa he Iki. To fakamoui e tagata gagao ke he liogi kua eke mo e tua, to fakatu foki he Iki a ia; kaeke foki kua hala a ia, to fakamagalo ai.” (Iako. 5:14, 15) Talahau ai, liga fua mai e fakamā he mena nei ti fai fakahikuaga kelea. Ka ha ha ia koe e malolō ke ole ma e lagomatai, to fakahao e koe a koe he ha matematekelea foki mo e to logona hifo e totokaaga kua hau he liu moua e loto manamanatu mitaki.—Sala. 32:1-5.
Fakafiafia e Loto a Iehova
19, 20. Ko e heigoa kua manako a Iehova ma haau, ka ko e heigoa kua latatonu ia koe ke taute?
19 Ko Iehova ko e ‘Atua fiafia’ ti manako a ia ki a koe ke fiafia. (1 Timo. 1:11) Kua matakite lahi a ia ki a koe. Pete he nakai mailoga he ha tagata e laliaga haau he eketaha ke taute e mena kua hako, ka e mailoga e ia. Nakai fai mena ne galo ke he fofoga a Iehova. Kua mamata a ia, nakai ke kumi hehē ka ke lalago e laliaga haau ke taute e mena mitaki. “Ko e tau fofoga a Iehova kua o tafeliuaki ai ke he lalolagi oti, ke lagomatai kia lautolu kua katoatoa ha lautolu a tau loto kia ia.”—2 Nofo. 16:9.
20 Ko e mena ia, fakaatā e koe a koe ke takitaki he Kupu he Atua, ti fakagahua e fakatonuaga i ai. To moua e koe e iloilo mo e pulotu kua lata ke fahia mai he tau lekua mo e taute e tau fifiliaga uka he moui. To nakai ni fakafiafia e koe e tau matua haau mo Iehova ka e moua foki e koe e moui fiafia mooli.
[Matahui Tala]
a Hiki tuai falu higoa.
To Tali Fēfē e Koe?
• Ko e heigoa ka taute he tau fuata ikiiki ke fahia mo e aoga mai he tau matafakatufono mo e fakatonuaga fakamatua?
• Ko e ha kua aoga ke moua e onoono lagotatai he tupe?
• Maeke fēfē a koe ke tumau e fakamooli ki a Iehova pete he nakai fai tagata mo koe?
[Fakatino he lau 6]
To tumau nakai a koe ke fakamooli ke he Atua ka nakai fai tagata mo koe?