Puha Huhu

◼ Maeke fefe e tau fekafekau ke lagomatai e tau mamatua ke leveki fakamitaki e tau fanau ha lautolu he tau feleveiaaga?

Ko e mahani pauaki he tau fanau e aga hakahakau, mo e nakai mahani ke nonofo fakaeneene ke he magaaho loa. He oti e feleveiaaga, fia fagahuahua lahi e tau fanau ti fa manako a lautolu ke tafepoi mo e tutuli fano falu a fanau i loto he Fale he Kautu po ke he falu a fale fono pihia, he fahi paaka motoka, po ke tau kauhala. Pete ia, kua fakamoli mai e fakatai, “Ko e tama kua toka noa kua fakamā ai e ia hana matua.”​—Fakatai 29:15.

Momoko he pehe, ko e falu he tau matakainaga momotua ha tautolu kua pakia kelea he fepaaki mo e tau fanau ti fepoka hifo a lautolu. Kua fakatupu he mena nei e mamahi he fakahanoa ti lafi atu kua fakamole noa e tupe he tau mamatua mo e he fakapotopotoaga. Ke puipui ni a lautolu mo e ke leveki e falu, kua nakai lata e tau fanau ke tafepoi mo e pele fakahanoa i loto po ke i fafo he Fale he Kautu.

Kua poaki he Tohi Tapu e matagahua ma e tau mamatua ke fakaako e tau fanau ha lautolu ke leveki e tau fale tapuaki ha tautolu mo e lilifu mitaki ne lata ai. (Fakama. 5:1a) He tau feleveiaaga, tau toloaga, mo e tau fonoaga ha tautolu, kua kotofa e tau fekafekau ke “eke e tau mena oti mo e fulufuluola” ti maeke ai ke “tauteute mitaki.” (1 Kori. 14:40; Kolo. 2:5) Lata ia lautolu ke matakite tumau i loto mo e i fafo fakamua to kamata, ka fakapotopoto i ai, mo e ka oti e fakaholoaga. Kaeke poipoi noa e tama po ke taumioi, maeke he fekafekau ke taofi fakaeneene e tama, mo e fakamaama ki a ia e kakano ne nakai lata e tau mahani pihia. Kua lata foki ke fakailoa fakaeneene age ke he tau mamatua e lekua he tama mo e aoga ke matakia ke he tama. Ati lata he matua ke taute e mena ne lata.

He falu magaaho kua iloa na fa tagi e tau tama mukemuke mo e tau tama ikiiki po ke fakahoha i loto he tau feleveiaaga. Ko e tau fekafekau, ka hohoko ke 20 e minuti to kamata e fakaholoaga, kia lata ke fakaatuatu ua e vahega nofoa i tua he fale ma e tau mamatua ne manako ke nonofo i ai mo e tau fanau ikiiki ha lautolu. Ti lata ia tautolu ke magaogao ke fakata e tau nofoa ia ma lautolu.

Kaeke kua mioimioi e tama, kua lata he matua ke taute taha mena. Ka ai taute pihia e matua ti kua tupu e fakalavelave, kua lata he fekafekau ke huhu age fakaeneene ke he matua kua mitaki nakai ke uta kehe e tama ki fafo. Kaeke uiina e tautolu e falu tagata fou ne fai tama tote ke he tau feleveiaaga, ti lata ia tautolu ke nonofo mo lautolu mo e lagomatai atu e tau fanau ka tagi po ke ka fakalavelave ke he tau falu a puhala foki.

Kua olioli ha a tautolu he kitia e tau fanau oti he tau tau kehekehe he Fale he Kautu mo e kitekite e tau mahani mitaki ha lautolu haia he fale he Atua. (1 Timo. 3:15) He fakalilifu e lautolu e fakatokatokaaga a Iehova ke tapuaki, kua fakalilifu e lautolu a ia mo e fakaaueina ai a lautolu katoa i loto he fakapotopotoaga.