Tokofā e Tagata Heke Solofanua mo Koe

Ne tafepoi a lautolu mo e tomumu e tau hui! Fā e solofanua malolō mo lautolu ne heke ai kua fakakite mai e fakatino maaliali ne teitei ke tutū hake he tau lautohi he Tohi Tapu! Ko e solofanua fakamua kua hina​—ko ia ne heke ai ko e patuiki ne fakafoufou laia mo e lilifu. Mui mai i tua haana e solofanua ne lanu tuga e afi, ko ia ne heke ai kua utakehe e mafola mai he lalolagi katoa. Ti mui mai foki e solofanua ke toluaki kua uli tuga e tulotopō ne heke ai a ia ne totō ki luga e fua tautau tuga ko e fekau he malaia ne fakailoa hagaao ke he gahoa e tau mena kai. Ko e solofanua ke fāaki kua lanu pakepake ne kula tea, ko e fakailoaaga he tatalu mo e tau hagahaga kelea lahi ne heke ai e Mate. Mo e Hate ko e tukuaga ma e tau tagata, ne mui fakatata mai i tua kua helehele mai e matematekelea lahi ke he tau momoui!​—Fakakiteaga 6:1-8.

“Matakutaku au he magaaho fakamua he totou hagaao ke he tokofā e tagata heke solofanua. Manatu au ko e hoko mai fai e Aho he Fakafiliaga ka kua nakai mautali au, to nakai moui au.”​—Crystal.

“Ofogia au he tau tagata heke solofanua tokofā he tau solofanua lanu kehekehe. Magaaho ne maama e au e kakano he fakakiteaga ia, ne iloa mitaki ai e au.”​—Ed.

Tatai nakai e manatu haau mo Crystal hagaao ke he tau tagata heke solofanua tokofā he Apakalifa? Po ke tatai e logonaaga haau mo Ed? He tuaga fe ni, ko e tau fakamailoga ofoofogia he tau tagata heke solofanua ia ko e taha he tau fakatino talahaua he Fakakiteaga, ko e tohi fakahiku he Tohi Tapu. Iloa nakai e koe na maeke a koe ke aoga mai he maama e fakakiteaga nei? Fēfē? Kua mavehe mai e Atua na maeke a koe ke moua e fiafia mooli he totou, fakaako mai, mo e moui fakatatau ke he tau mena i loto he tohi fakaperofeta ia.​—Fakakiteaga 1:1-3.

Pete kua matakutaku e falu ha ko e fakakiteaga he tau tagata heke solofanua tokofā, ne nakai tohi ai ke fakamatakutaku a koe. Totou miliona ne fakamalolō e tua ha lautolu ha ko e fakakiteaga nei ti takitaki atu foki a lautolu ke he amaamanakiaga mitaki lahi anoiha. Maeke foki a koe ke pihia! Fakamolemole matutaki ke totou.