Fakatumau Nakai Haau a ‘Akau Punuti Lahi he Tua’?

1-2. (a) Hagaao ke he Efeso 6:16, ko e ha kua lata a tautolu ke moua e ‘akau punuti lahi he tua’? (e) Ko e heigoa e tau hūhū ka fakatutala a tautolu ki ai?

HA HA nakai ia koe e ‘akau punuti lahi he tua’? (Totou Efeso 6:16.) Ē ha ha ia koe. Tuga e pāpātau lahi kua puipui e falu vala he tino, puipui he tua haau a koe mai he tau fakaohoohoaga he mahani feuaki, favale, mo e nakai mahani Atua he lalolagi matahavala nei.

² Ka kua nonofo a tautolu he “tau aho fakamui,” mo e to matutaki e tua ha tautolu ke kamatamata. (2 Timo. 3:1) Kumikumi fēfē e koe kua mau mitaki haau a akau punuti he tua? Ti maeke fēfē a koe ke totō mau ke he haau a akau punuti? Kia fakatutala a tautolu ke he tau tali ke he tau hūhū ia.

FAKAKIA FAKAMITAKI E PĀPĀTAU HAAU

3. Ko e heigoa ne taute he tau kautau ke he tau pāpātau ha lautolu, mo e ko e ha?

³ He vahā Tohi Tapu, ko e tau kautau ne fa uufi e tau pāpātau ha lautolu aki e leta. Oela he tau kautau e tau pāpātau ke mau e leta mo e ua hī e tau vala lapatoa. Ka mailoga he kautau kua malona e pāpātau haana, eketaha a ia ke mau ai ke lata mo e magaaho ka ō ke tau. Fakagahua fēfē e fakataiaga ia ke he tua haau?

4. Ko e ha kua lata a koe ke fakakia haau a pāpātau he tua, ti lata ke taute fēfē e koe e mena ia?

⁴ Tuga e tau kautau he vahā i tuai, lata a koe ke fakatumau e fakakia mo e leveki he pāpātau haau he tua ke mautali tumau a koe ma e tauaga. Ha ko e tau Kerisiano, tau a tautolu ke he tauaga fakaagaaga ti ko e tau fī ha tautolu kua putoia e tau agaaga kelea. (Efeso 6:10-12) Nakai fai tagata foki ke leveki haau a pāpātau he tua ma haau. Iloa fēfē e koe kua mautali a koe ke fehagai mo e tau kamatamata? Fakamua, lata a koe ke liogi ma e lagomatai he Atua. Ti lata a koe ke fakaaoga e Kupu he Atua ke lagomatai a koe ke kitia a koe ni tuga he kitia he Atua a koe. (Hepe. 4:12) Pehē e Tohi Tapu: “Kia tua a koe kia Iehova mo e hāu a loto katoa; ka e aua neke falanaki a koe ke he hāu a pulotu.” (Fakatai 3:5, 6) He tokaloto, he ha he liu manamanatu ke he falu fifiliaga ne taute e koe he foou nei? Ma e fakatai, fehagai kia a koe mo e lekua lahi fakatupe? Manatu nakai e koe e maveheaga ha Iehova ia Heperu 13:5: “Nakai tuai toka ni e au a koe, nakai tuai tiaki ni e au a koe”? Foaki kia he maveheaga ia ki a koe e mauokafua to lagomatai e Iehova a koe? Ka pihia, fakakite he mena ia kua tumau e mitaki he pāpātau he tua haau.

5. Ko e heigoa ka moua e koe he kumikumi ke he tua haau?

⁵ Liga ofo a koe ke he mena ka moua e koe he magaaho ka kumikumi fakamitaki a koe ke he tua haau. Liga to moua e koe e tau lolelole ne fai magaaho he nakai mailoga e koe. Ma e fakatai, liga mailoga e koe ha ha i ai e tupetupe teao, tau pikopiko, mo e fakaloleloleaga kua moumou e tua haau. Ka tupu e mena nei ki a koe, puipui fēfē e koe e tua haau mai he hagahaga kelea lahi?

PUIPUI A KOE MAI HE TUPETUPE TEAO, TAU PIKOPIKO, MO E FAKALOLELOLEAGA

6. Ko e heigoa falu fakataiaga he tupetupe mitaki?

⁶ Mitaki e falu tupetupe. Ma e fakatai, manamanatu lahi a tautolu ke fakafiafia a Iehova mo Iesu. (1 Kori. 7:32) Ka taute e tautolu e agahala kelea lahi mahaki, tupetupe a tautolu ke liu moua e fakafetuiaga mitaki mo e Atua. (Sala. 38:18) Tupetupe foki a tautolu ke fakafiafia e hoa he fakamauaga ha tautolu mo e leveki e tau magafaoa mo e tau matakainaga ha tautolu.​—1 Kori. 7:33; 2 Kori. 11:28.

7. Hagaao ke he Tau Fakatai 29:25, ko e ha ne nakai lata a tautolu ke matakutaku tagata?

⁷ He taha faahi, maeke he tupetupe teao ke moumou e tua ha tautolu. Ma e fakatai, liga tupetupe tumau a tautolu ke lahi e mena kai mo e mena tui. (Mata. 6:31, 32) Ke fakatotoka e tupetupe ia, liga hagaaki a tautolu ke moua e tau koloa he tino. Liga feaki foki e tautolu e manako lahi ke he tau tupe. Ka fakaatā e tautolu e mena ia ke tupu, to lolelole e tua ha tautolu ki a Iehova ti matematekelea lahi e tuaga fakaagaaga ha tautolu. (Mare. 4:19; 1 Timo. 6:10) Po ke liga lauia a tautolu ke he taha tupetupe teao foki he molea e manamanatu ke moua e taliaaga he falu. Liga molea mogoia e matakutaku ha tautolu neke vaiga po ke ekefakakelea he tau tagata ke he matakutaku ke nakai fakafiafia a Iehova. Ke puipui a tautolu mai he hagahaga kelea ia, lata a tautolu ke olelalo ki a Iehova ke foaki ki a tautolu e tua mo e loto malolō kua lata ke fehagai mo e paleko.​—Totou Tau Fakatai 29:25; Luka 17:5.

8. Lata ke tali atu fēfē a tautolu ke he tau pikopiko?

⁸ Ko Satani, ko e “matua he pikopiko” ne fakaaoga a lautolu i lalo he pule haana ke fakaholofa e tau pikopiko hagaao ki a Iehova mo e tau matakainaga ha tautolu. (Ioane 8:44) Tuga anei, lomi he tau tagata tiaki taofiaga e tau pikopiko mo e fakakeukeu e tau tala mooli hagaao ke he fakatokatokaaga ha Iehova he tau faahi kupega hila mo e TV mo e falu puhala uta tala. Ko e tau pikopiko ia ko e falu he “tau fana kaka” ha Satani. (Efeso 6:16) Lata ke tali fēfē a tautolu ka tutala e taha tagata ki a tautolu ke he tau pikopiko ia? Tiaki mooli e tautolu! Ko e ha? Ha kua ha ha ia tautolu e tua ki a Iehova mo e falanaki a tautolu ke he tau matakainaga ha tautolu. Kalo kehe a tautolu mo e tau matutakiaga oti he tau tagata tiaki taofiaga. Nakai fakaatā e tautolu ha tagata po ke ha mena, putoia e fia iloa ke takitaki a tautolu ke taufetoko mo lautolu.

9. Lauia fēfē a tautolu he fakaloleloleaga?

⁹ Maeke he fakaloleloleaga ke moumou e tua ha tautolu. Nakai maeke a tautolu ke fakaheu e tau lekua fakatagata ha tautolu. To nakai iloilo ka lali a tautolu ke taute pihia. Ko e falu magaaho kua liga logona e tautolu e loto lolelole. Ka e lata a tautolu ke nakai fakaatā e tau lekua ha tautolu ke fakapehia e tau manamanatuaga. Ka taute pihia, liga to galo e tautolu e amaamanakiaga homo ue atu ne foaki mai e Iehova. (Fakakite. 21:3, 4) Ko e tau logonaaga he fakaloleloleaga ka fofō e malolō ha tautolu ti mahala. (Fakatai 24:10) Ka e nakai lata e mena ia ke tupu ki a tautolu.

10. Ko e heigoa ne fakaako e koe mai he tohi he taha matakainaga fifine?

¹⁰ Manamanatu ke he puhala ne fakatumau e tua he matakainaga fifine i United States he leveki he taane haana ne gagao lahi mahaki. He tohi ke he matapatu ofisa, pehē a ia: “Ko e tuaga ha maua kua tupetupe lahi mo e fakalolelole he falu magaaho, ka ko e amaamanakiaga ha maua kua malolō. Nava lahi au ke he tau vala tala ne moua e maua ke fakamalolō e tua mo e atihake e tau agaaga ha maua. Lata mooli e fakatonuaga mo e fakamalolōaga nei mo maua. Kua lagomatai ai a maua ke fakatumau ke fekafekau ki a Iehova mo e fakauka ke he tau kamatamata ne fakatupu e Satani ki a maua.” Fakaako e tautolu mai he tau kupu he matakainaga fifine nei kua maeke a tautolu ke fahia ke he fakaloleloleaga! Puhala fe? Onoono ke he tau lekua haau ko e kamatamata mai ia Satani. Mailoga ko Iehova ko e Punaaga he fakamafanatia. Ti loto fakaaue ke he tau mena kai fakaagaaga ne foaki e Ia.

11. Ke kamatamata e tuaga he tua ha tautolu, ko e heigoa e tau hūhū kua lata a tautolu ke hūhū hifo?

¹¹ Kitia nakai e koe e tau vala he pāpātau haau he tua ne lata ke fakamalolō? He tau mahina gahoa kua mole, maeke nakai a koe ke kalo kehe he mahala ke he tupetupe teao? Kua totoko nakai e koe e manako ke fanogonogo mo e taufetoko ke he tau tagata tiaki taofiaga ne fakaholofa e tau pikopiko? Ti kua maeke nakai a koe ke fahia ke he fakaloleloleaga? Ka pihia, kua mitaki e tuaga he tua haau. Ka e lata a tautolu ke fakatumau ke mataala ha kua fai kanavaakau foki a Satani ne lali ke fakaaoga ke totoko ki a tautolu. Kia fakatutala a tautolu mogonei ke he taha he tau kanavaakau.

PUIPUI A KOE MAI HE VELEVELEKOLOA

12. Ko e heigoa kua omoomoi he velevelekoloa ke taute e tautolu?

¹² Maeke e velevelekoloa ke fakatauhele a tautolu mo e tiaki e pāpātau he tua. Pehē e aposetolo ko Paulo: “Nakai fakai ha tagata tau kua tau mo e fakalavelave e ia a ia ke he tau mena he mouiaga nai, kia fakafiafia e ia a ia ne fifili a ia.” (2 Timo. 2:4) Ko e tau kautau Roma ne nakai fakaatā ke putoia ke he ha pisinisi. Ko e heigoa ka tupu kaeke ke fakaheu he kautau e poakiaga ia?

13. Ko e ha kua nakai lata e kautau ke fai pisinisi?

¹³ Manamanatu ke he tuaga nei. Ko e kau he tau kautau ne fakaaoga e magaaho pogipogi ke fakamahani ke fakaaoga e tau pelu ha lautolu, ka e taha ia lautolu ne galo. Ko e kautau ia he taone hane sela he tau mena kai he makete. He magaaho afiafi, ne fakaaoga he tau kautau e magaaho ke fakakia e tau tapulu tau mo e fakamatila e tau pelu ha lautolu. Ka ko e taha ne sela mena kai ne fakaaoga e magaaho haana ke tunu e tau mena kai ke sela he aho hake. Ka ko e pogipogi hake, ne feoho fakaofo mai e tau fī. Ko e kautau fe ka mautali ke tau mo e moua e taliaaga he takitaki kau haana? Ti ko hai haau ne manako ke tū he faahi​—ko e kautau ne mautali po ke kautau ne kua tauhele e onoonoaga?

14. Ha ko e tau kautau ha Keriso, ko e heigoa kua uho lahi ki a tautolu?

¹⁴ Tuga e tau kautau mitaki, nakai fakatauhele a tautolu mai he foliaga pauaki ha tautolu​—ko e moua e taliaaga he ha tautolu a tau Takitaki Kau ko Iehova mo Keriso. Onoono a tautolu ki ai kua mua e aoga ke he moua e tau mena ne foaki mai he lalolagi ha Satani. Eketaha a tautolu ke moua e magaaho mo e malolō kua lata ke fekafekau ki a Iehova mo e fakatumau e mitaki he tau pāpātau ha tautolu he tua mo e tapulu tau fakaagaaga.

15. Ko e heigoa e hatakiaga ne foaki e Paulo ki a tautolu, mo e ko e ha?

¹⁵ Kua lata tumau a tautolu ke mataala! Ko e ha? Hataki he aposetolo ko Paulo “ko lautolu kua manako ke maukoloa” to “hehe ai a lautolu mai he tua.” (1 Timo. 6:9, 10) Ko e kupu “hehe” kua fakakite to fakatauhele a tautolu he lali ke moua e tau koloa nakai aoga. Ti maeke mogoia a tautolu ke feaki he tau loto ha tautolu e “tau manako lahi ne loga kua goagoa ai mo e kelea ai.” He nakai fakaatā e tau manako ia ke he tau loto ha tautolu, ka e lata a tautolu ke kitia mitaki ko e tau kanavaakau ia ka fakahagahaga kelea a tautolu.

16. Ko e tau hūhū fe he tala ia Mareko 10:17-22 kua lata ke manamanatu a tautolu ki ai?

¹⁶ Maeke ia tautolu ke moua e tau tupe ke fakatau aki e tau koloa loga. Kua hepe kia e mena ia ka fakatau e tautolu e tau mena kua loto ki ai ka e nakai lata mooli? Nakai hepe. Ka e manamanatu ke he tau hūhū nei: Pete foki ka maeke a tautolu ke fakatau taha mena, to lahi mooli nakai e magaaho mo e malolō ha tautolu ke fakaaoga mo e leveki e koloa? Pihia foki kua manako lahi kia a tautolu ke he tau koloa ia? Ko e manako lahi kia ha tautolu ke he tau koloa kua omoomoi a tautolu ke tuga e fuata ne nakai talia e uiina ha Iesu ke fakalahi e fekafekauaga haana ke he Atua? (Totou Mareko 10:17-22.) Ko e mitaki ha ia ma tautolu ke moua e moui mukamuka mo e fakaaoga e magaaho uho mo e malolō ha tautolu ke taute e finagalo he Atua!

TOTŌ TUMAU HAAU A PĀPĀTAU HE TUA

17. Ko e heigoa kua nakai lata a tautolu ke nimo?

¹⁷ Nakai lata ke nimo e tautolu ko tautolu he tauaga ti lata ke mautali ke tau he tau aho takitaha. (Fakakite. 12:17) Ko e tau matakainaga ha tautolu kua nakai maeke ke totō e tau pāpātau he tua ha tautolu ma tautolu. Lata ke totō tumau ni e tautolu.

18. Ko e ha e tau kautau he vahā i tuai kua totō tumau e tau pāpātau ha lautolu?

¹⁸ He vahā i tuai, moua he kautau e lilifu ha ko e maō haana he tau. Ka e to logona e ia e fakamā ka liu a ia ki kaina mo e nakai fai pāpātau. Ko e tagata fakamau tala tuai i Roma ko Tacitus ne tohia: “Ke tiaki e pāpātau he kautau ko e mena fakamā lahi mahaki.” Ko e taha kakano haia ati eketaha e tau kautau ke totō tumau e tau pāpātau ha lautolu.

19. Totō tumau fēfē e tautolu e pāpātau he tua?

¹⁹ Totō tumau ha tautolu a pāpātau he tua he o mai tumau he tau feleveiaaga mo e tutala ke he higoa ha Iehova mo e Kautu haana ke he falu. (Hepe. 10:23-25) Lafi ki ai, he totou e Kupu he Atua he tau aho takitaha mo e liogi ke fakagahua e fakatonuaga mo e takitakiaga ia ke he tau mena oti ne taute e tautolu. (2 Timo. 3:16, 17) Ti nakai fai kanavaakau ne fakaaoga e Satani ke totoko mai ka fakamatematekelea tukulagi a tautolu. (Isaia 54:17) Ko e ‘akau punuti lahi he tua’ ka puipui a tautolu. To tumauokafua a tautolu he gahua fakalataha mo e tau matakainaga. Mo e to lahi e mena ka taute e tautolu ke kautū he tauaga he tau aho takitaha, to moua ai e lilifu he tutū ke he faahi ha Iesu ka kautū a ia he tau atu ki a Satani mo e matakau haana.​—Fakakite. 17:14; 20:10.