TAU HŪHŪ TOHI TAPU KUA TALI
Ko hai mooli kua pule ke he lalolagi nei?
Kaeke ko e Atua e pule he lalolagi nei, to loga lahi kia e matematekelea?
Tokologa e tagata ne talitonu ko e Atua mooli ne pule ke he lalolagi nei. Kaeke ke mooli e mena ia, kua lata nakai e lalolagi ke puke he matematekelea? (Teutaronome 32:4, 5) Hagaao ke he Tohi Tapu, ko e lalolagi i lalo he pule he taha kua kelea muitui.—Totou 1 Ioane 5:19.
Moua fēfē he taha kua kelea muitui e pule ke he tau tagata? He kamataaga he fakamauaga he tagata, ne totoko e agelu ke he Atua ti fakaohooho e hoa tagata fakamua ke totoko foki. (Kenese 3:1-6) Ne fifili e hoa ke omaoma ke he agelu totoko ko Satani, ti eke a ia mo pule ha laua. Ko e Atua Malolō Ue Atu ni e Pule kua tonuhia, ka e manako a ia ke he tau tagata ke fifili e pule haana ha ko e fakaalofa ha lautolu ki a ia. (Teutaronome 6:6; 30:16, 19) Momoko ai, laulahi he tau tagata ne fakahehē ke taute e tau fifiliaga kelea pihia tuga ne taute he hoa fakamua.—Totou Fakakiteaga 12:9.
Ko hai ka fakamafola e tau lekua he tagata?
To fakaatā kia he Atua a Satani ke matutaki e pule kelea muitui haana? Nakai! To fakaaoga he Atua a Iesu ke utakehe e tau mena kelea muitui ne taute e Satani.—Totou 1 Ioane 3:8.
Foaki he Atua ki a Iesu e malolō ke moumou a Satani. (Roma 16:20) Ti to pule e Atua ke he tau tagata mo e liuaki e tau tagata ke he moui fiafia mo e mafola ne finagalo a ia ki ai he kamataaga.—Totou Fakakiteaga 21:3-5.