Maeke Fēfē a Tautolu ke Fifili e Tau Kapitiga Mitaki?

Ko e vala tala nei kua fakalagā e tau hūhū kua liga hūhū e koe mo e fakakite e matakavi ka totou e koe e tau tali he Tohi Tapu haau. To fiafia e Tau Fakamoli a Iehova ke fakatutala e tau hūhū nei mo koe.

1. Ko e ha kua lata ia tautolu ke fifili fakamitaki e tau kapitiga?

Laulahi he tau tagata kua manako ke talia he falu. Ko e manako nei kua fa taute a tautolu ke fifitaki e falu ne agaagai ia tautolu. Ti ko e tau kapitiga ha tautolu kua malolō e fakaohooho ke he tau aga ne tupu he tau loto ha tautolu. Ko e fifiliaga he tau kapitiga ha tautolu ka fakaohooho a tautolu ke eke mo tau tagata pihia.—Totou Tau Fakatai 4:23; 13:20.

Ko e tagata tohia Tohi Tapu ko Tavita ne fifili fakapulotu e tau kapitiga haana. Ne feoaki a ia mo lautolu kua lagomatai a ia ke fakatumau e mahani hakohako haana ko e fekafekau he Atua. (Salamo 26:4, 5, 11, 12) Ma e fakatai, ne olioli e Tavita e kapitiga ha Ionatana ha kua fakamalolō e Ionatana a ia ke falanaki ki a Iehova.—Totou 1 Samuela 23:16-18.

2. Maeke fēfē a koe ke eke mo kapitiga he Atua?

Pete he malolō ue atu a Iehova, kua maeke mooli a tautolu ke eke mo tau kapitiga haana. Ma e fakatai, kua eke a Aperahamo mo kapitiga he Atua. Ne falanaki mo e omaoma a Aperahamo ki a Iehova, ti manamanatu a Iehova ki a ia ko e kapitiga. (Kenese 22:2, 9-12; Iakopo 2:21-23) Ka falanaki a tautolu ki a Iehova mo e taute e mena ne talahau e ia ki a tautolu ke taute, maeke foki a tautolu ke eke mo tau kapitiga he Atua.—Totou Salamo 15:1, 2.

3. Maeke fēfē a koe ke aoga mai he tau kapitiga mitaki?

Ko e tau kapitiga mooli kua mahani fakamooli mo e lagomatai a koe ke taute e mena kua hako. (Tau Fakatai 17:17; 18:24) Ma e fakatai, pete kua liga 30 e tau ha Ionatana ne fakamua ia Tavita ti fa mahani ko e hakega ke he nofoaiki ha Isaraela, ne lalago fakamooli e Ionatana a Tavita ko ia ne fifili he Atua ke eke mo patuiki. Ko e tau kapitiga mooli foki kua loto malolō ke fakahako a koe ka kitia e lautolu kua mahani goagoa a koe. (Salamo 141:5) Ko e tau kapitiga ne fakaalofa ke he Atua to lagomatai a koe ke feaki e tau mahani mitaki.—Totou 1 Korinito 15:33.

Maeke ia koe ke feleveia mo e tau tagata kua fakalataha ke he haau a fiafia ke he mena kua hako he Fale he Kautu he Tau Fakamoli a Iehova. To moua e koe e tau kapitiga ka atihake a koe he tau laliaga haau ke fakafiafia e Atua.—Totou Heperu 10:24, 25.

Ka e, liga fakaita foki he tau kapitiga ne ofania e Atua a tautolu he falu mogo. Ua mukamuka ke ita ha ko e tau hehē ha lautolu. (Fakamatalaaga 7:9, 20-22) Manatu, nakai fai kapitiga kua mitaki katoatoa ti ko e tau kapitiga ne ofania e Atua kua uho lahi ki a tautolu. Kua tomatoma he Kupu he Atua a tautolu ke fakamagalo e tau hepehepe he tau matakainaga Kerisiano.—Totou Kolose 3:13.

4. Ka e kua ka totoko e “tau kapitiga” ki a koe?

Tokologa e tagata ne mailoga, he kamata a lautolu ke moua e lagomatai ke maama e Kupu he Atua, falu he tau kapitiga tuai ha lautolu ne totoko atu ai. Liga kua nakai maama he tau kapitiga pihia e fakatonuaga aoga po ke amaamanakiaga mooli kua moua e koe he Tohi Tapu. Liga maeke ia koe ke lagomatai a lautolu.—Totou Kolose 4:6.

He falu tuaga, liga vaiga he “tau kapitiga” e tala mitaki ne talahau he Kupu he Atua. (2 Peteru 3:3, 4) Liga vaiga he falu e tau laliaga haau ke taute e mena kua hako. (1 Peteru 4:4) Ka tupu e mena ia ki a koe, liga lata ke fifili e koe ke eke mo kapitiga ha lautolu po ke kapitiga he Atua. Ka fifili a koe ke kapitiga mo e Atua, to fifili e koe e kapitiga uho he ha tagata.—Totou Iakopo 4:4, 8.

Ma e falu vala tala foki, kikite e veveheaga 12 mo e 19 he tohi nei, Ko e Heigoa ne Fakaako Moli he Tohi Tapu?, ne taute fakailoa he Tau Fakamoli a Iehova.