Tau Matua​—Leveki ha Mutolu a Tau Fanau

1, 2. (a) Ko e heigoa falu matagahua he leveki mamoe Isaraela? (e) Tatai fēfē e tau matua ke he tau leveki mamoe?

KE HE vahā i tuai i Isaraela, kua uka lahi e moui he tau leveki mamoe. Ne gahua a lautolu i fafo he laātititi mo e makalili, ti kua lata ia lautolu ke puipui e tau mamoe mai he tau manu vale mo e tau tagata kaihā. Kua kumikumi tumau he tau leveki mamoe e tau mamoe takitaha mo e leveki a lautolu ne gagao po ke pākia. Ne mataala pauaki a lautolu ke he tau punua mamoe ha kua lolelole lahi a lautolu nakai tuga e tau mamoe lalahi.​—Kene. 33:13.

² Ko e tau matua Kerisiano kua lata ke fakakite e tau mahani tuga he tau leveki mamoe. Kua ha ha he tau matua e matagahua ke feaki e tau tama ha lautolu fakatatau ke he tau puhala ha Iehova. (Efeso 6:4) Mukamuka tumau nakai e mena ia? Nakai! Ne totoko tumau e tau tama ha ko e tau manatu ne fakaohooho e Satani. Lafi ke he mena ia, ha ha he tau tama e tau aga nakai mitaki katoatoa ha lautolu. (2 Timo. 2:22; 1 Ioa. 2:16) Maeke fēfē a koe ke lagomatai e tau fanau haau? Kia fakatutala a tautolu ke he tolu e mena ka taute e koe ke leveki e tau fanau haau: (1) iloa a lautolu, (2) fagai a lautolu, mo e (3) takitaki a lautolu.

ILOA E FANAU HAAU

3. Maeke fēfē e tau matua ke iloa mitaki e tau fanau ha lautolu?

³ Ko e leveki mamoe mitaki kua matakite fakamitaki ke he tau mamoe takitaha ha kua manako a ia ke iloa kua malolō ai. Pehē e Tohi Tapu: “Iloa mitaki e koe e tau tino he hāu a tau mamoe.” (Fakatai 27:23) Ko e matua, manako a koe ke iloa mitaki “hāu a tau mamoe,” ko e tau fanau haau. Ke taute e mena nei, kua lata ia koe ke mailoga e tau gahua he tau fanau haau mo e iloa e tau manatu mo e tau logonaaga ha lautolu. Taute fēfē e koe e mena ia? Lata ia koe ke tutala tumau mo e tau fanau haau.

4, 5. (a) Ko e heigoa e tau manatu aoga ka lagomatai e tau fanau ke atāina ke fakatutala e tau manatu mo e tau logonaaga ha lautolu? (Kikite fakatino he kamataaga.) (e) Ko e heigoa kua taute e koe ke fakamukamuka e tau tama haau ke tutala ki a koe?

⁴ Falu matua ne uka lahi e matutakiaga ka hoko e tau tama ha lautolu ke he fuata mui. Liga nakai manako e tau fuata mui ke fakatutala e tau manatu mo e tau logonaaga ha lautolu. Ka pihia e tau tama haau, ko e heigoa haau ka taute? Kia nakai logona hifo kua lata ia koe ke loloa mo e hokulo e tau fakatutalaaga mo lautolu. Ka e, lali ke tutala ki a lautolu he puhala totoka. (Teu. 6:6, 7) Fakaaoga e magaaho mo lautolu. Ō hui mo lautolu. Uiina a lautolu ke pelē mo koe po ke gahua tokoua ke he taha matafekau he fale. Ka totoka e tau tama haau, to liga logona lahi e lautolu e fakatotoka mitaki he fakatutala e tau manatu mo e tau logonaaga ha lautolu.

⁵ Ka e kua ka nakai fia loto agaia e tama haau ke tutala? Lali ke he taha puhala foki. Ma e fakatai, he nakai hūhū ke he tama fifine haau ko e fēfē e aho haana, tala age ki a ia hagaao ke he aho haau. Ti liga logona e ia e fakatotokaaga mitaki ke tutala hagaao ke he aho haana. Po ke ka iloa e puhala kua logona hifo e ia hagaao ke he matakupu, hūhū hagaao ke he mena ne tupu, nakai hagaao ki a ia. Maeke a koe ke hūhū ko e fēfē e logonaaga he tau kapitiga haana hagaao ke he matakupu. Ti maeke a koe ke hūhū ko e heigoa e fakatonuaga ka tala age e ia ke he tau kapitiga haana.

6. Logona fēfē he tau tama haau kua fai magaaho a koe ma lautolu ti mukamuka fēfē a lautolu ke tutala ki a koe?

⁶ To makai lahi e tau tama haau ke matutaki mo koe ka logona hifo e lautolu kua atā a koe mo e mukamuka ke tutala ki ai. Ka tuga e lavelave tumau a koe ke fai magaaho mo lautolu, to nakai tala atu he tau tama haau e tau lekua ha lautolu ki a koe. Maeke fēfē a koe ke mukamuka ke tutala ki ai? Taute foki taha mena he nakai ni talahau e tau kupu, “Maeke ia koe ke tutala ki a au he ha magaaho.” Lata e tau fuata mui haau ke iloa to nakai hogohogo manava a koe ke he mena ka talahau e lautolu. Kua lata foki a lautolu ke iloa kua aoga e tau lekua ha lautolu ki a koe. Ko Kayla ne hogofulu ma hiva e tau he moui, ne pehē: “Maeke au ke tutala ke he matua taane haaku hagaao ke he ha mena ni. Nakai fakatauhele a ia, ti nakai fakafili a ia; kua fanogonogo ni a ia. Ti talahau tumau e ia e fakatonuaga mitaki lahi mahaki ki a au.”

7. (a) Maeke fēfē e matua ke lagotatai ka fakatutala ke he matakupu tuga e fakatū kapitiga ke he tama taane mo e tama fifine? (e) Fakahogohogo manava fēfē he tau matua e tau fanau ha lautolu?

⁷ He falu magaaho kua lata a koe ke fakatutala mo e tau tama haau ke he tau matakupu kua uka ke tutala hagaao ki ai, tuga e fakatū kapitiga tama taane mo e tama fifine. Ka taute e koe, mailoga kua fakaako e koe a lautolu ke he puhala hako ke fakafehagai ki ai. Ma e fakatai, fakalata kua fano a koe ke he fale kai ti kitia ni hokoia e tau hatakiaga he tohi kai hagaao ke he tau mena kai kua kona. Liga toka e koe e fale kai ia ti fano ke he taha foki. Ko e mena taha ia ka tupu ke he tau fanau haau. Ka hataki tumau haau a fakatonuaga ki a lautolu, to liga fakahogohogo manava ke he tau tama haau ti nakai liu hūhū ki a koe ma e fakatonuaga haau. (Totou Kolose 3:21.) Ka e lali ke lagotatai. Pehē e matakainaga fifine fuata ne higoa ko Emily: “Ka tutala e tau matua haaku ki a au hagaao ke he fakatū kapitiga ke he tama taane, ne nakai taute e laua e matakupu ke tuga kua kelea. Ne fakamaama e laua e fiafia ke iloa e taha tagata mo e moua e hoa he fakamauaga. Lagomatai he mena nei au ke logona e fakatotokaaga he tutala ki a laua hagaao ki ai. Manako au ke putoia a laua he ha fakafetuiaga haaku ka e nakai fufū ai mai ia laua.”

8, 9. (a) Ko e heigoa e tau fua ka moua mai he fakauka mo e fanogonogo ka e nakai fakatauhele? (e) Ko e heigoa e kautūaga haau he fanogonogo ke he tau tama haau?

⁸ Kia fakauka ti fanogonogo fakamitaki ke he tama haau. Fakakite he mena nei kua mukamuka a koe ke tutala ki ai. (Totou Iakopo 1:19.) Ko e matua fifine tokotaha ne higoa ko Katia ne pehē: “He tau mogo kua mole, ne nakai fakauka lahi au ke he tama fifine haaku. Nakai age au ha magaaho ke fakaoti e mena ne talahau e ia. Kua mategūgū lahi au ke fanogonogo po ke nakai loto ke fakatauhele. Ha kua hiki e aga haaku mogonei, kua hiki foki he tama fifine haaku. Kua kaufakalataha lahi a ia.”

⁹ Ko e matua taane ne higoa ko Ronald ne pihia foki e mena ne tupu ke he tama fifine fuata mui haana. “He talahau e ia ki a au kua fia manako a ia ke he tama taane he aoga, ne ita lahi au he mogo fakamua,” he ui e ia. “Ka ko e mogo ne manamanatu au ke he fakauka mo e iloilo ha Iehova ke he haana tau fekafekau, manatu au to mitaki ke tuku age au e magaaho ke he tama fifine haaku ke fakakite e tau logonaaga haana ato lali au ke fakahako a ia. Fiafia au ha kua taute pihia e au! Ko e magaaho fakamua laia ne maama e au e tau logonaaga he tama fifine haaku. He oti e tala haana, ne mukamuka lahi au ke vagahau ke he puhala fakaalofa ki a ia. Ofo ai, kua talia lahi e ia e fakatonuaga haaku. Ne fakakite e ia e manako mooli haana ke hiki e aga haana.” He tutala tumau mo e tau tama haau kua lagomatai a koe ke iloa mooli e tau mena ne manamanatu mo e logona e lautolu. Ti ko e fua, to putoia lahi a koe ke he tau fifiliaga ne taute e lautolu.a

FAGAI E FANAU HAAU

10, 11. Lagomatai fēfē e koe e tau tama haau ke tumau he kupu mooli?

¹⁰ Ko e leveki mamoe mitaki kua iloa na maeke e tau mamoe ke hehē. Maeke e mamoe ke kai motie nakai mamao mai he fuifui mamoe. Fano fakahaga ai, ti mamao ligo ato vevehe kehe ai mai he fuifui. Mena taha ia ka tupu ke he tau tama. Kamata fakahaga a lautolu ke toka e kupu mooli. Liga kamatamata a lautolu ha ko e tau feoakiaga kelea po ke fakafiafiaaga hagahaga kelea. (Fakatai 13:20) Lagomatai fēfē e koe ke puipui mai he tuaga pihia neke tupu?

¹¹ He fakaako e tau tama haau, ua mule ke lagomatai a lautolu ka kitia e koe e tau faahi ne liga lata a lautolu ke holo ki mua. Lagomatai foki a lautolu ke fakamalolō e tau mahani mitaki kua ha ha ia lautolu. (2 Pete. 1:5-8) Ko e tapuakiaga he magafaoa ko e magaaho mitaki lahi mahaki ma mutolu ke taute e mena ia. Ko e Ha Tautolu a Fekafekauaga he Kautu ia Oketopa 2008 ne pehē: “Kua fakamalolō ke he tau ulu magafaoa ke hahamo ha lautolu a kotofaaga ki mua ha Iehova ke taute fakamitaki e fakaholoaga kakano lahi mo e tumau he fakaakoaga Tohi Tapu he magafaoa.” Fakaaoga fakapulotu nakai e koe e magaaho nei ke leveki e tau tama haau? Kia mauokafua kua loto fakaaue lahi e tau tama haau ke he tau laliaga kua taute e koe ke lagomatai a lautolu.​—Mata. 5:6; Mata. 6:33.

12. (a) Aoga fēfē e tau tagata fuata mai he tapuakiaga tumau he magafaoa? (Kikite foki e puha “Loto Fakaaue Ai a Laua.”) (e) Aoga fēfē a koe mai he tapuakiaga he magafaoa?

¹² Ko e fuata mui ne higoa ko Carissa mo e magafaoa haana ne aoga mai he fakahologa ha lautolu he Tapuakiaga he Magafaoa. Pehē a ia: “Fiafia au ha kua maeke ia mautolu oti ke nonofo auloa mo e tutala. He taute e mautolu e mena nei, kua fefakatataaki a mautolu mo e fakatupu e tau manamanatuaga mitaki. Fakatumau e matua taane haaku ke he fakaholoaga Tapuakiaga he Magafaoa ha mautolu. Atihake ai ke kitia kua uta fakahokulo e ia e Tapuakiaga he Magafaoa, ti taute he mena ia au ke uta fakahokulo foki. Kua foaki foki ki a au e tau kakano ke fakalilifu a ia ko e matua taane haaku mo e ulu fakaagaaga.” Ko e matakainaga fifine fuata ne higoa ko Brittney ne pehē: “Fakatata lahi he tapuakiaga he magafaoa a au ke he tau matua haaku. Fakakite ai kua manako a laua ke logona e tau lekua haaku ti kua fakaalofa mooli a laua. Kua lagomatai ai a mautolu ke eke mo magafaoa malolō mo e kaufakalataha.” Ko e foliaga pauaki he tau matua ke fakaako e tau tama ha lautolu ke fakaalofa ki a Iehova. Ko e tapuakiaga he magafaoa ko e taha he tau puhala mitaki lahi mahaki ke taute e mena nei.b

TAKITAKI E FANAU HAAU

13. Maeke fēfē e tama ke fakalagalaga ke fekafekau ki a Iehova?

¹³ Ko e leveki mamoe mitaki kua fakaaoga e tokotoko haana ke takitaki mo e puipui e fuifui mamoe haana. Ko e foliaga pauaki haana ke takitaki e tau mamoe haana ke he mena “ne tutupu mitaki ai e motie.” (Eseki. 34:13, 14) Ko e matua, ha ha ia koe e foliaga pihia. Manako a koe ke takitaki e fanau haau ke fekafekau ki a Iehova. Manako a koe ke he tau tama haau ke logona tuga he salamo ne tohi: “Haku Atua na e, kua fiafia au ke eke hāu a finagalo; ha i loto ia au hau a fakatufono.” (Sala. 40:8) Ka logona mooli pihia e tau tama haau, to manako a lautolu ke tukulele e tau momoui ha lautolu ki a Iehova ti papatiso. Lata ia lautolu ke lahi e maamaaga ke taute e fifiliaga aoga nei, ti kua lata a lautolu ke manako mooli ke fekafekau ki a Iehova.

14, 15. (a) Ko e heigoa kua lata ke eke mo foliaga he tau matua? (e) Ko e ha kua liga fakauaua e fuata mui ke he kupu mooli?

¹⁴ Po ke tuga kua nakai holo ki mua e fakafetuiaga he tau tama haau mo Iehova. Liga fakauaua foki a lautolu ke he mena ne talitonu e Tau Fakamoli a Iehova ki ai ko e kupu mooli. Ko e heigoa ke taute e koe? Eketaha ke fakamaama e tau kakano ke he tau tama haau, ti lagomatai a lautolu ke fakaalofa ki a Iehova mai he tau loto. Fakaako a lautolu ke loto fakaaue ke he tau mena oti ne taute he Atua ma lautolu. (Fakakite. 4:11) Ti ka mautali a lautolu, maeke ia lautolu ke fifili ke tapuaki ki a Iehova.

¹⁵ Ka fakauaua e tau tama haau ke he kupu mooli, kia fakauka ti lali ke takitaki a lautolu. Lagomatai a lautolu ke maama ko e fekafekau ki a Iehova ko e puhala mitaki lahi mahaki he moui ti ha ha i ai e tau fua mitaki tumau. Lali foki ke kumi e tau kakano mooli he tau fakauaua ha lautolu. Ma e fakatai, nakai talia mooli kia he tama taane haau e mena ne talahau he Tohi Tapu, po ke hopoate teao a ia ke fakamatala ke he falu fanau? Fakauaua mooli kia e tama fifine haau kua pulotu e tau poakiaga he Atua, po ke matimati noa ni a ia mo e kua fakaheu he falu?

16, 17. He tau puhala fe kua maeke he tau matua ke lagomatai e tau fanau ha lautolu ke taute ne lautolu e fakafetuiaga mo Iehova?

¹⁶ Maeke fēfē a koe ke lagomatai e tau tama haau ke kautū he tau fakauaua ha lautolu ke he kupu mooli? Tokologa e tau matua ne kautū he lagomatai e tau tama ha lautolu he hūhū ki a lautolu: “Mukamuka po ke uka nakai ki a koe ke eke mo Kerisiano? Ko e heigoa e tau fua mitaki he eke mo Kerisiano he manatu haau? Ko e heigoa e palepale? Fēfē e manatu haau ke he tau fua aoga kua moua e tautolu mogonei mo e to moua e tautolu anoiha? Mua atu kia ke he palepale?” Kia hūhū e tau hūhū nei he tau kupu ni haau mo e he puhala fakamooli, totonu, mo e fiafia. Ua taute e tau tama haau ke logona kua tukupau e koe a lautolu. He fakatutalaaga, liga manako a koe ke fakamaama e Mareko 10:29, 30. Liga manako e falu fuata ke taute ua e tohiaga, taha tohiaga ke he tau fua he eke mo Kerisiano mo e taha ke he tau palepale. Maeke e mena nei ke lagomatai a koe mo e fanau haau ke mailoga e tau lekua ne fehagai e lautolu mo e moua e tau tali ke he tau lekua nei. Kaeke kua lata ia tautolu ke fakaako e tau tohi Fakaako he Tohi Tapu mo e Tapuaki ke he Atua mo lautolu ne fiafia, kua mua atu e mitaki ka taute pihia mo e tau fanau ni ha tautolu! Hane taute kia e koe e mena ia?

¹⁷ He tutupu hake e fanau haau, kua lata a lautolu ke fifili ne lautolu ke fekafekau ki a Iehova. To nakai fekafekau noa a lautolu ha kua taute e koe e fifiliaga ia ma haau. Kua lata e tau fanau haau ke taute e fakafetuiaga ni ha lautolu mo Iehova. (Fakatai 3:1, 2) Ka e kua ka uka e tama haau ke fakatata ke he Atua? Fakamalolō ki a ia ke kumikumi e tau taofiaga haana he hūhū hifo ki a ia e tau hūhū tuga e: ‘Iloa fēfē e au ko e mena fai Atua? Iloa fēfē e au kua leveki mooli e Iehova au? Talitonu mooli kia a au ko e omaoma ke he tau poaki he Atua to aoga ki a au?’ Tau matua, kia eke mo tau leveki mitaki ti takitaki fakamanavalahi e tau fanau ha mutolu. Lagomatai a lautolu ke kitia ne lautolu ko e fekafekau ki a Iehova ko e puhala mitaki lahi mahaki he moui.c​—Roma 12:2.

18. Maeke fēfē he tau matua ke fifitaki a Iehova, ko e Leveki Mamoe ne Mua?

¹⁸ Kua manako e tau Kerisiano mooli oti ke fifitaki e Leveki Mamoe ne Mua, ko Iehova. (Efeso 5:1; 1 Pete. 2:25) Lata pauaki he tau matua ke iloa e fuifui ha lautolu, ko e fanau fakahelehele ni ha lautolu. Lata he tau matua ke takitaki e tau tama ha lautolu ke maeke ia lautolu ke olioli e tau fua mitaki tumau he tau maveheaga he Atua. Ē, taute e tau mena oti ke leveki e tau tama haau ti feaki a lautolu ke fakaalofa ki a Iehova!