Totou Tohi Tapu​—Ko e Punaaga he Malolō he Moui Katoa Haaku

Ne talahau e Marceau Leroy

“NE EKE he Atua e lagi mo e lalolagi ke he kamataaga,” he kamata au ke totou tokotaha he poko haaku. Ko e ha ne totou fufū au? Mooli ai, ko e matua taane haaku ne leva e talitonu kua nakai fai Atua, to nakai talia ke he tohi he tau lima haaku​—ko e Tohi Tapu.

Nakaila totou e au e Tohi Tapu, ti ko e tau kupu hafagi ia he Kenese ne laufoaia au tuga e uhila. Manatu au, ‘Hanei e fakamaama ma e lagotatai he tau fakatufono he tufugatiaaga ne fakaofoofo tumau au!’ Ofoofogia ai, ne totou au he matahola valu he pō ato hoko e matahola fā he pogipogi. Ti kamata e aga moui katoa haaku he totou e Kupu he Atua. Toka la ke fakamaama e au e puhala ne eke e totou Tohi Tapu mo punaaga he malolō ke he moui katoa haaku.

“To Lata Ia Koe ke Totou Ai he Tau Aho Takitaha”

Ne fanau au he 1926, i Vermelles, ko e maaga keli kolu he faahi tokelau i Falani. He felakutaki ke uaaki he lalolagi, ko e kolu e mena ne mua e aoga he motu. Ti ko e tagata keli kolu, ne fakaatā au mai he matagahua kautau. Ka ke holo ki mua e puhala moui haaku, ne kamata au ke fakaako ke he letiō mo e hila, ne peehi ki a au e lagotatai he tau fakatufono he tufugatiaaga. He 21 e tau haaku, ne fakaolo mai he kapitiga he poko aoga ki a au e Tohi Tapu fakamua haaku, he pehē, “Ko e pepa kua uho lahi ke totou.” He magaaho ne oti he totou e au, ne talitonu au ko e Tohi Tapu ko e Kupu he Atua, ko e fakakiteaga ke he tau tagata.

He manatu foki to fiafia e tau tuutakaina haaku ke totou e Tohi Tapu, ne moua e au valu e lagaki. Ofo ai au, ne feleveia au mo e vaiga mo e totoko. Ne hataki he tau magafaoa taulatua, “Ka kamata a koe ke totou e pepa ē, to lata ia koe ke totou ai he tau aho takitaha!” Ne totou ai e au, ti nakai tokihala au he taute pihia. Ne eke ai mo aga mau he moui katoa haaku.

He mailoga e fiafia haaku ke he Tohi Tapu, ne mai he falu tuutakaina e tau tohi he Tau Fakamoli a Iehova ki a au ne kua moua e lautolu. Ko e tau tohi ikiiki tuga e One World, One Governmenta (fakakite faka-Falani) ne fakamaama e tau manatu he Tohi Tapu ke he Kautu he Atua ko e amaamanakiaga hokoia ma e tau tagata. (Mata. 6:10) Ne eketaha fakalahi au ke fakailoa e amaamanakiaga nei ke he falu.

Taha ia lautolu fakamua ke talia e Tohi Tapu mai ia au ko Noël, ko e kapitiga mai he tote. Ko e Katolika malolō lahi, ne fakatoka e ia ma maua ke feleveia mo e tagata ne fakaako mo patele. Ne fuafuakelea au, ka e iloa e au mai he totou e Salamo 115:4-8 mo e Mataio 23:9, 10 kua vihiatia he Atua e fakaaoga he tau mena fakatai ke he tapuakiaga mo e fakaaoga e tau mataulu higoa fakalotu ma e tau akoako. Foaki mai he mena nei e loto toa ki a au ke lalago e taofiaga moua foou haaku. Ti ko e fua, ne talia e Noël e kupu mooli, ti hoko mai ke he aho nei ne fakatumau a ia ko e Fakamoli tua malolō.

Ne ahiahi atu foki au ke he mahakitaga haaku. Ha ha he taane haana e tau tohi fakataulatua ti kua kunuene he tau temoni a ia. Pete he nakai ha ha ia au e malolō he mogo fakamua, ko e tau kupu Tohi Tapu tuga e Heperu 1:14 ne omoomoi au kua ha ha ia au e lalagoaga he tau agelu a Iehova. He fakagahua he faimaā taane haaku e tau matapatu fakaakoaga he Tohi Tapu mo e moumou e tau matutakiaga oti he fakataulatua, ne maeke a ia ke atāina mai he tau fakaohoohoaga he tau temoni. Ne eke a ia mo e mahakitaga haaku mo Tau Fakamooli fakamakutu.

He 1947 ko e Fakamoli Amerika, ko Arthur Emiot, ne aahi mai ke he kaina haaku. Fiafia ai, ne hūhū au ki a ia na feleveia ki fe e Tau Fakamoli. Ne tala mai a ia ki a au na fai matakau i Liévin, kavi ke he 10 e kilomita he mamao. Uka foki he magahala ia ke moua e tau pasikala taholi, ti fai mahina ne fano hui mo e liu mai hui au he tau feleveiaaga. Ko e gahua he Tau Fakamoli a Iehova i Falani ne kua pā ke valu e tau. Ko e 2,380 ni e Fakamoli he motu katoa—tokologa e tau tagata ne o mai i Polani. Ka e ia Sepetema 1, 1947, ko e gahua ha mautolu i Falani ne liu foki fakaatā matafakatufono. Ko e la ofisa ne liu fakatū foki i Paris he Villa Guibert. Ha kua nakai fai paionia foki i Falani, ko e fufuta he Informant (mogonei Ha Tautolu a Fekafekauaga he Kautu) ia Tesemo 1947 ne fakatoka mai e fakatokaaga ma e tau paionia tumau, ka fakamatala ke he 150 e tulā he mahina. (He 1949 ne fakatote hifo ai ke he 100 e tulā.) He talia katoatoa ke he tau kupu a Iesu ia Ioane 17:17, “ko e hau [Atua] a kupu ko e kupu moli,” ne papatiso au he 1948, mo e ia Tesemo 1949, ne eke au mo paionia.

Mai he Fale Pouli ki Dunkerque

Ko e kotofaaga fakamua haaku, ko e maaga ko Agen he faahi toga ha Falani, ne nakai leva. He toka e au e gahua ke he tau kolu, ne fakaatā au ke gahua fakakautau. Ne nakai talia e au ke hū he kautau, ti fakafano au ke he fale pouli. Pete he nakai fakaatā au ke moua e Tohi Tapu, ne maeke au ke moua falu lau he tohi a Salamo. He totou ai ne fakamalolō au. He fakatoka mai au, ne ha ha i ai e fifiliaga ke taute e au: Lata nakai au ke fakaoti e fekafekauaga mau haaku ka e gahua ke moua e moui tokotoko mitaki? He mena nei foki, ko e mena ne totou e au he Tohi Tapu kua lagomatai au. Ne manamanatu fakahokulo au ke he tau kupu a Paulo ia Filipi 4:11-13: “Kua maeke ia au e tau mena oti kana ke he fakamalolo mai a [Iehova] kia au.” Ne fifili au ke matutaki e gahua paionia. He 1950, ne moua e au e kotofaaga foou—ko Dunkerque, ko e taone ne fakamatala ai au fakamua.

He hoko atu au ki ai, ne ai fai mena au. Kua malona tiaki e taone he Felakutaki II he Lalolagi, ti uka ke moua e mena ke nofo ai. Ne fifili au ke ahiahi e magafaoa ne fa mahani au ke finatu ki ai fakamua, ti fiafia lahi mahaki e ikififine he fale: “Ae ma Mr. Leroy, kua fakatoka mai tuai a koe! Pehē e taane haaku ane mai tokologa e tagata taane tuga a koe, to nakai fai felakutaki.” Fai fale nofo tagata ahiahi a laua, ti mai e laua e mena ke nofo ai au ato kamata e magahala he tau tagata o fenoga. He aho taha, ne mai e Evans ko e taokete ha Arthur Emiot e gahua ki au.b Ko ia ko e tagata fakahokohoko he uaafo mo e kumi tagata gahua pō ke leveki e toga. Ne fakafeleveia e ia au ke he taha he tau tagata gahua fakamua he toga. He mole e nofo haaku he fale pouli, ne pipili au tuga e tekateka. He fakamaama e Evans e kakano, ne pehē e tagata gahua ki a au ke lagomatai ne au au ke he tau mena kai he filisa. He aho taha ia, ne moua e au e mena ke nofo ai, gahua, mo e tau mena kai! Ne fakamalolō mooli e mauokafua haaku he tau kupu a Iesu ne fakamau ia Mataio 6:25-33.

He kamata e magahala o fenoga, ko e hoa paionia haaku, ko Simon Apolinarski mo au ne lata ke kumi mena foki ke nonofo ai, ka kua eketaha a maua ke fakatumau he kotofaaga ha maua. Ne mai ki a maua e tau mena ke nonofo ai he fale tuai ne toka ai e tau nua, ne momohe a maua he tau fuga fata motie. Ne loga e aho ne gahua a maua. Ne fakamatala a maua ke he tagata ne pule ke he fale nua, ti ko ia taha he tokologa ne talia e kupu mooli. Nakai leva ti hau ai e vala tala he tohi tala he maaga ia, kua hataki e tau tagata ne nonofo i Dunkerque ke he “gahua ne taute he Tau Fakamoli a Iehova he matakavi.” Ka ko Simon mo au mo e tau tagata fakailoa tokogahoa ni e Tau Fakamoli i ai! He fehagai mo e tau mena uka, ne fakamafana ki a mautolu ke manamanatu fakahokulo ke he amaamanakiaga Kerisiano ha mautolu ti manamanatu ke he puhala ne leveki e Iehova a mautolu. Kavi ke he 30 e tagata fakailoa i Dunkerque he magaaho ne hiki e kotofaaga haaku he 1952.

Fakamalolō ma e Tau Matagahua Foou

He mole e nofo fakakū he taone ha Amiens, ne kotofa au mo paionia pauaki ke gahua i Boulogne-Billancourt, ko e faahi tua ha Paris. Ne loga e fakaako Tohi Tapu haaku, ti falu ia lautolu ne taute e fekafekauaga mau he mogo fakamui mo e gahua misionare. Taha tagata taane fuata ko Guy Mabilat, ne talia e kupu mooli ti matutaki atu ke fekafekau mo leveki takaiaga ti eke foki mo leveki faahimotu. Fakamui, ne takitaki e ia e talaga he fale lomi he Peteli mogonei i Louviers, fai vehā mai i Paris. Ko e tau fakatutala tumau he Tohi Tapu he fonua ne fakaholo ki mua e mauokafua he Kupu he Atua he manamanatuaga haaku, ti fakapuke au aki e olioli mo e fakamalolō au ke tupu lahi e iloilo haaku ke fakaako.

He 1953, ofo noa ni, ne fifili au mo leveki takaiaga i Alsace-Lorraine, ko e matakavi he vahāloto he 1871 mo e 1945 ne lagaua e lalafi taha e Sihamani. Ti liu au mogoia ke fakaako e vagahau Sihamani haaku. He kamata au ke he gahua takaiaga, nakai loga lahi e motokā, tau televisoni, po ke tau lomi tohi he magamotu ia ti nakai fai matutakiaga he tau letiō po ke tau komopiuta fakatagata. Ka e nakai momoko po ke agihoa e moui haaku. Mooli, ko e magaaho fiafia lahi. He muitua e fakatonuaga he Tohi Tapu ke tumau e ‘mitaki he mata,’ kakano kua gahoa lahi e tau fakatauhele he fekafekau ki a Iehova he magahala ia ke he mogonei.—Mata. 6:19-22.

He Toloaga “Triumphant Kingdom” i Paris ko e mogo uho lahi mahaki ki a au. I ai ne feleveia e au e hoana haaku amui, ko Irène Kolanski, ne kamata e fekafekauaga mau he tau fakamua to kamata haaku. Ko e tau matua Polani haana ko e Tau Fakamoli fakamakutu kua leva. I Falani, ne ahiahi atu a Adolf Weber ki a lautolu. Ko ia ko e tagata taute katene he Matakainaga ko Russell ti hau ai ki Europa ke fakamatala e tala mitaki. Ne mau au mo Irène he 1956, ti matutaki a ia mo au ke he gahua takaiaga. Ko ia ko e lagomatai mitaki ke he tau tau oti ia!

Ua e tau he mole, fai fakaofo foki ne tatali ki a au—ne fifili au mo leveki faahimotu. Ke maeke ke tokologa e matakainaga taane kua latatonu, ne matutaki au ke aahi atu e falu fakapotopotoaga ko e leveki takaiaga. Ko e magaaho lavelave mooli a ia! He lafi ke he fakamatala 100 e tulā he mahina, he tau faahitapu takitaha ne fai lauga au ke taute, tolu e fakaako tohi ke ahiahi atu, fakakia e tau fakamauaga, mo e tauteute e tau hokotaki. To maeke fēfē ke fakatau e tau magaaho ke totou e Kupu he Atua? Taha ni e tali ne kitia e au—ne hehele e au e tau lau he Tohi Tapu tuai ti toka falu ma haaku. He ha mogo ne leo au ke he taha ke hoko mai ke lata mo e fakatokaaga, ne aaki mai e au e tau lau mo e totou ai. Ko e tau magaaho kū ia he fakahauhauaga fakaagaaga ne fakamalolō e fifiliaga haaku ke matutaki ke he kotofaaga haaku.

He 1967, ne uiina a Irène mo au ke eke mo tau matakainaga tumau he magafaoa Peteli i Boulogne-Billancourt. Ne kamata au ke gahua he Faahi Gahua he Fekafekauaga, ti molea e 40 e tau he mole, ko au agaia he kotofaaga ia. Ko e vala fiafia he gahua haaku ko e tali e tau tohi ne talahau e tau hūhū faka-Tohi Tapu. Kua fiafia mooli au he keli hifo ke he kupu he Atua mo e “fakatonu atu . . . ke he vagahau mitaki”! (Filipi 1:7) Fiafia foki au he taute e tau fakatutalaaga Tohi Tapu he tapuakiaga pogipogi ato kai ai. He 1976, ne fifili au ke eke mo tagata he La Komiti i Falani.

Ko e Puhala Moui ne Mua Atu

Pete he feleveia au mo e tau mogo kamatamata, ko e mogo uka lahi he moui haaku mogonei he fuakau mo e tau lekua malolō tino ne fakakaupā e mena kua maeke ia au mo Irène ke taute. Ka ko e totou mo e fakaako tokoua e Kupu he Atua kua fakatumau e amaamanakiaga ha maua ke mauokafua. Fiafia a maua he o he pasi ke he matakavi he fakapotopotoaga ke tala age e amaamanakiaga nei ke he falu. Ko e tau mena ne iloa e maua he molea e 120 e tau tokoua he fekafekauaga mau kua omoomoi a maua ke fakamalolō loto katoa e puhala nei ki a lautolu oti kua manako ke kumi e moui fiafia, olioli mo e aoga. He tohi he Patuiki ko Tavita e tau kupu he Salamo 37:25, kua “motua tuai” ai a ia, ka e tuga a Tavita, kua “nakai kitia [foki e au] ha tagata tututonu kua tiaki.”

He moui katoa haaku, ne fakamalolō e Iehova au he puhala he Kupu haana. Ne talahau tuai he tau magafaoa haaku molea e 60 e tau kua mole, to eke e aga totou Tohi Tapu mo aga he moui katoa. Ne hako a lautolu. Kua eke ai​—mo aga he tau aho takitaha ne nakai tokihala au!

[Tau Matahui Tala]

[Fakatino he lau 5]

Simon mo au

[Fakatino he lau 5]

He fekafekau leveki faahimotu

[Fakatino he lau 5]

Ko e Tohi Tapu tatai ke he patu fakamua ne moua e au

[Fakatino he lau 6]

He aho mau ha maua

[Fakatino he lau 6]

Irène mo au ne fiafia he totou mo e fakaako e Kupu he Atua