Hūhū he Tau Tagata Totou ha Tautolu . . .
Ō Oti Kia e Tau Kerisiano Tua Fakamooli ke he Lagi?
▪ Tokologa ne totou e tau kupu mafanatia ha Iesu: ‘Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne fakagahuahua e tua kia ia, ka kia moua e ia e moui tukulagi.’ (Ioane 3:16) Kua kakano kia a Iesu ko e tau tagata tapuaki fakamooli oti he haana Matua, ko Iehova ko e Atua, to o hake ke he lagi ke olioli e fiafia mooli he moui tukulagi?
Mailoga e talahauaga fakalagalaga ha Iesu: “Nakai fakai foki taha ne hake ke he lagi, ko ia ni hokoia ne hifo mai he lagi, ko e Tama he tagata haia ha he lagi.” (Ioane 3:13) Kakano e mena nei ko e tau tagata tapuaki fakamooli i tuai, tuga a Noa, Aperahamo, Mose, mo Tavita, ne nakai o hake ke he lagi. (Gahua 2:34) Ka e o oti a lautolu ki fe? Fakakū: Ko e tau tagata fakamooli i tuai ha he tukuaga, hane momohe ke he mate, nakai iloa ha mena, ti fakatali ke he liu tu mai.—Fakamatalaaga 9:5, 6; Gahua 24:15.
Ko Iesu ne talahau fakamua he Tohi Tapu to momoui falu he lagi ka mole e mamate. Ne tala age e ia ke he tau aposetolo haana to taute e ia taha mena ke nonofo a lautolu he lagi. (Ioane 14:2, 3) Ko e mena foou anei ma e tau tagata he Atua. Ne fakamaama he aposetolo ko Paulo he mogo fakamui he mole e mate ha Iesu mo e fakaliu tu mai ke he lagi, ‘kua fakapa ai e ia ma e tau tutaki haana e puhala fou ke moui ai’—ko e puhala ne nakaila fenoga atu ha tagata i ai.—Heperu 10:19, 20.
Kakano kia e mena nei he tali mai he mogoia to o hake oti e tau tagata fakamooli ke he lagi? Nakai, ko e liu tu mai ke he lagi kua matutaki tata ke he kotofaaga ne age ni ke he falu tagata. He afiafi fakahiku ne fakalataha auloa ai a lautolu, ne tala age a Iesu ke he tau aposetolo haana ko lautolu to “nonofo foki ke he tau nofoaiki, mo e fakafili” he Kautu haana he lagi. Ti ko e pule mo Iesu ke he lagi kua eke mo kotofaaga ha lautolu.—Luka 22:28-30.
Lafi ke he tau aposetolo, to foaki foki ke he falu tagata e poakiaga homo ue atu nei. He fakakiteaga, ne kitia he aposetolo ko Ioane a Iesu mo e matakau ne fakaliu tu mai ke he lagi ne fakamaama ko e ‘tau patuiki mo e tau ekepoa ke he lalolagi.’ (Fakakiteaga 3:21; 5:10) Tokofiha a lautolu i ai? Tuga e tau fakatufono oti, ko e tokogahoa ni ka pule. Ti pihia foki mo e Kautu nei he lagi. Ko Iesu, ko e Punua Mamoe he Atua, kua pule fakalataha mo e 144,000 “ne fakafua mai he tau tagata.”—Fakakiteaga 14:1, 4, 5.
Mooli, ko e 144,000 ko e numera tote ka fakatatai mo e numera he tau tagata tua fakamooli oti i tuai mo e vahā nei. Ka e maama e mena nei ha ko e 144,000 kua fakaliu tu mai ke he lagi ma e kotofaaga he gahua tapu pauaki. Ka tā e koe e fale, to fakagahua nakai a koe e tau tagata tā fale iloilo oti he matakavi haau? Nakai. To manako ni a koe ke he tokologa nukua lata mo e gahua. Pihia foki, kua nakai fifili he Atua e tau tagata tua fakamooli oti ma e kotofaaga uho ke pule mo Keriso he lagi.
Ko e fakatufono nei he lagi to fakakatoatoa e finagalo fakamua he Atua ma e tau tagata. Ko Iesu mo e 144,000 ka pule fakalataha mo ia to takitaki e hikiaga he lalolagi ke he parataiso oti, ka nonofo tukulagi ai e tau tagata tokologa ne tua fakamooli ke he fiafia. (Isaia 45:18; Fakakiteaga 21:3, 4) To ha ha i ai foki a lautolu nei ke he manamanatuaga he Atua, ka fakaliu tu mai.—Ioane 5:28, 29.
Ko e tau tagata tapuaki fakamooli oti ha Iehova—i tuai po ke mogonei—kua maeke ke moua e mena fakaalofa mua ue atu he moui tukulagi. (Roma 6:23) Tokogahoa ka moua e moui he lagi ma e kotofaaga pauaki, ti laulahi ka moua e moui ke he lalolagi he parataiso oti.