“Matulituli Mogonei ka e Nakai Tukulagi!”

Ne talagau e Sara van der Monde

Fa tala mai e tau tagata ki a au, “Sara, ko e fulufuluola ha ia he mamali haau. Ko e ha ne fiafia lahi tumau a koe?” Tala age au ki a lautolu kua moua e au e amaamanakiaga uho. Ti fakakatoatoa ai ke he tau kupu nei, “Ko au hane matulituli mogonei ka e nakai tukulagi!”

KUA fanau au he 1974 i Paris i Falani. Ne uka e fanauaga haaku ti fakamui kua moua au he gagao cerebral palsy. Fakakaupā ni e gahuahuaaga he tau alaga haaku he tino, ti uka e vagahau haaku ke maama. Ne lauia foki au he gagao epilepsy ti mukamuka ke pikitia he tau gagao.

He ua e tau haaku, ne hiki e magafaoa haaku ki Melbourne, i Ausetalia. Ua e tau he mole, ne tiaki e Tete a Mami mo au. Ko e magaaho fakamua a ia he manatu e au e logonaaga tata ke he Atua. Ko Mami, ko e taha he Tau Fakamoli a Iehova ne uta tumau au ke he tau feleveiaaga Kerisiano, ne fakaako e au i ai na fakaalofa e Atua ki a au ti leveki mai au. Ko e iloilo ia, fakalataha mo e fakaalofa mo e mafanatia ha Mami, ne lagomatai au ke logona hifo e haohao mitaki pete ni kua hiki e tau tuaga ha maua.

Ne fakaako foki e Mami au ke liogi ki a Iehova. Mooli, na mukamuka lahi atu e liogi ki a au ke he tutala. He liogi, ne nakai taufetului au ke fakalea e tau kupu, ka e “logona” e au hane gahuahua ai he manamanatuaga haaku. Ha kua uka e vagahau haaku ke maama, kua mafanatia ke iloa na maama e Iehova e tau mena oti, pete he talahau fakaeneene ai e au ke he manamanatuaga haaku po ke nakai hohoko e vagahau.—Sala. 65:2.

Fahia ke he Tau Lekua he Tino

He mogo ne lima e tau haaku, kua holo ki mua e gagao palsy haaku ti lata au ke moua e lalagoaga he tau tokotoko lapatoa mamafa ke maeke ke fano. Ne mua atu e taulifa haaku ke he fano noa haaku! He 11 e tau, ne nakai maeke au ke fano. Fakahiku, ne nakai maeke au ke takoto mo e matike mai he mohega ka nakai lagomatai he matini hila ke lagaki au ke fakanofo he peleō fakataveli ne holo he enisini, ne fakaholo ne au he fakaaoga e kakau he lima (hand lever).

Tala atu e au na momoko au he falu mogo ha ko e tau matulituli haaku. Ka e manatu agataha e au e talahauaga pauaki he magafaoa ha mautolu: “Ua tupetupe ke he tau mena ne nakai maeke a koe ke taute. Ka e taute e tau mena kua maeke a koe ke taute.” Ne lagomatai he mena nei au ke maeke ke heke he nua, he toga taulā, he vaka, kemuaga, mo e fakaholo foki e motokā he puhala lautote! Ne fakakite e au e aga atisi haaku he vali fakatino, tuitui, tia he tau kalaie, tia aki e tau filo, mo e taute he tau koloa kelekele.

Ha kua kelea lahi e matulituli haaku, ne hūhū toko he falu e lotomatala haaku ke tapuaki ke he Atua tuga he maeke he tagata lahi. He 18 e tau haaku, ne tomatoma he faiaoga a au ke toka e kaina ke “atāina mai” he lotu he matua fifine haaku. Ti ole foki a ia ke lagomatai au ke kumi e mena ke nofo ai. Ka e tala age au ki a ia to nakai toka e au e tua haaku mo e to toka ni e au e kaina he mogo ka amanaki au ke nofo tokotaha.

Nakai leva he mole e mena ia ne tupu mo e faiaoga haaku, ne papatiso au ko e taha he Tau Fakamoli a Iehova. Ua e tau he mole, ne hiki atu au ke he fale ne nakai lahi. Hinei, kua moua e au e lagotatai fiafia he lalagoaga mo e nofo tokotaha.

Ko e Ole Fakaofo

Ke he tau tau loga ne fehagai au mo e falu kamatamata he tua. He taha aho ne ofomate au ha ko e taha tama aoga—matulituli foki—ne ole ki a au ke mau a ia. Fakamua, ne hohoko e manava haaku. Tuga ne laulahi he tau fifine fuata, ne manako lahi au ke fai hoa he moui. Pete he tatai e tau matulituli kua nakai fai fakavēaga ma e fakamauaga fiafia. Mua atu, kua nakai fakalataha e fuata taane ke he tua haaku. Ko e ha maua a tau taofiaga, tau matagahua, mo e tau foliaga kua kehekehe lahi mahaki. To maeke fēfē mogoia ia maua ke nonofo tokoua? Kua eketaha foki au ke omaoma e takitakiaga maaliali he Atua ke mau ni mo e matakainaga Kerisiano. (1 Kori. 7:39) Ti ko e mena ia, ne tala age totonu e au ke he fuata taane kua nakai talia e au e ole haana.

Ke he aho nei foki, kua iloa e au ne taute e au e fifiliaga hako. Ti nakai fakauaua e loto haaku to fiafia au he lalolagi foou ne mavehe mai he Atua. (Sala. 145:16; 2 Pete. 3:13) Ka ko e magaaho nei kua eketaha au ke mahani fakamooli tumau ki a Iehova mo e ke fiafia ke he tau tuaga haaku mogonei.

Kua amanaki lahi atu au ke he aho ka matike au mai he nofoa fakataveli haaku ti poi tuga e matagi. Ti kalaga mogoia au, “Ne matulituli au, ka e mogonei kua malolō katoatoa au—tukulagi!”