Magaaho Fe ne Kamata e Kautu he Atua ke Pule?​—Vala 2

MITI HA NEPUKANESA​—LIU FAKAMANATU FAKAKŪ

Cameron: Mitaki ha ia ke liu feleveia mo koe ma Jon. Fiafia tumau au ke he tau fakaakoaga Tohi Tapu ha taua he tau faahi tapu takitaha.a Fēfē a koe, malolō nakai?

Jon: Ē fakaaue, malolō au.

Cameron: Mitaki ko e malolō a koe. He mogo kua mole, ne tutala a taua ke he kakano ne pehē e Tau Fakamoli a Iehova ko e Kautu he Atua ne kamata ke pule he 1914.b He fakatutala a taua, moua e fakamooliaga ki ai he Tanielu veveheaga 4 i loto he Tohi Tapu. Manatu nakai e koe ko e heigoa e perofetaaga ne fakamau i loto ia?

Jon: Ko e miti he Patuiki ko Nepukanesa hagaao ke he akau lahi.

Cameron: Ē, hako. He miti ha Nepukanesa, ne kitia e ia e akau lahi mahaki ne hake ti hoko ke he lagi. Ne logona e ia e utafekau he Atua ne poaki ke hio ki lalo e akau, ka ko e tagutugutu mo e tau vaka kia toka ai ke he kelekele. Ka mole e “fitu e tau,” to liu e akau ke tupu hake.c Fakatutala foki a taua ke he kakano ne ua e fakamooliaga he perofetaaga. Manatu nakai e koe ko e heigoa e fakamooliaga fakamua?

Jon: Ko e taha mena ne tupu ni ki a Nepukanesa, hako nakai? Ne maliu e loto haana ke fitu e tau.

Cameron: Hako tonu. Ne maliu fakakū e loto ha Nepukanesa, ti kua taofi foki e pule haana mogoia. Ka e he fakamooliaga lahi he perofetaaga, to taofi e pule he Atua ke fitu e tau. He kitia e taua, ne kamata e fitu e tau he magaaho ne moumou a Ierusalema he 607 F.V.N. Tali mai he magaaho ia, ne nakai liu fai patuiki he lalolagi ne hukui a Iehova ko e Atua ke pule ke he haana tau tagata. Pete ia, he fakaoti e fitu e tau, to kotofa he Atua e Patuiki foou ke he tau tagata haana​—ko ia mai he lagi. Kakano, ka katoa e fitu e tau ko e fakamailoga a ia he kamata e Kautu he Atua he lagi ke pule. Kua fitā a taua he tutala ke he magaaho ne kamata e fitu e tau. Ti ka iloa e taua ko e fiha e leva he tau mena ia, to iloa e taua e magaaho ne kamata e Kautu he Atua ke pule. Maama nakai e koe?

Jon: Ē, lagomatai he tutala nei ke liu fakamanatu mai ki a au.

Cameron: Mitaki lahi. Hau ā ke kamata, mo e fakatutala ko e fiha e leva he fitu e tau. Oti laia e totou au ke he vala tala nei ke fakamanatu ki a au hagaao ke he tau matapatu manatu. To lali au ke fakamaama fakamitaki ai.

Jon: Ē mitaki.

FAKAOTI E FITU E TAU​—KAMATA E TAU AHO FAKAMUI

Cameron: He fakamooliaga fakamua he perofetaaga nei kua hagaao ai ki a Nepukanesa, ko e fitu e tau kua maaliali ai ko e fitu e tau tau ke he tagata. Ka ko e fakamooliaga lahi kua putoia e Kautu he Atua, ti kua loa atu e fitu e tau ia mai he fitu e tau tau ke he tagata.

Jon: Ko e ha ne talahau pihia a koe?

Cameron: Taha mena, manatu na kamata e fitu e tau he magaaho ne moumou a Ierusalema he 607 F.V.N. Ka kamata ke totou mai he tau ia, ka fitu e tau ti hoko a taua ke he tau 600 F.V.N. Ka e nakai fai mena uho ne tupu he tau ia hagaao ke he pule he Atua. Tuga ni ne tutala a taua he magaaho fakamua, loga e senetenari ne mole he nofo a Iesu he lalolagi, ne pehē a ia kua nakaila katoatoa ia e fitu e tau.

Jon: Oi, ē. Manatu e au mogonei.

Cameron: Ti nakai ko e fitu e tau tau ke he tagata ka ko e fitu e tau ia ko e vahā loa lahi.

Jon: Fiha e loa?

Cameron: Ko e tohi ha Fakakiteaga i loto he Tohi Tapu, ne matutaki lahi mo e tohi a Tanielu, ka lagomatai a taua ke iloa mooli ko e fiha e loa he fitu e tau. Kua fakakite ai e tolu mo e hafa e tau ne katoatoa ko e 1,260 e aho.d Ti ko e fitu e tau​—fakalahi ua e tolu mo e hafa e tau​—to katoatoa ai 2,520 e aho. Maama agaia nakai?

Jon: Ē maama agaia e au. Ka e nakai kitia e au ko e fakakite fēfē he mena nei na kamata e Kautu he Atua ke pule he 1914.

Cameron: Ē mitaki, hau la ke lali ke fakamatutaki e tau mena nei. Falu magaaho he perofetaaga he Tohi Tapu, ko e taha e aho ko e taha e tau a ia.e Ka fakaaoga e taua e iloaaga ia he taha e aho ko e taha e tau a ia, ko e fitu e tau to katoa ko e 2,520 e tau. He totou hifo mai he 607 F.V.N., ko e 2,520 e tau kua hoko a taua ke he tau 1914.f He puhala ia kua hoko a taua ke he 1914 ko e fakaotiaga he fitu e tau, ko e magaaho ne kamata a Iesu ke pule ko e Patuiki he Kautu he Atua. Mua atu e aoga, tali mai he 1914, ne tutupu e tau mena lalahi he lalolagi​—tau mena tutupu ne talahau tuai he Tohi Tapu ma e tau aho fakamui.

Jon: Ko e heigoa e tau mena ia?

Cameron: Manamanatu la ke he tau talahauaga ha Iesu he Mataio 24:7. Hagaao ke he magaaho ka kamata a ia ke pule i luga he lagi, pehē a Iesu: “Ko e mena to laga e taha motu ke he taha motu, ko e taha kautu ke he taha kautu; to ha ha i ai e tau hoge, mo e tau tatalu, mo e tau mafuike ke he taha mena mo e taha mena.” Mailoga ai na talahau tuai e Iesu to ha hā e tau hoge mo e tau mafuike he magahala ia. Kua kitia mooli ke he lalolagi ha tautolu kua loga e tau lekua pihia he senetenari kua mole, mooli nakai?

Jon: Ē mooli.

Cameron: He kupu nei, ne talahau tuai e Iesu e felakutaki he magaaho ka Patuiki a ia he Kautu he Atua. Ti talahau tuai he tohi a Fakakiteaga to nakai hagaao ni e tau felakutaki nei ke he taha e matakavi ka e to lauia e lalolagi katoa he vahā he fakaotiaga.g Manatu nakai e koe e magaaho ne hoko e felakutaki fakamua he lalolagi?

Jon: Hoko ai he 1914, tau ia ne pehē a koe ne kamata a Iesu ke pule! Ai manatu pihia au he magaaho fakamua.

Cameron: Ka maama katoa e taua e tau vala tala nei​—ko e perofetaaga ke he fitu e tau mo e falu perofetaaga he Tohi Tapu ke he vahā he fakaotiaga​—kua fai kakano mooli. Kua mauokafua e Tau Fakamoli a Iehova na kamata a Iesu ke pule ko e Patuiki he Kautu he Atua he 1914 ti kamata e tau aho fakamui he tau ia.h

Jon: Lali agaia au ke maama e tau vala tala oti nei.

Cameron: Ē, mitaki. Tuga ne tala atu e au, na fai magaaho foki au to maama katoa ai. Ka e amanaki kua lagomatai he tutalaaga ha taua a koe ke kitia kua pete ne nakai totoku e tau 1914 i loto he Tohi Tapu, na fakavē he Tau Fakamoli a Iehova e tau taofiaga ha lautolu ke he Tohi Tapu hagaao ke he tau ia.

Jon: Ē, nava tumau au ki a koe ha ko e mena nei​—ko e tau talahauaga haau kua lalago tumau aki e kupu he Tohi Tapu. Nakai ko e manatu fakatagata ni haau. Manamanatu au ko e ha ne uka lahi ke maama e mena nei. Ko e ha ne ai talahau he Atua i loto he Tohi Tapu ko e tau 1914 ko e tau ia ne kamata a Iesu ke pule i luga he lagi?

Cameron: Mitaki lahi e hūhū ia ma Jon. Na loga e mena ne nakai totoku fakamatafeiga mai he tau kupu Tohi Tapu. Ti ko e ha ne tohi ai he Atua e Tohi Tapu ke lata he tau tagata ke gahua lahi ke maama ai? Liga maeke a taua ke tutala ki ai ka liu mai au he taha mogo.

Jon: Fia loto au ka pihia.