Lata Kia e Tau Fuata ke Papatiso?

“KUA fiafia lahi au ha ko e fekafekau ha Iehova e tama fifine haaku mogonei, ti iloa e au kua fiafia foki a ia,” he talahau e Carlos,a ko e matua taane Kerisiano i Filipaina. Ne tohi he matua taane i Heleni: “Kua fiafia lahi au mo e hoana haaku ha kua papatiso oti e tau tama tokotolu ha maua he vahā fuata mui ha lautolu ke eke mo Tau Fakamoli a Iehova. Kua holo ki mua fakaagaaga a lautolu ti fiafia he fekafekau ki a Iehova.”

Fai kakano e tau matua Kerisiano ke molea e fiafia ka papatiso e fanau ha lautolu, ka e falu mogo kua fakatauō e fiafia mo e tupetupe. “Kua fiafia lahi mo e fakaatukehe lahi au,” he talahau he taha matua fifine. Ko e ha ne fiofio e tau logonaaga? “Maama e au kua ha ha he tama taane haaku mogonei e fakalagoaga katoatoa ki a Iehova.”

He fekafekau ki a Iehova ke eke mo taha he Tau Fakamoli papatiso haana ko e foliaga kua lata ke moua he tau fuata ikiiki oti. Ka e liga manamanatu e tau matua mahani Atua, ‘Iloa e au kua holo mitaki ki mua e tama haaku, ka kua lahi nakai e malolō haana ke totoko e tau peehiaga kelea mo e tumau ke meā ke he fofoga ha Iehova?’ Liga hūhū hifo e falu, ‘He fehagai mo e kamatamata he velevelemena, to matutaki nakai e tama haaku ke fiafia mo e fakamakai he fekafekau ke he Atua?’ Hagaao ki ai, ko e heigoa e takitakiaga faka-Tohi Tapu ka lagomatai e tau matua ke mailoga kua mautali e fanau ha lautolu ke papatiso?

Tuaga Tutaki—Ko e Matapatu Puhala

He nakai kotofa e tau tau he moui ke papatiso, ne fakamaama he Kupu he Atua e tuaga fakaagaaga ha lautolu ne lata ke taute e lakaaga ia. Ne hataki a Iesu ke he tau tutaki haana: “Ke eke e tau motu oti kana mo tutaki, ti papatiso atu a lautolu.” (Mata. 28:19) Ti ko e papatisoaga kua lata ma lautolu kua fitā he eke mo tau tutaki he Keriso.

Ko e heigoa e tutaki? Ne fakamaama he Insight on the Scriptures: “Ko e matapatu hagaaoaga he kupu kua lata mo lautolu oti ne nakai ni talitonu e tau fakaakoaga he Keriso ka e mumui fakatata foki ki ai.” Maeke nakai e tau fuata ikiiki lalahi ke eke mo tau tutaki mooli he Keriso? Ko e matakainaga fifine ne fekafekau ko e misionare i Amerika Latini ke mole e 40 e tau ne tohi hagaao ki a ia mo e lafu tokoua haana: “Kua lalahi tuai a mautolu ke iloa kua manako a mautolu ke fekafekau ki a Iehova mo e momoui ke he Parataiso. Ko e tukuleleaga ha mautolu kua lagomatai a mautolu ke loto malolō ka fehagai mo e tau kamatamata he tau fuata. Kua nakai tokihala a mautolu he taute e tukuleleaga ha mautolu ke he Atua he vahā ikiiki.”

Iloa fēfē e koe kua eke e tama haau mo tutaki he Keriso? Ne talahau he Tohi Tapu: “Kua maeke ke iloa ai e tama ke he hana tau mahani; po ke mitaki mo e hakohako hana tau mena ne eke.” (Fakatai 20:11) Manamanatu ke he falu matagahua ne fakakite e ‘mafiti he fuata ke kitia’ ko e tutaki a ia.—1 Timo. 4:15.

Fakamooliaga he Tuaga Tutaki

Omaoma nakai e tama haau ki a koe? (Kolo. 3:20) Taute nakai e ia e tau fekau he kaina ne kotofa ki a ia? Ne talahau he Tohi Tapu hagaao ki a Iesu ne 12 e tau he moui: “Kua omaoma a ia [ke he haana tau matua].” (Luka 2:51) Mooli, nakai fai tama he vahā nei ka omaoma katoatoa ke he tau matua haana. Ka kua latatonu e tau Kerisiano mooli ke “mumui [fakatata] ke he hana [Iesu] tau tuagahui.” Ti ko e tau fuata ne manamanatu ke papatiso kua lata ke iloa mitaki ha ko e mahani omaoma ha lautolu ke he tau matua ha lautolu.—1 Pete. 2:21.

Manamanatu ke he tau hūhū na: Kua kumikumi fakamua kia he tama haau e Kautu ke he gahua he fonua? (Mata. 6:33) Kua makai kia a ia ke fakamatala e tala mitaki ke he falu, po ke foaki e koe ki a ia e fakamafanaaga malolō ke fano ke he gahua he fonua mo e tutala he tau gutuhala? Mailoga kia e ia e matagahua haana ko e tagata fakailoa nakaila papatiso? Ha ha kia ia ia e manako ke liu atu ki a lautolu ne fiafia he feleveia mo ia he fonua? Fakailoa nakai e ia ke he tau kapitiga aoga mo e tau faiaoga ko ia ko e taha he Tau Fakamoli a Iehova?

Ko e finatu kia ke he tau feleveiaaga he fakapotopotoaga kua aoga lahi ki a ia? (Sala. 122:1) Fiafia kia a ia ke tali he Fakaakoaga Kolo Toko mo e Fakaakoaga Tohi Tapu he Fakapotopotoaga? Kua fakalataha fakamakutu kia a ia ke he Aoga Fekafekau Fakateokarasi?—Hepe. 10:24, 25.

Eketaha kia e tama haau ke fakatumau ke he mahani meā he kalo mai he tau lafiaga hagahaga kelea he aoga mo e falu mena foki? (Fakatai 13:20) Ko e heigoa e tau fifiliaga haana hagaao ke he tau leo kofe, tau kifaga, tau polokalama televisoni, tau pelē vitiō, mo e fakaaogaaga he Internet? Fakakite nakai he tau kupu mo e tau gahua haana kua manako a ia ke fakatatai ke he tau tuaga he Tohi Tapu?

Iloa mitaki fēfē he tama haau e Tohi Tapu? Maeke kia a ia ke tuku ke he tau kupu ni haana e tau mena ne fakaako e ia he Tapuakiaga Magafaoa he afiafi? Maeke nakai a ia ke fakamaama e tau kupu mooli aoga he Tohi Tapu? (Fakatai 2:6-9) Fiafia kia a ia he totou e Tohi Tapu mo e fakaako e tau tohi he vahega fekafekau fakamoli mo e loto matala? (Mata. 24:45) Hūhū kia a ia hagaao ke he tau fakaakoaga mo e tau kupu he Tohi Tapu?

Ko e tau hūhū ia ka liga lagomatai a koe ke fuafua e holo ki mua fakaagaaga he tama haau. He mole e manamanatu ki ai, liga fakahiku e koe kua lata a ia ke holo ki mua he falu faahi ato papatiso? Kaeke ke fakakite he puhala moui haana e tuaga tutaki ti tukulele mooli e ia e moui haana ke he Atua, liga logona hifo e koe kua lata ia koe ke fakaatā a ia ke papatiso.

Maeke a Lautolu ne Ikiiki ke Fakaheke a Iehova

Tokologa e tau fekafekau he Atua ne fakakite e tua malolō mo e mahani fakamooli he vahā fuata mui po ke ikiiki agaia. Manamanatu ki a Iosefa, Samuela, Iosia, mo Iesu. (Kene. 37:2; 39:1-3; 1 Samu. 1:24-28; 2:18-20; 2 Nofo. 34:1-3; Luka 2:42-49) Mo e tau tama fifine tokofā ha Filipo ne perofeta atu kua liga fakaako fakamitaki tali mai he vahā ikiiki.—Gahua 21:8, 9.

Ko e Fakamooli i Heleni ne pehē: “Ne papatiso au he 12 e tau he moui. Nakai tokihala au ke he fifiliaga haaku. Tali mai he mogo ia, 24 e tau he mole, kua 23 e tau ne fakaaoga e au he fekafekauaga mau. Ko e fakaalofa haaku ma Iehova ne lagomatai tumau au ke fehagai mo e tau mena uka he vahā fuata. He 12 e tau he moui, ne nakai moua e au e iloilo faka-Tohi Tapu tuga ne moua e au mogonei. Ka e iloa e au kua ofania e au a Iehova mo e manako ke fekafekau tukulagi ki a ia. Kua fiafia au he lagomatai e ia au ke matutaki ke he fekafekauaga haana.”

He fuata po ke fuakau, ko e tagata ka fakakite e tuaga tutaki kua lata ke papatiso. Ne tohi he aposetolo ko Paulo: “Ko e loto ke talia ai [he fakagahuahua e tua], ke hoko mai ai e tututonu; ka ko e gutu ke talahau ai, ke hoko mai ai e fakamouiaga.” (Roma 10:10) Ka taute he tutaki fuata he Keriso e lakaaga aoga he papatisoaga, kua hokotia a ia mo e tau matua haana ke he foliaga lahi. Ua fakaatā ha mena ke fofō e fiafia haau ne tatali ki a koe po ke fanau haau.

[Matahui Tala]

[Puha he lau 5]

Ko e Onoonoaga kua Tonu he Papatisoaga

Falu matua ne manamanatu ko e papatiso he fanau ha lautolu ko e lakaaga aoga lahi ne lauia e tau mena hagahaga kelea—tuga e lali ke moua e tohi fakaholo. Ka ko e papatiso mo e fekafekauaga tapu kia kua fakakelea e kautūaga he tagata anoiha? Ko e tali he Tohi Tapu nakai. Ne talahau he Tau Fakatai 10:22: “Ko e fakamonuina a Iehova, ke maukoloa ai e tagata; ti nakai lafilafi e ia ha mamahi ki ai.” Ti tohi e Paulo ke he fuata tote ko Timoteo: “Ka ko e mahani Atua mo e fakamate [po ke, mahani fakalatalata] ko e koloa lahi ni haia.”—1 Timo. 6:6.

Mooli, ko e fekafekau ki a Iehova kua nakai mukamuka. Ne fehagai a Ieremia ke he tau mena uka loga he gahua haana ko e perofeta he Atua. Ka e, tohi e ia hagaao ke he haana a tapuakiaga ke he Atua mooli: “Ne moua hau a tau kupu, ti kai ai e au; ti eke hau a tau kupu kia au mo mena ke olioli ai mo e fiafia ia haku loto; ha kua ui au ke he hau a higoa, Iehova na e, ko e Atua Sapaota.” (Iere. 15:16) Iloa e Ieremia ko e fekafekauaga ke he Atua ko e punaaga he fiafia haana. Ko e lalolagi ha Satani ko e punaaga he tau mena uka. Lata e tau matua ke lagomatai e fanau ha lautolu ke mailoga e kehekeheaga ia.—Iere. 1:19.

[Puha/Fakatino he lau 6]

Lata Kia e Tama Haaku ke Fakatolomaki e Papatisoaga?

He falu mogo, ka latatonu e tau tama ke papatiso, kua liga fifili he tau matua ha lautolu ke nakai fakahoko ai. Liga ko e heigoa e tau kakano ha lautolu?

Matakutaku au kaeke ke papatiso e tama haaku, liga agahala kelea muitui a ia fakamui ti tuku ki tua. Lata kia ke talitonu ko e tama tote kua fakatolomaki e papatisoaga to nakai fai fakalagoaga ke he Atua ma e mahani haana? Ne talahau e Solomona ke he tau fuata ikiiki: “Kia iloa e koe to fakafili ai he Atua [mooli] a koe ha ko e tau [mahani haau].” (Fakama. 11:9) Mo e nakai fai fakatokaaga ma e tau tau he moui, ne foaki e Paulo e fakamanatuaga nei: “To takitokotaha a tautolu mo e talatala atu hana mahani ke he Atua.”—Roma 14:12.

Ko e tau tagata tapuaki ne papatiso mo e nakaila papatiso kua fai fakalagoaga ke he Atua. Ua nimo, na puipui e Iehova e tau fekafekau haana ‘he nakai tuku atu a lautolu ke he kamatamata kua mua ke he mena kua fahia ai a lautolu.’ (1 Kori. 10:13) Kaeke ke ‘nonofo fakalatalata a lautolu’ mo e totoko e kamatamata, ko lautolu ia kua maeke ke falanaki ke he lalagoaga he Atua. (1 Pete. 5:6-9) Ko e matua fifine Kerisiano ne tohi: “Ko e fanau ne papatiso kua fai kakano lahi ke nonofo kehe mai he tau mena kelea he lalolagi. Ko e tama taane haaku ne papatiso he 15 e tau ne logona hifo ko e puipuiaga e papatiso. ‘Nakai manatu a koe ke taute taha mena ne totoko ke he fakatufono ha Iehova,’ he talahau e ia. Ko e papatisoaga ko e fakaohoohoaga malolō ma e tututonu.”

Kaeke ke fakaako e koe e fanau haau ke he tau kupu mo e fakafifitakiaga ke omaoma a Iehova, maeke ia koe ke mauokafua to matutaki a lautolu ke taute pihia ka mole e papatiso ha lautolu. Ne tohi he Tau Fakatai 20:7: “Ko e tagata tututonu kua fano mo e hana mahani hakohako; to monuina hana fanau ka mole atu a ia.”

Manako au ke kitia kua hokotia fakamua e tama haaku ke he tau foliaga pauaki. Ko e tau fuata ikiiki kua lata ke fakaako ke gahua, nakai leva, ti maeke ia lautolu ke leveki ne lautolu a lautolu. Ka e fai hagahaga kelea he fakamalolō a lautolu ke moua e puhala moui ne matapatu ke he fakaakoaga mo e hagahaga mitaki fakatupe ka e nakai ko e tapuakiaga mooli. Hagaao ke he kupu he Kautu ne nakai tupu, ne pehē a Iesu: “Ko e mena ne gana ke he vao mahukihuki, ko ia haia ne fanogonogo ke he kupu, ka ko e fakaatukehe ke he tau mena he lalolagi nai, mo e fakavai he koloa, kua apitia ai e kupu, ti nakai fua mai ai.” (Mata. 13:22) Ko e pulega ma e moui ne tuku fakamua e tau foliaga fakalalolagi ke he tuaga fakaagaaga ka tanumia e manako he tama tote ke fekafekau ke he Atua.

He tutala hagaao ke he tau fuata ne lata ke papatiso ka e nakai talia he tau matua, ne pehē e motua lotomatala: “He taofi e tama mai he papatiso ka fakamanou e tuaga fakaagaaga haana mo e takitaki atu ke he fakaloleloleaga.” Ti tohi he taha leveki faifano: “Maeke he fuata ke kamata ke maueue po ke tutokolalo e logonaaga fakaagaaga. Liga kumi a ia ke he lalolagi ke moua e logonaaga he kautūaga.”

[Fakatino]

Lata kia e univesitī ke hau mua?

[Fakatino he lau 3]

Maeke he tama tote ke fakakite e tuaga tutaki

[Fakatino he lau 3]

Tauteute mo e tali he tau feleveiaaga

[Fakatino he lau 4]

Omaoma ke he tau matua

[Fakatino he lau 4]

Fakalataha ke he gahua he fonua

[Fakatino he lau 4]

Liogi fakatagata