Falanaki ki a Iehova he Tata Mai e Fakaotiaga
“Kia tua ā mutolu kia Iehova tukulagi.”—ISAIA 26:4.
1. Ko e heigoa e kehekehe he tau fekafekau he Atua mo e tau tagata he lalolagi?
KUA nonofo a tautolu he lalolagi ne tokologa lahi mahaki e tagata kua nakai iloa ko hai po ke heigoa ke falanaki ki ai, liga ha kua hukia po ke hogohogo manava lagaloga ai. Kua kehe mamao mo e tau fekafekau a Iehova! He takitaki he iloilo mahani Atua, kua iloa mitaki e lautolu he nakai falanaki ke he lalolagi nei po ke “tau iki” i ai. (Sala. 146:3) Ka e falanaki ha lautolu a tau momoui mo e ha lautolu a vahā anoiha ki a Iehova, he iloa kua fakaalofa a ia ki a lautolu mo e fakamooli tumau e ia e Kupu haana.—Roma 3:4; 8:38, 39.
2. Fakailoa fēfē e Iosua e falanaki mooli he Atua?
2 Kua fakailoa e Iosua i tuai e falanaki mooli he Atua. He teitei hoko ke he fakaotiaga he moui ha Iosua, ne pehē a ia ke he haana tau matakainaga Isaraela: “Kua iloa e mutolu mo e ha mutolu a tau loto katoa, mo e ha mutolu a tau agaaga katoa, nakai to ha kupu taha he tau kupu mitaki oti ne vagahau mai ai e Iehova ha mutolu a Atua kia mutolu; kua hoko oti kia mutolu, nakai ni to ha kupu taha.”—Iosua 23:14.
3. Ko e heigoa kua fakakite he higoa he Atua hagaao ki a ia?
3 Kua fakamooli e Iehova e tau maveheaga haana, nakai ni he fakaalofa ke he tau fekafekau haana ka e mua atu ke lata mo e higoa ni haana. (Esoto 3:14; 1 Samu. 12:22) Hagaao ke he higoa faka-Atua, ko e hafagiaga ke he The Emphasized Bible, ha J. B. Rotherham, ne pehē: “[Kua] eke mo maveheaga fakaalofa lahi; ko e malolō faka-Atua ke hikihiki ke he ha tuaga, ha mena uka, ha manako ka tutupu . . . [Ko e] maveheaga, . . . ko e fakakiteaga, ko e fakamanatuaga, ko e omonuo. Ke he Higoa nei, to fakamooli tumau e Atua; he mena ia to nakai mā a Ia.”
4. (a) Ko e heigoa he Isaia 26:4 kua tomatoma ki a tautolu ke taute? (e) Ko e heigoa ha tautolu ka fakatutala ki ai he vala tala nei?
4 Hūhū hifo ki a koe: ‘Iloa mitaki nakai e au a Iehova ke falanaki katoatoa ki a ia? Haga atu nakai au ke he vahā anoiha mo e mauokafua, he iloa kua pule katoatoa e Atua?’ Talahau ai he Isaia 26:4: “Kia tua ā mutolu kia Iehova tukulagi; ha ko Ioha ko Iehova, ko e [M]aka tumau tukulagi.” Mooli, nakai foaki fakamana mai he Atua ke he tau momoui he tau tagata mogonei tuga ne taute e ia falu magaaho he vahā Tohi Tapu. Ka ko e “[M]aka tumau tukulagi,” kua maeke ke falanaki ki a ia “tukulagi.” Maeke fēfē e Atua falanaki mooli ke lagomatai e tau tagata tapuaki fakamooli haana he vahā nei? Kia kitekite a tautolu ke he tolu e puhala: Kua fakamalolō e ia a tautolu ka kumi e tautolu e lagomatai haana ke totoko e kamatamata, kua lagomatai e ia a tautolu ka fehagai a tautolu mo e ekefakakelea po ke totoko fakahako, ti lagaki hake e ia a tautolu ka pehia a tautolu he tau fakaatukehe. He kumikumi a tautolu ke he tau faahi nei, kia mailoga ke manamanatu ke he puhala ka fakamalolō e koe e falanaki haau ki a Iehova.
Falanaki ke he Atua ka Kamatamata ke Taute e Mena Hehē
5. He falanaki ha tautolu ke he Atua, mena fe ne liga kamatamata lahi?
5 Taha mena ke falanaki ki a Iehova ka hoko ke he maveheaga haana he Parataiso po ke liu tu mai—ko e tau mena ne manako lahi a tautolu ki ai. Ka e liga kehe mamao ke falanaki ki a ia ke he tau tuaga he mahani, he talia katoatoa ke he loto ko e omaoma ke he tau puhala mo e tau tuaga haana kua hako mo e to takitaki ke he fiafia lahi mahaki. Ne tohi he Patuiki ko Solomona e tomatomaaga nei: “Kia tua a koe kia Iehova mo e hāu a loto katoa; ka e aua neke falanaki a koe ke he hāu a pulotu. Kia manatu e koe a ia ke he hāu a tau puhala oti, ti fakahakohako ai e ia hāu a tau puhala.” (Fakatai 3:5, 6) Mailoga e manatu ke he ha tautolu a “tau puhala.” E, ko e puhala moui katoa ha tautolu—nakai ni ko e amaamanakiaga Kerisiano ha tautolu—kua lata ke fakakite e falanaki ha tautolu ke he Atua. Maeke fēfē a tautolu ke fakakite e falanaki ia ka tutupu e tau kamatamata?
6. Maeke fēfē a tautolu ke fakamalolō e fifiliaga ha tautolu ke tiaki e tau manatu kelea?
6 He fuluhi kehe he kelea kua kamata he manamanatuaga. (Totou Roma 8:5; Efeso 2:3.) Maeke fēfē mogoia ke fakamalolō e koe e fifiliaga haau ke tiaki e tau manatu kelea? Manamanatu ke he lima e puhala nei: 1. Kumi e lagomatai he Atua he puhala he liogi. (Mata. 6:9, 13) 2. Manamanatu fakahokulo ke he tau fifitakiaga he Tohi Tapu ki a lautolu kua kaumahala ke fanogonogo ki a Iehova mo lautolu ne fanogonogo. Ti mailoga e fua ne moua e lautolu.a (1 Kori. 10:8-11) 3. Manamanatu ke he hagahaga kelea he logonaaga mo e fatuakiloto ka fakatupu he agahala ki a koe mo e ke he tau fakahele haau. 4. Manamanatu ke he puhala kua logona he Atua ka agahala kelea muitui taha he tau fekafekau haana. (Totou Salamo 78:40, 41.) 5. Manamanatu ke he olioli kua pukeina e loto a Iehova ka kitia e ia e tagata tapuaki fakamooli kua tiaki e kelea mo e taute e mena hako, he toloaga po ke ko ia ni tokotaha. (Sala. 15:1, 2; Fakatai 27:11) Maeke foki ia koe ke fakakite e falanaki haau ki a Iehova.
Falanaki ke he Atua ka Feleveia mo e Ekefakakelea mo e Totokoaga
7. Ko e heigoa e tau kamatamata ne fehagai a Ieremia ki ai, ti fēfē e logonaaga haana he falu mogo?
7 Tokologa e matakainaga ha tautolu ne fekafekau he tau matakavi ne uka lahi. Ne fekafekau e perofeta ko Ieremia he matakavi pihia—ko e kautu ha Iuta he tau aho fakahikuhiku ne miha lahi. Ne lauia tumau a ia he tau aho takitaha he tau kamatamata he tua ha kua omaoma a ia he fakailoa e tau fekau fakafili he Atua. He taha magaaho, ko e haana a tohikupu fakamooli foki ko Paruka ne gugū he oti e manava. (Iere. 45:2, 3) Mahala nakai a Ieremia ke he fakaloleloleaga? He falu mogo ne logona e ia e fakaatukehe. “Kia malaia e aho ne fanau ai au,” he tala age e ia. “Ko e ha ne hau ai au he manava ke kitia ai e mamahi mo e mānu, kia oti ai haku a tau aho mo e mā?”—Iere. 20:14, 15, 18.
8, 9. He fakatatai ke he Ieremia 17:7, 8 mo e Salamo 1:1-3, ko e heigoa ha tautolu ka taute ke fua tumau mai e fua mitaki?
8 Ka e nakai mahala a Ieremia. Ne matutaki a ia ke falanaki ki a Iehova. Ti ko e fua, ne logona he perofeta fakamooli nei e fakakatoatoaaga he tau kupu a Iehova ne fakamau ia Ieremia 17:7, 8: “Uhoaki e tagata kua tua kia Iehova, ko ia kua eke a Iehova mo amaamanakiaga hana. Ka kua lata a ia mo e akau kua to ke he tapa vai, kua totolo hana tau vaka ke he kauvai he vailele, nakai kitia foki e ia ka hoko mai e vevela, ka e lau uhiuhi hana tau lau; nakai fakaatukehe a ia ke he vaha la, to fua mai agaia ni hana tau fua.”
9 Tuga e akau kai tupu olaola ne “to ke he tapa vai” po ke ulu akau ne fakamalū, ko Ieremia ne “fua mai agaia ni hana tau fua.” Ne fakaheu e ia e fakaohoohoaga he tau tagata vaiga kelea ne viko takai ia ia. Ka kua fakatumau a ia ke he Punaaga he “vai” foaki moui mo e uta ke he loto e tau mena oti ne tala age e Iehova ki a ia. (Totou Salamo 1:1-3; Iere. 20:9) Ko e fifitakiaga mitaki mooli a Ieremia ma tautolu, mua atu ke he falu ia tautolu kua fekafekau ke he Atua he tau matakavi uka! Ka eke ko koe he tuaga ia, fakatumau ke tua fakalahi ki a Iehova, ka foaki ki a koe e fakauka he “fakaaue atu ke he hana higoa.”—Hepe. 13:15.
10. Ko e heigoa e tau monuina kua moua e tautolu, ti ko e heigoa kua lata ke hūhū hifo ki a tautolu ni?
10 Ke lagomatai a tautolu ke fahia ke he moui he tau aho fakamui nai, kua foaki e Iehova ki a tautolu e matakavi fakaagaaga ne lanu uhiuhi mooli. He falu mena foki, ne foaki e ia e tohi katoa he Kupu he Atua, ne kua fakaliliu fakahako ai ke he tau vagahau loga lahi. Kua fakatoka mai e ia e tau mena kai fakaagaaga loga he tau magaaho tonu puhala he vahega fekafekau fakamoli mo e loto matala. Ti kua foaki e ia ki a tautolu e tau kapitiga atihake he tau matakainaga tokologa he tau feleveiaaga mo e tau takaiaga. Kua fakaaoga katoatoa nakai e koe e tau foakiaga nei? Ko lautolu oti kua taute pihia ‘to kalaga ha ko e loto fiafia.’ Ka ko lautolu kua kaumahala ke fanogonogo ke he Atua ‘to tagi ni he mamahi e tau loto, mo e tagi fekapai he malipilipi ai e tau loto.’—Isaia 65:13, 14.
Falanaki ke he Atua ka Fehagai mo e Tau Fakaatukehe
11, 12. He onoono ke he tau lekua he lalolagi, ko e heigoa e puhala he iloilo mooli?
11 He talahau tuai, ko e lahi mahaki he tau matematekelea kua lauia e tau tagata oti. (Mata. 24:6-8; Fakakite. 12:12) Ka hake lahi mahaki e vai, ko e aga pauaki ke tafepoi hake ke he mena tokoluga po ke toli hake ke he tuafale—ha mena ni ne tokoluga. Pihia foki, he tupu lahi mahaki e tau lekua he lalolagi, totou miliona hane kumi huaga ke he mena ne tuga e lahi fakatupe, fakapolitika, po ke tau fakatokaaga fakalotu, ti pihia mo e saiene mo e tau matini foou. Ka e nakai fai he tau mena nei kua foaki e haohao mitaki mooli. (Iere. 17:5, 6) He taha faahi, ko e tau fekafekau a Iehova kua moua e huaga mauokafua—“ko e [M]aka tumau tukulagi.” (Isaia 26:4) Ne pehē e salamo: “Ko [Iehova] ko e haku a maka tumau, mo e haku a fakamouiaga, haku a kolo tokoluga.” (Totou Salamo 62:6-9.) Taute fēfē e tautolu e Maka nei mo huaga ha tautolu?
12 Kua pipiki mau a tautolu ki a Iehova ka omaoma a tautolu ke he Kupu haana, nukua fa mahani ke kehe mai he iloilo he tagata. (Sala. 73:23, 24) Tuga anei, ko e tau tagata kua fakaohooho he iloilo fakatagata he liga pehē: ‘Na taha ne moui haau; fakaaoga katoa ai.’ ‘Tutuli e gahua mitaki.’ ‘Gahua ke loga e tau tupe.’ ‘Fakatau e mena ē, fakatau e mena nā.’ ‘Fano fenoga; moua e fiafia he lalolagi.’ Ke he taha faahi, ko e iloilo mahani Atua kua felauaki mo e fakatonuaga: “Ko lautolu kua toto e tau mena he lalolagi nai tuga he nakai toto fakalahi ki ai; ha ko e mena mole atu e mahani he lalolagi nai.” (1 Kori. 7:31) Ti pihia foki, kua tomatoma e Iesu a tautolu ke tuku fakamua tumau e tau mena he Kautu mo e tanaki e ‘tau koloa ke he lagi,’ ka haohao mitaki katoatoa ai.—Mata. 6:19, 20.
13. He tokaloto e 1 Ioane 2:15-17, ko e heigoa kua lata ke hūhū hifo ki a tautolu ni?
13 Ko e aga haau kia ke he “lalolagi” mo e “tau mena ha ha he lalolagi” kua fakakite e falanaki katoatoa haau ke he Atua? (1 Ioa. 2:15-17) Kua mahomo atu kia e mitaki mo e aoga lahi he tau monuina mo e tau kotofaaga fakaagaaga he fekafekauaga he Kautu ki a koe ke he tau mena ne foaki he lalolagi? (Filipi 3:8) Kua eketaha kia a koe ke fakatumau e mitaki po ke, mukamuka he mata? (Mata. 6:22) Mooli, kua nakai manako e Atua ki a koe ke fakahanoa po ke nakai fai fakalagoaga, mua atu ka fai magafaoa a koe ke leveki. (1 Timo. 5:8) Ka e amanaki a ia ke he tau fekafekau haana ke falanaki katoatoa ki a ia—nakai ke he lalolagi ha Satani hane mole atu.—Hepe. 13:5.
14-16. Aoga fēfē e falu ha ko e fakatumau e ‘mata mukamuka’ mo e tuku fakamua tumau e tau mena he Kautu?
14 Manamanatu ke he fifitakiaga ha Richard mo Ruth, ko e tau matua ne tokotolu e tama ikiiki. “Ne pehē e loto haaku ki a au kua maeke ia au ke lahi e mena ke taute ma Iehova,” he talahau e Richard. “Hagahaga mitaki e moui haaku ka e logona hifo e au kua nakai lahi e mena ne foaki e au ke he Atua. He mole e liogi hagaao ke he mena ne tupu mo e manamanatu ke he fua, ne talia e Ruth mo au to ole au ke he leveki gahua ke fakatote hifo e fakaholoaga gahua ke fā e aho he faahi tapu—pete ne nakai mitaki e tuaga fakatupe he motu. Ne talia e ole haaku, ti kamata au ke gahua he fakaholoaga foou ka e nakaila katoa e mahina.” Fēfē e logonaaga ha Richard mogonei?
15 “Ne 20 e pasene ne tote hifo e totogi haaku ke he magaaho fakamua,” he talahau e ia “ka e mogonei kua ha ha ia au 50 foki e aho he tau ke fakalataha mo e magafaoa haaku mo e fakaako e tau tama. Kua maeke ia au ke fakalahiua e magaaho haaku he gahua he fonua, fakalahi tolu e numera he tau fakaako Tohi Tapu haaku, mo e lahi e levekiaga ke he fakapotopotoaga. Ha kua lahi e magaaho haaku ke lagomatai e tau tama, maeke ia Ruth ke paionia fakakū he falu magaaho. Kua eketaha au ke fakatumau ke he fakaholoaga nai ka maeke ai.”
16 Ko Roy mo Petina, kua nofo agaia e tama fifine i kaina, ne maeke ke fakatote hifo e gahua tupe ha laua ke fakalataha ke he fekafekauaga mau. “Ne gahua au ke tolu e aho he faahi tapu,” he talahau e Roy, “ti gahua a Petina ke ua e aho. Kua hiki atu a mautolu ke he fale totetote hifo ne mukamuka lahi ke leveki. Na paionia a maua ato fanau e tama taane mo e tama fifine ha maua, ti nakaila galo e manako ha maua ke paionia. Ti ko e mogo ne lalahi e tau tama ha maua, ne liliu a maua ke he fekafekauaga mau. Nakai maeke he tau tupe loga ke fakatatai ke he tau monuina kua moua e maua.”
Fakaatā e ‘Mafola he Atua’ ke Puipui e Loto Haau
17. Ha ko e tau fakauaua he moui, fakamafana fēfē he tau Tohiaga Tapu a koe?
17 Nakai fai ia tautolu ne iloa e mena ka hoko a pogipogi, ha ko e “vaha mo e tau mena ke tutupu ai” kua hoko ia ki a tautolu oti. (Fakama. 9:11) Ka ko e fakauaua ke he a pogipogi kua nakai lata ke fofō e mafola he manamanatuaga ha tautolu he aho nei, ha kua tupu ai e mena ia ki a lautolu ne nakai mauokafua e fakafetuiaga mafanatia mo e Atua. (Mata. 6:34) Ne tohi he aposetolo ko Paulo: “Aua neke fakaatukehe a mutolu ke he taha mena taha; ka kia fakailoa atu ke he Atua e tau manako ha mutolu ke he tau mena oti kana ke he liogi, mo e ole, katoa mo e fakaaue. Ko e monuina foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu.”—Filipi 4:6, 7.
18, 19. He tau puhala fe kua fakamafana he Atua a tautolu? Fakamaama.
18 Tokologa e matakainaga he tau tuaga kamatamata ne moua e totokaaga mo e loto mafola mai ia Iehova. Talahau he taha matakainaga fifine: “Ne lagaloga e lali he ekekafo iihi ke omoomoi au ke talia e fagai toto. ‘Ko e heigoa e tala goagoa nai ke ai fakaaoga e toto?’ ko e taha ‘fakafeleveiaaga’ fakamua haana. He falu mogo foki, ne liogi fakaeneene au ki a Iehova, ti logona e au e mafola haana ne hufia ki a au. Logona hifo e au e malolō tuga e maka. Pete e lolelole he tokolalo e toto haaku, maeke ia au ke foaki e tau fakamaamaaga mahino faka-Tohi Tapu ma e taofiaga haaku.”
19 Kua fa foaki he Atua e lalagoaga kua lata he falu mogo puhala he fakamafanaaga he matakainaga po ke mena kai fakaagaaga he magaaho tonu. Liga logona e koe e matakainaga kua pehē: “Kua latatonu e vala tala nei mo au. Ne tohi ni ke lata mo au!” E, pete ne tau tuaga po ke tau manako ha tautolu, to fakamooli e Iehova e fakaalofa haana ma tautolu kaeke ke falanaki a tautolu ki a ia. Mua atu, ko tautolu ko e haana a “fuifui mamoe,” ti kua fakamau e ia e higoa haana ki luga ha tautolu.—Sala. 100:3; Ioane 10:16; Gahua 15:14, 17.
20. To nonofo fakatekiteki he ha e tau fekafekau a Iehova ka moumou e lalolagi a Satani?
20 He tata lahi mahaki mai e “aho he ita a Iehova,” ko e tau mena oti kua falanaki ki ai e lalolagi a Satani to lipilipi ai. Ko e auro, ario mo e falu mena uho foki to nakai foaki ha puipuiaga. (Sefa. 1:18; Fakatai 11:4) Ko e huaga ni ha tautolu ko e “[M]aka tumau tukulagi.” (Isaia 26:4) Kia fakatātā ai e tautolu e falanaki katoatoa ha tautolu ki a Iehova mogonei he omaoma mo e o fano ke he tau puhala tututonu haana, he fakailoa e fekau he Kautu haana pete e fehagai a tautolu mo e ekefakakelea po ke totokoaga, mo e tuku atu e tau fakaatukehe ha tautolu ki a ia. He taute e tautolu e tau mena nei, to maeke mooli a tautolu ke ‘nonofo fakatekiteki, ti nakai matakutaku he tau mena kelea.’—Fakatai 1:33.
[Matahui Tala]
a Kikite e tohi “Keep Yourselves in God’s Love” he lau 102-106.
Maeke Nakai a Koe ke Fakamaama?
Maeke fēfē a tautolu ke falanaki ke he Atua
• ka kamatamata ke taute e mena hehē?
• ka feleveia mo e ekefakakelea po ke totokoaga?
• ka fehagai mo e tau fakaatukehe?
[Fakatino he lau 13]
He taofi ke he tau tuaga he Atua kua takitaki ke he fiafia
[Fakatino he lau 15]
‘Ko Iehova, ko e Maka tumau tukulagi’