Ko e Ha ne Poaki he Atua ke he Tau Tagata Tapuaki Haana ke Mau Ni Hokoia ke he Tau Matakainaga Talitonu?

▪ Ko e Fakatufono he Atua ke he motu ha Isaraela ne putoia e poakiaga nei hagaao ke he tau tagata he tau motu ne agaagai ia lautolu: “Aua neke fakafetauaki a mutolu mo lautolu, aua neke ta age hau a tama fifine ma e hana tama tane, aua foki neke ta mai hana tama fifine mo e hau a tama tane.” (Teutaronome 7:3, 4) Ko e heigoa e kakano ne fakatapu ai?

Hagaao ke he tau tagata he Atua ko e motu katoa, ne iloa e Iehova kua manako a Satani ke fakakelea e tau tagata Haana he uhu kehe a lautolu ke tapuaki atu ke he tau atua fakavai. Ti hataki he Atua ko e tau tagata nakai talitonu to “uhu kehe ai e ia hau a tama tane ke ua mui mai a ia kia au, ka e fekafekau ai ke he tau atua kehe.” Ko e mena aoga lahi mahaki anei. Kaeke ke mumuitua e motu ha Isaraela ke fekafekau ke he falu atua, to galo ia lautolu e taliaaga mo e puipuiaga he Atua, ti eke mo ola mukamuka ke he tau fī ha lautolu. Ti maeke fēfē ai e motu ke tupu mai e Mesia ne mavehe? Maaliali ai, kua fai kakano ati lali a Satani ke fakatakitaki mai e tau Isaraela ke femauaki mo lautolu ne nakai tua.

Hagaao ke he tau tagata takitokotaha, manatu na leveki he Atua e tau tagata haana. Iloa e ia ko e fiafia mo e tuaga mitaki ha lautolu takitokotaha kua fakavē ke he moua e lautolu e fakafetuiaga tata mo ia ko e ha lautolu a Atua. Kua tonu kia e tupetupe ha Iehova ke he fakaohoohoaga kelea he hoa nakai tua? Manamanatu ke he fakafifitakiaga he Patuiki ko Solomona. Ne iloa e ia e hatakiaga ha Iehova hagaao ke he tau hoana nakai tua: “To fakaliliu kehe e lautolu ha mutolu a tau loto ke mumui atu ke he tau atua ha lautolu.” Ha ko ia ko e tagata ne mua atu e lotomatala, liga kua logona hifo e ia kua nakai lata a ia mo e fakatonuaga he Atua, mo e kua nakai hagaao ai ki a ia. Ne fakaheu ai e ia. Ko e heigoa e fua? “Ti fakaliliu kehe ai he tau hoana hana hana loto . . . ke mumui atu ke he tau atua kehe.” Ko e kelea ha ia! Ne galo ia Solomona e taliaaga ha Iehova, ti kua vevehe ua e tau tagata haana ha ko e nakai fakamooli haana.—1 Tau Patuiki 11:2-4, 9-13.

Liga manatu he falu kua mitaki falu tuaga ia. Ke fakatai, ne faihoana e tagata Isaraela ko Mahalona ke he fifine Moapi ko Ruta, ti ofoofogia ai e talitonu he fifine ia. Ka ko e faihoana ke he fifine Moapi ko e fifiliaga hagahagakelea. Ne nakai nava ki a Mahalona he faihoana ke he tama fifine Moapi; ne mate fuata a ia, liga ato ui e Ruta a Iehova ko e Atua haana. Ko e matakainaga ha Mahalona ko Kiliona, ne faihoana ke he fifine Moapi ko Orepa, ne pipiki mau ni ke he “hana tau atua.” Ka ko Poasa, ne faihoana a ia ki a Ruta he leva e eke a ia mo fifine talitonu. He magaaho fakamui, ne manatu he tau Iutaia a ia ko e “tagata liliuina moolioli.” Ko e mau ha Ruta mo Poasa ko e fakamonuinaaga ki a laua tokoua.—Ruta 1:4, 5, 15-17; 4:13-17.

Ti kua aoga kia ke manamanatu ko e fakafifitakiaga pihia tuga ha Mahalona mo Ruta kua liga totoko ke he fakatonuaga ha Iehova ke mau ni mo e tagata kua tua? Kua tatai kia e manamanatu pihia mo e manatu ka moua he tagata pelē tupe e tau tupe loga ti pehē mogoia ko e pele tupe ko e puhala kua mitaki lahi ke leveki aki e moui?

Kua fakamalolō he Tohi Tapu e tau Kerisiano he vahā nei ke mau ni “kia lata mo e iki.” Kua hataki mai ai ke he “hahamo a mutolu mo e nakai tatai fakalataha mo lautolu kua nakai tua.” Ko e fakatonuaga pihia kua latatonu ma e tau Kerisiano mooli hane kumi e hoa. Ma lautolu ne kua mau ki a lautolu ne nakai tua, kua foaki he Tohi Tapu e fakatonuaga aoga ke he puhala ke fahia fakamitaki mo e paleko ia. (1 Korinito 7:12-16, 39; 2 Korinito 6:14) Ko e tau fakatonuaga oti ia kua fakakite kua manako a Iehova ko e Atua, ko e Punaaga he fakamauaga, ke fiafia a tautolu ko e haana tau tagata tapuaki—he nofo tokotaha po ke kua mau.