Tau Hūhū he Tau Tagata Totou

Ko e heigoa haaku ka taute ka fai hūhū au hagaao ke he taha mena ne totou e au he Tohi Tapu po ke ka manako fakatonuaga au hagaao ke he lekua fakatagata?

Kua fakamalolō he Tau Fakatai 2:1-5 a tautolu takitokotaha ke “kumi fakamakutu” e loto matala mo e loto manamanatu tuga he kumi e tautolu e “koloa galo.” Kakano e mena nei kua lata ia tautolu ke eketaha he kumikumi e tau tali ke he tau hūhū faka-Tohi Tapu ha tautolu mo e kumi e tau tali ke he tau lekua fakatagata ha tautolu. Maeke fēfē ia tautolu ke taute e mena nei?

Ko e tohi Benefit From Theocratic Ministry School Education, lau 33 ke he 38, ne fakamaama e “Puhala ke Taute e Kumikumiaga” he fakaaoga e tau koloa ne foaki he “fekafekau fakamoli mo e loto matala.” (Mata. 24:45) He lau 36 ne fakamaama e puhala ke fakaaoga e Watch Tower Publications Index, ne kua vehevehe e tau fufuta takitaha ke he fakamauaga matakupu mo e fakamauaga kupu tohi. Taute he puhala nei ke maeke ke kumikumi e tau matapatu kupu po ke tau kupu Tohi Tapu, ka moua ai e koe e fakamauaga he tau tohi ke kumi ki ai. Kia fakauka he kumikumi ke he tau tali po ke tau hatakiaga pauaki ne manako a koe ki ai. Manatu, ko e kumi a koe he “koloa galo,” ti lata ke fai magaaho mo e laliaga.

Mooli, na fai matakupu mo e tau kupu tohi ne nakai hagaao fakamahao e tau tohi ha tautolu ki ai. Ti pihia foki e mena ka talahau e tautolu hagaao ke he taha kupu ni he Tohi Tapu, kua liga nakai fakamaama e tautolu e tali ke he hūhū tonu ne manamanatu a koe ki ai. Kua mafuta mai foki he tau tala he Tohi Tapu e tau hūhū ha kua nakai fakamaama oti e tau vala tala he tau Tohiaga Tapu. Ti kua nakai moua mafiti e tautolu e tau tali ke he tau hūhū oti ne mafuta hake. Ke he tuaga pihia, lata ia tautolu ke kalo kehe mai he tali manatu hagaao ke he tau mena ne nakai moua e tali, neke putoia a tautolu ke he “tau mena ia ke tutupu ai e tau taufetoko, ka e nakai ko e fakamafanaaga mai he Atua ha ha he tua.” (1 Timo. 1:4; 2 Timo. 2:23; Tito 3:9) Ko e tau la ofisa po ke tau matapatu la he lalolagi kua nakai ha ha he tuaga ke kumikumi mo e tali e tau hūhū oti pihia ne nakaila fakatutala ki ai he tau tohi ha tautolu. Lata a tautolu ke fiafia kua foaki he Tohi Tapu e tau vala tala kua latatonu ke takitaki a tautolu he moui nei, ka e nakai fakamau foki e falu vala tala ke maeke ia tautolu ke moua e tua malolō ke he Punaaga faka-Atua he Tohi Tapu.—Kikite e tohi Fakatata Atu ki a Iehova, lau 185 ke he 187.

Ka e kua ka taute e koe e tau mena oti kua maeke ia koe ke kumikumi ke he matakupu ne lauia ai a koe ka e nakaila moua ia e takitakiaga po ke tali ne manako a koe ki ai? Kia atāina ke finatu ke he matakainaga motua fakaagaaga, liga ko e taha he tau motua he fakapotopotoaga. Ha ha ia lautolu e iloilo lahi ke he Tohi Tapu pihia foki e tau mena iloa ke he moui faka-Kerisiano. Ko e ha lautolu a lagomatai lagotatai kua felauaki lahi ka manako fakatonuaga a koe hagaao ke he lekua po ke fifiliaga fakatagata, ha kua iloa e lautolu a koe ti tata ki a koe mo e tuaga haau. Ti nakai nimo ke liogi fakatonu ki a Iehova hagaao ke he tau tupetupe haau mo e ole ki a ia ke takitaki e manamanatuaga haau puhala he agaaga tapu haana, “ha ko Iehova kua foaki mai e iloilo . . . mo e loto manamanatu.”—Fakatai 2:6; Luka 11:13.