Ko e Mena Fakaalofa Mua Ue Atu

KO E vilo penesolo tuga e posi he alolima ha Jordan ne tuga na fakateaga. Ka ko e taha koloa tokiofa lahi a ia haana. Ne fakamaama e Jordan, “Ko Russell, ko e kapitiga motua he magafaoa ne mai e vilo penesolo ia he mogo ne tote lahi au.” He mole e mate ha Russell, ne iloa e Jordan kua putoia lahi mahaki a Russell ke he tau momoui he matua tupuna taane mo e tau mamatua ha Jordan, he fakamafana a lautolu he tau magahala uka. “Ha kua lahi e iloaaga haaku ki a Russell mogonei,” he talahau e Jordan, “ko e mena fakaalofa tote nei kua mua atu e uho ki a au.”

Tuga ne fakakite mai he mena ne tupu ki a Jordan, ko e mena fakaalofa kua liga aoga tote po ke fakateaga ke he onoonoaga he falu tagata. Ka ko e tagata ne loto fakaaue ke he mena fakaalofa, kua kitia e ia ko e mena uho lahi mahaki. Fakamaama he Tohi Tapu e mena fakaalofa uho lahi mahaki ke he tau kupu talahaua nei: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.”​—Ioane 3:16.

Ko e mena fakaalofa kua maeke ke tamai e moui tukulagi ke he tagata kua moua ai! Fai mena fakaalofa nakai ne mua atu e aoga? Liga nakai mailoga he falu e aoga he mena fakaalofa ia, ka kua “uka lahi,” po ke uho ai ke he tau Kerisiano mooli. (Salamo 49:8; 1 Peteru 1:18, 19) Ka ko e ha ne foaki he Atua e moui he Tama haana mo mena fakaalofa ma e lalolagi?

Fakamaama mai he aposetolo ko Paulo e kakano ke he tau kupu nei: “He hoko mai ai e hala ke he lalolagi ke he tagata tokotaha, ko e mate foki ha ko e hala, ti kua hoko mai ai e mate ke he tau tagata oti kana.” (Roma 5:12) Ko e tagata fakamua ko Atamu, ne agahala he nakai omaoma pauaki ke he Atua, ti moua e ia e fakahala ko e mate. Ha ko Atamu ati mamate e tau fanau oti haana​—ko e tau tagata he lalolagi katoa.

“Ko e mate ko e palepale ia he hala; ka ko e moui tukulagi ko e mena foaki noa mai he Atua haia, ke he Iki ha tautolu ko Keriso lesu.” (Roma 6:23) Ke fakatoka noa e tau tagata mai he fakahala he mate, ne fakafano mai he Atua e haana Tama ko Iesu Keriso ke he lalolagi ke poa haana moui mitaki katoatoa ma e lalolagi. Fakavē ai ke he poa ia, ne iloa “ko e lukutoto,” ko lautolu oti ne tua ki a Iesu to moua e moui tukulagi.​—Roma 3:24.

Ke he tau monuina oti ne foaki he Atua ke he tau tagata ne tapuaki ki a ia puhala ia Iesu Keriso, ne talahau e Paulo: “Fakaaue ke he Atua he hana mena kua foaki noa nakai maeke ke fakamatala.” (2 Korinito 9:15) Ē, ko e lukutoto kua mua ue atu ti nakai maeke ia tautolu ke fakamaama katoatoa ai. Ka e mai he tau mena fakaalofa mitaki oti he Atua ke he tau tagata, ko e ha e lukutoto ne mua ue atu? Puhala fe ne mua ue atu ai ke he falu mena fakaalofa he Atua?a Ti tali atu fēfē a tautolu ke he mena ia? Uiina e mautolu a koe ke totou e tau tali he Tohi Tapu ke he tau hūhū ia, he ua e vala tala ka mui mai.