Kia “Fakaku ke he Manatu!”
1 Kua felauaki nakai a koe mo e tagata he kaina ne fakatauhele e tutalaaga tauteute mitaki hau aki e tau kupu: “Ko e heigoa hau ne manako? Kia fakaku ke he manatu!” Ko e heigoa ha tautolu kua ako mai i ai?
2 Tokologa e tau tagata he vaha nei kua tepetepetu. Manako a lautolu ke iloa ko hai a tautolu mo e ko e o atu a tautolu ke ha. Ka iloa e lautolu e kakano he ahi atu ha tautolu ko e fakatutala ke he Tohi Tapu, to fakateligatuli a lautolu. Nakai aoga e totou Tohi Tapu mo e fakatutala fakaagaga ke he tau momoui he tau tagata tokologa. Fakalagalaga fefe e tautolu e tau tagata pihia he lata ia lautolu ke fakaata falu minuti gahoa ke tutala ke he matakupu Tohi Tapu mo tautolu?
3 Ko e Heigoa kua Lata Lahi: Ko e kei ke fakakite ke he tagata he kaina kua foaki he Tohi Tapu e tau vailakau aoga ma e tau mena vihi kua tupetupe a ia ki ai mo e to talahau ai fakaku ka maeke. Ko e tau fakataitaiaga lauia mitaki kua fakakite e huhu pauaki ne talaga ke taute e tagata he kaina ke manamanatu, mui mai e kupu tohi ke tali e huhu. Kua liga fiafia a koe he fakaaoga falu he tau manatu nai. Kua talaga ai ke lagomatai a tautolu “kia fakaku ke he manatu” fakamafiti ka e fakalagalaga e fiafia he tagata he kaina.
4 He matakavi kua nonofo e tau tagata fa talahau kua nakai fiafia a lautolu ki ai, kia fakatu e huhu kua putoia a lautolu fakatagata:
◼ “He hahaga atu a tautolu ke he taha afe tau, amaamanaki nakai a koe po kua fakauaua? [Fakaata ma e tali.] Kua talahau tuai mai he Tohi Tapu e tau mena tutupu kapeletu kua kitia e tautolu he vaha nei ti pihia foki mo e fua kua moua mai ai.” Totou 2 Timoteo 3:1, 2, 5 mo e Tau Fakatai 2:21, 22.
◼ “Lahi mahaki e kapeletu he motu nei ke he levekiaga fakaekekafo. Iloa nakai e koe na mavehe mai e Atua to fakamaulu tukulagi e ia e tau tino gagao oti kana?” Totou Fakakiteaga 21:3, 4.
◼ “Manatu nakai a koe to aoga e kavikavi kaina ha tautolu kaeke kua fakagahua he tau tagata oti kua nonofo i hinai e tau matapatu fakaakoaga he Tohi Tapu?” Totou Mataio 22:37-39.
5 Ha ko e poakiaga ha tautolu ke fakamatala e tala mitaki he Kautu, ka maeke ti lata ia tautolu ke hagaaki atu ke he mena ka fakakatoatoa he Kautu. Kia pehe a koe:
◼ “Iloa nakai e koe ko e tohi kua leva tigahau e Tohi Tapu, ne talahau tuai to ha ha ai taha e fakatufono ma e lalolagi katoa?” Totou Tanielu 2:44.
◼ “To fefe e tau tutuaga he manatu e koe ka pule a Iesu Keriso ke he lalolagi?” Totou Salamo 72:7, 8.
6 He matakavi kua aga fakalotu e tau tagata, kia lali e koe taha he tau fakafeleveiaaga nei:
◼ “Tokologa e tau tagata kua mamahi he fekehekeheaki ha ko e ha lautolu a feakiaga, lotu, po ke lanu. Manatu nakai a koe to talia he Atua e onoono tagata pihia?” Totou Gahua 10:34, 35.
◼ “Na iloa e tautolu ne taute e Iesu Keriso e tau mana loga he vaha hana. Ka ole a koe ke taute foki taha mana, ko e heigoa la?” Totou Salamo 72:12-14, 16.
7 Ka fakauaua e tagata he kaina ke hafagi e gutuhala, kia liga kamata e koe e fakatutalaaga he pehe:
◼ “Tokologa e tau tagata he vaha nei kua fiu he logona e tau mena vihi. Kua manako a lautolu ke logona e tului. Nakai uaua ai kua moli e naia ki a koe. Ka e moua mai i fe e tautolu e tuluiaga moli ke he tau mena vihi ha tautolu.” Fakaata ma e tali. Totou 2 Timoteo 3:16, 17.
8 Ko e Ha he Nakai Fakatai Ai? Fa mahani ke he falu magaaho ko e huhu mukamuka mo e ku ni ke fakalagalaga aki e fiafia he tagata he kaina. Taha e fifine ne totoko fakamua ne uiina e tau matakainaga fifine tokoua ki loto he fale hana he mole e huhu he taha ha laua: “Maeke nakai a koe ke fakakite e Kautu kua liogi a koe ki ai he Liogi he Iki?” Ne fakagogoa e fifine he huhu, ti talia e ia e fakaakoaga Tohi Tapu. Ko ia mogonei ko e fekafekau tukulele ha Iehova!
9 Ka tutala a koe ke he tagata he kaina, kia fakamoli mo e tau talahauaga hau. Vagahau mai he loto hau. Fa talia fiafia e tau tagata ka kitia e lautolu kua fiafia moli a tautolu ki a lautolu.—Gahua 2:46, 47.
10 Ko e gahua he fakamatala e tala mitaki kua paleko he vaha nei. Fa fakauaua falu tagata he kaina ha ko e tau tagata kehe. Falu kua lavelave e tau momoui mo e tote lahi e magaaho ka fakaata. Ka e, iloa moli e tautolu ko e tokologa agaia kua lata ke kumi. (Mata. 10:11) Ko e laliaga ha tautolu ke kumi a lautolu kua liga ke kautu lahi kaeke ke tumau e tau talahauaga ha tautolu ke lautonu mo e “kia fakaku ke he manatu!”