Uho Lahi e Higoa Lilifu a Iehova
1 Ne taholi fakakelea e Satani e higoa he Atua he magaaho ne fakavaia e ia e tau mamatua fakamua ha tautolu ke agahala. Ne talahau e Tiapolo na pikopiko a Iehova ki a Atamu. (Kene. 3:1-5) Ha kua matutaki e higoa faka-Atua mo e pulotu he Atua ke fakamoli hana kupu, ti ko e talahauaga a Satani kua pikopiko uli. He fakamoli fakahaga hana finagalo faka-Atua, ne fakamea e Iehova hana higoa mai he ekefakakelea mo e taute ai ke lilifu.—Isa 63:12-14.
2 Ko tautolu e tau tagata ne ‘fakahigoa e Iehova aki hana higoa.’ (Gahua 15:14, 17) Kua foaki mai he mena nei e kotofaaga ki a tautolu ke fakakite e puhala kua logona e tautolu hagaao ke he hana tokoluga. Kua moua e tautolu e higoa a Iehova ke lilifu moli, ha kua fakakite ai e tau mena oti kua mitaki, totonu, fakaalofa, fakaalofa hofihofi, mo e tututonu. Kua puke a tautolu ke he ofoofogia he homo ue atu he higoa lilifu he Atua. (Sala. 8:1; 99:3; 148:13) Ko e heigoa kua lata he mena nei ke omoi a tautolu ke taute?
3 Fakatokoluga e Higoa he Atua: Na tapuina tuai e higoa he Atua. Ka e mai he mahani mea mo e fakamatala ha tautolu he Kautu, maeke ia tautolu ke fakatata kua taofi mau e tautolu e higoa he Atua ke uho lahi mahaki. Kia fakapuloa e tautolu: “Kia fakaheke atu a mutolu kia Iehova; ti ui atu a mutolu ke he hana higoa; kia fakailoa atu e mutolu ke he tau motu hana tau gahua; kia talahau atu e mutolu, kua lilifu hana higoa.” (Isa 12:4) Taute fefe e tautolu e mena nei?
4 Maeke ia tautolu ke fakaaoga e tau magaaho oti ke fakapuloa e higoa a Iehova mo e hana tau kakanoaga oti. He mau pauaki po ke nakai, he taha fale ke he taha fale po ke taha fale koloa ke he taha fale koloa, he puhala tu po ke he telefoni, ko e gahua fakamatala ha tautolu kua fakalilifu a Iehova. Ka moua e tautolu a lautolu kua fiafia he fanogonogo, kua lata ia tautolu ke taute e tau maveheaga tonu ke liu atu mo e fakaako fakalaulahi atu a lautolu hagaao ki a Iehova. Kakano e mena ia kua lata ia tautolu ke ua fakakaumahala e tau maveheaga ia mo e fakauka ke he tau laliaga ha tautolu ke kamata e tau fakaakoaga Tohi Tapu he kaina. Fiafia ai, he tau tau takitaha totou teau he tau afe kua o mai ke iloa, fakalilifu, mo e fakatokoluga e higoa lilifu a Iehova.
5 Ko e fakalataha loto katoa ha tautolu ke he gahua he fakatokoluga e higoa he Atua kua fakakite maali ai e tuaga ha tautolu ke he matakupu ne fakatu e Satani i Etena. Ko e gahua lilifu mo e tokoluga anei kua maeke ia tautolu ke taute. Kia uho lahi mo e fakamakai a tautolu he fakaheke e higoa lilifu a Iehova!—1 Nofo. 29:13.