Hūhū he Tau Tagata Totou ha Tautolu . . .

Tufuga kia he Atua e Tiapolo?

▪ Ha kua talahau he Tohi Tapu ko e Atua ne “eke e tau mena oti kana,” ne fakahiku he falu ko e Atua ne liga tufuga e Tiapolo. (Efeso 3:9; Fakakiteaga 4:11) Fakakite fakamaali he Tohi Tapu ne nakai ko ia ne tufuga.

Ne tufuga e Iehova e mena moui ne eke mo Tiapolo. Ti, ko ia nei ne eke mo totoko ue atu he Atua kua lata ke fakatatai mo e tau mena ne fakakite he tau Tohiaga Tapu hagaao ki a Iehova ko e Tufuga. Hagaao ki a ia, ne pehē: “Kua katoatoa ni e mitaki hana gahua; ha kua tonu hana tau puhala oti ni? ko e Atua kua fakamoli, nakai ha ha ia ia ha mahani kelea, ko e mahani tututonu mo e mahani hakohako ni a ia.” (Teutaronome 32:3-5) Mai he talahauaga ia, maeke ia tautolu ke fakahiku ko Satani he taha magaaho kua katoatoa e mitaki mo e tututonu, ko e taha he tau tama taane fakaagelu he Atua. He Ioane 8:44, ne pehē a Iesu ko e Tiapolo ne “nakai tumau ni a ia ke he mena moli,” he talahau na fakamooli mo e nakai agahala a Satani he taha magaaho.

Ka e tuga e tau mena momoui lotomatala ne toe ha Iehova, ko e agelu ne eke mo Satani ne atāina ke fifili e mena kua hako mo e hepe. He fifili e puhala ke totoko ke he Atua mo e fakaohooho e hoa tagata fakamua ke kau mo ia, ne taute e ia a ia mo Satani, ne kakano ko e “Totoko.”—Kenese 3:1-5.

Ko e mena moui fakaagaaga kelea ia foki ne eke e ia a ia mo Tiapolo, ne kakano ko e “Pikopiko.” Ko Satani ko e mena moui fakatupua ne nakai kitia i tua he gata mo e fakaaoga e tau pikopiko fakavaia ke fakahehē a Eva ke liuliu ke he fakatufono nakai halavihi he Tufuga. Ko e kakano haia ne ui e Iesu a Satani ko e “matua he pikopiko.”—Ioane 8:44.

Ka e maeke fēfē e mena moui fakaagaaga ne katoatoa e mitaki—ne nakai fai hehē ia ia po ke tau fakaohoohoaga kelea ne viko takai ia ia—ke moua e fatuakiloto kelea? Ne manako loto mooli a ia ke he tapuakiaga ne kua lata ni mo e Atua ti mailoga e puhala he tamai e tau tagata ki lalo he pule haana ka e nakai ki a Iehova. He nakai tiaki ai, kua matutaki a ia ke manamanatu ke he amaamanaki nei he pule, ka e fakaatā e ia e manatu ke tupu ato fakahiku ke fakagahua ai e mena ia. Kua fakamaama e mena ne tupu he tohi ha Iakopo: “Ka e takitokotaha mo e kamatamata a ia ka toho mo e hele a ia he hana tau manako lahi. Ka fatu e manako lahi ti fanau mai ai e ia, ko e hala.”—Iakopo 1:14, 15; 1 Timoteo 3:6.

Ke fakatai: Manamanatu la ke he tagata gahua fakamau tupe ne kitia e puhala ke hikihiki e tau fakamauaga he puhala ke kaihā mai he kamupanī haana ke lata ni mo ia. Liga tiaki fakamafiti e ia e manatu hehē ia. Ka e, kaeke ke manamanatu tumau a ia ke he mena nei, to kamata a ia ke manako ke he manatu, mo e to liga fakagahua ai e ia. Ka pihia a ia, kua taute e ia a ia mo tagata kaihā. Ka pikopiko a ia ke he holifono haana, ne eke foki a ia mo tagata pikopiko. He puhala pihia, he feaki e tau manako hehē mo e fakagahua ai, ko e agelu ne tufuga he Atua ne fakaaoga e atāina haana ke fifili ke fakalataha ke he fakahehē mo e totoko ke he Matua haana, ati taute e ia a ia mo Satani ko e Tiapolo.

Fakaaue ai ha ko e mena to moumou a Satani ko e Tiapolo he magaaho kotofa he Atua. (Roma 16:20) Ka ko e tau tagata tapuaki ha Iehova ko e Atua mogonei kua fakailoa ki ai e tau lagatau ha Satani ti kua foaki ki ai e puipuiaga mai he tau lagatau haana. (2 Korinito 2:11; Efeso 6:11) Ti kua lata mogoia ke “totoko atu a mutolu ke he tiapolo, ti hola kehe ai a ia ia mutolu.”—Iakopo 4:7.

[Blurb he lau 12]

He fifili e puhala ke totoko ke he Atua, ko e mena moui fakaagelu ne katoatoa e mitaki ne taute e ia a ia mo Satani