Maeke Fēfē Haau a Magafaoa ke Fiafia?

Ko e vala tala nei kua fakalagā e tau hūhū kua liga hūhū e koe mo e fakakite e matakavi ka totou e koe e tau tali he Tohi Tapu haau. To fiafia e Tau Fakamoli a Iehova ke fakatutala e tau hūhū nei mo koe.

1. Ko e ha kua aoga lahi e fakamauaga ke he fiafia he magafaoa?

Ko Iehova ko e Atua fiafia ne fakatū e fakamauaga. Kua aoga lahi ke he fiafia he magafaoa ha kua nakai ni foaki e hoa ka e pihia foki mo e takatakaiaga haohao mitaki ke feaki e tau fanau. Fēfē e onoonoaga he Atua ke he fakamauaga? Manako a ia ke tumau tukulagi ti fakamau matafakatufono e fakalatahaaga he tagata taane mo e fifine. (Luka 2:1-5) Manako e Atua ke he tau taane mo e tau hoana ke mahani fefakamooliaki. (Heperu 13:4) Kua fakaatā e Iehova e tau Kerisiano ke tau vevehe mo e liu ke mau foki ka taute he hoa ha lautolu e mahani faivao.—Totou Mataio 19:3-6, 9.

2. Lata fēfē e taane mo e hoana ke felevekiaki?

Ne tufuga e Iehova e tau tagata taane mo e tau fifine ke taute e tau matagahua felagomataiaki he fakamauaga. (Kenese 2:18) Ko e ulu he magafaoa, kua lata e taane ke takitaki e levekiaga fakatino ma e magafaoa haana ti fakaako a lautolu hagaao ke he Atua. Kua lata a ia ke foaki noa e fakaalofa haana ma e hoana haana. Ko e tau taane mo e tau hoana kua lata ke fefakaalofaaki mo e fefakalilifuaki. Ha kua nakai mitaki katoatoa e tau taane mo e tau hoana oti, ko e fakaako ke fakamagalo ko e matapatu ke he fiafia he fakamauaga.—Totou Efeso 4:31, 32; 5:22-25, 33; 1 Peteru 3:7.

3. Lata kia ke tiaki e koe e fakamauaga nakai fiafia?

Ka moua e koe mo e hoa haau e tau mena uka, gahua fakalahi ke fefakakiteaki e mahani fakaalofa. (1 Korinito 13:4, 5) Kua nakai fakamalolō he Kupu he Atua e mavehevehe ko e puhala ke fakamafola e tau lekua he fakamauaga. Ka e, he tau tuaga uka lahi to lata e Kerisiano ke fifili kua latatonu ke mavehevehe po ke nakai.—Totou 1 Korinito 7:10-13.

4. Tau fanau, ko e heigoa kua manako e Atua ma mutolu?

Manako a Iehova ki a koe ke fiafia. Kua foaki e ia ki a koe e fakatonuaga ne mua atu e mitaki ke he puhala ke fiafia e vahā fuata haau. Manako a ia ki a koe ke aoga mai he pulotu mo e iloaaga he tau matua haau. (Kolose 3:20) Kua loto fakaaue a Iehova ke he tau mena oti kua taute e koe ke fakaheke a Ia.—Totou Fakamatalaaga 11:9–12:1; Mataio 19:13-15; 21:15, 16.

5. Tau matua, maeke fēfē e tau fanau ha mutolu ke moua e fiafia?

Lata ia koe ke gahua malolō ke moua e tau mena kai, fale, mo e tau mena tui ma e tau fanau haau. (1 Timoteo 5:8) Ka e ke maeke e tau fanau haau ke moua e fiafia, kua lata ia koe ke fakaako a lautolu ke fakaalofa ke he Atua mo e fakaako mai ia ia. (Efeso 6:4) Ko e fifitakiaga haau he fakakite e fakaalofa ma e Atua ka fakalagalaga lahi e loto he tama haau. Ka fakavē ke he Kupu he Atua, maeke he fakaakoaga haau ke fakahakohako e manamanatuaga he tama haau ke he puhala mitaki.—Totou Teutaronome 6:4-7; Tau Fakatai 22:6.

Kua aoga e tau fanau ka fakamafana mo e atihake e koe a lautolu. Kua lata foki a lautolu ke fakahako mo e akonaki. Ko e fakamahaniaga pihia kua puipui a lautolu mai he mahani ke fofō e fiafia ha lautolu. (Tau Fakatai 22:15) Ka e lata e akonakiaga ke nakai kakā po ke vale.—Totou Kolose 3:21.

Kua lolomi he Tau Fakamoli a Iehova loga e tohi kua talaga pauaki ke lagomatai e tau matua mo e tau fanau. Ko e tau tohi nei kua fakavē ke he Tohi Tapu.—Totou Salamo 19:7, 11.

Ma e falu vala tala foki, kikite e veveheaga 14 he tohi nei, Ko e Heigoa ne Fakaako Moli he Tohi Tapu?, ne taute fakailoa he Tau Fakamoli a Iehova.