To Falanaki Nakai e Koe e Atua?

MANAMANATU kua ha ha ia koe e kapitiga kua nava lahi e koe, ka e taute e ia e mena kua nakai maeke a koe ke maama. Kua tuhituhi he falu e mahani haana ti fakafili e tau logonaaga haana, he pehē kua favale e kapitiga haau. To mafiti kia a koe ke talitonu a lautolu, po ke to fakatali a koe ke logona e faahi he tala he kapitiga haau? Ka nakai ha ha a ia i ai ke fakamaama e tala haana, to fakauka nakai a koe he fakatali ke he manatu mooli haana?

Ato tali, to liga manako a koe ke iloa atu foki. To hūhū a koe, ‘Iloa lahi fēfē e au e kapitiga nei, ti fakavē ke he heigoa e nava haaku ki a ia?’ Ai kelea. Ka e manamanatu: Nakai kia fakaaoga e tautolu e tau matapatu fakaakoaga taha ia ke he hūhū nei ko e mena favale kia e Atua?

Liga uka ki a koe ke maama e falu mena ne taute he Atua, po ke liga fakagogoa a koe ke he kakano ne fakaatā e ia ke tupu. Tokologa e tagata ka tala atu ki a koe kua favale e Atua ti to tomatoma ki a koe ke fakafili e tau logonaaga haana tuga ne taute e lautolu. To manamanatu fakalahi kia a koe ki a ia ato iloa mitaki e koe? Liga fakavē e tali ke he iloa mitaki e koe e Atua. Hūhū hifo ki a koe, ‘Ko e vahega kapitiga fēfē e Atua ki a au?’

Ka uka e moui haau, liga kamatamata a koe ke talahau kua nakai ko e kapitiga mooli e Atua. Ka e manamanatu la. Kua fakalago kia ke he Atua e tau mena uka he moui haau​—po ke tau monuina? He kitia e tautolu, ko Satani ko e “iki he lalolagi nai,” nakai ko Iehova. (Ioane 12:31) Ko Satani i tua he lahi he tau matematekelea mo e nakai fakafili tonu he lalolagi nei. To nakai kia talia e koe ko e tau nakai mitaki katoatoa ha tautolu ni mo e tau tuaga hikihiki nakai mauokafua kua fakatupu e loga he tau lekua ha tautolu?

He taha faahi, ko e heigoa ne fakalago ki ai e Atua? Manamanatu ke he mena ne talahau he Tohi Tapu: ko e Atua “ko ia ne eke e lagi katoa mo e lalolagi”; ko e tau gahua haana ne putoia e tau tino ha tautolu, ne ‘eke mo e ofo’; ti ko Iehova “ko e Atua ha ha he lima hana hāu a fafagu.” (Salamo 124:8; 139:14; Tanielu 5:23) Ko e heigoa e kakano he tau mena oti ia?

Kakano kua tuku atu e tau fafagu oti ha tautolu, ko e tau momoui katoa ha tautolu ke he ha tautolu a Tufuga. (Gahua 17:28) Kakano ko e mena fakaalofa he moui, ko e fulufuluola he lalolagi ne viko takai ia tautolu, ko e fiafia he fakaalofa mo e kapitiga, ko e olioli he kamata, aamo, leo, mo e honogi​—ko e tau mena fakaalofa oti nei mai he Atua. (Iakopo 1:17) Nakai kia talia e koe ko e tau monuina ia ne eke a ia mo Kapitiga kua latatonu ma e matalahi mo e falanaki ha tautolu?

Mooli, liga uka ia koe ke falanaki ke he Atua. Liga logona hifo e koe kua nakaila iloa mitaki e koe a ia ke falanaki ki a ia. Ti maama e mena ia. He tau vala tala kūkū nei, nakai maeke a tautolu ke iloa e tau kakano oti ne fakafili he falu e Atua ke favale. Ka e nakai kia uho lahi e laliaga ke iloa mitaki e Atua?a Mauokafua a mautolu he taute pihia e koe, to iloa e koe e tala mooli ke he Atua. Favale kia a ia? Nakai pihia: “Ko e Atua ko e fakaalofa a ia.”​—1 Ioane 4:8.