Kakano ne Hao Agaia e Tohi Tapu

Ne hao mooli e Tohi Tapu. Ko e mena ia, kua maeke ia koe ke moua e lagaki mo e totou ai he vahā nei. Ti ka fifili e koe e fakaliliuaga mitaki he tau Tohiaga Tapu, to mauokafua a koe ko e lagaki haau ne totou kua moua mai he tau tohi fakamua aki ne falanaki ki ai.a Ka ko e ha e Tohi Tapu ne kautū ai pete he popo e tau koloa ne tohi aki, fehagai mo e totokoaga kelea muitui, mo e tau laliaga pauaki ke hikihiki e fekau i loto, ne kua ofoofogia e tau tala ke he puhala ne hao ai? Ko e heigoa e mena ne uho pauaki hagaao ke he tohi ia?

Tokologa e tagata ne fakaako ke he Tohi Tapu ne tatai e manatu mo e aposetolo ko Paulo, ne tohi: “Ko e tau Tohi Tapu oti kana mai he Agaga he Atua ia.” (2 Timoteo 3:16) Ne talitonu a lautolu kua hao e Tohi Tapu ha kua pauaki ni ko e Kupu he Atua mo e ko e Atua ne puipui ai ti hoko mai ke he vahā nei. Ko Faizal, ne totoku he vala tala fakamua he fufuta nei, ne fifili he magaaho fakamui ke kumikumi ke he tau talahauaga ia he fakaako e Tohi Tapu. Ne ofo a ia he tau mena ne moua e ia. Nakai leva ti iloa e ia kua nakai haia he Tohi Tapu e tau fakaakoaga loga ne malolō lahi i Kerisitenitome. Lafi foki, ne omoomoi a ia ha ko e finagalo he Atua ma e lalolagi, ne fakakite mai he Haana Kupu.

“Talitonu au mogonei, ko e Tohi Tapu ne ha ha mo au ko e mena fakaalofa mai he Atua,” he talahau e ia. “Ha ko e mena ka maeke e Atua ke tufuga e lagi mo e lalolagi katoatoa, nakai kia ha ha foki ia ia e malolō ke foaki mai mo e puipui e tohi nei ma tautolu? Ke fakatikai ai, kua tatai mo e fakakū e malolō he Atua. Ke fakakū e malolō he Atua Malolō Ue Atu​—ko hai au ke taute pihia?”​—Isaia 40:8.