Tokai e Fakafiafia Tino ke he Hana ni a Tokaaga
1 He tau vaha uka nai, kua lata ki a tautolu oti ke hiki e lakaaga he taha magaaho ke he taha magaaho. Ke taute e fakafiafia tino he falu a magaaho, ko e mena mitaki a ia. Ka e, kaeke lahi mahaki e magaaho ka fakaaoga mo fakafiafia tino, olioli, po kua lavelave mo e taute he tau galue kua maeke foki ke fakaetoeto fakahaga e tagata ke he tau tutuliaga fakaagaga. Lata kia tautolu ke tokai e magaaho fakafiafia tino ke he hana ni a tokaaga. (Mata. 5:3) Maeke fefe e mena nai? He muitua ke he tomatoma ia Efeso 5:15-17.
2 Fakatoka e Kaupaaga: Ne tohia e Paulo e tau Kerisiano “ke o fakalaulau” he tau mouiaga ha lautolu tuga e tau tagata iloilo. Kua lata lahi moli he fakakaupa ai mo e fakalatalata e magaaho fakafiafia tino. Mitaki lahi ke manamanatu fakatekiteki ke he tau puhala kua fakaaoga e tau magaaho fakafiafia tino ha tautolu. Ko e fakafiafiaaga tino ko e mena taute mo taha mena aoga nakai ke taute ti kitia mogoia kua fakamole noa e magaaho po kua mategugu. Kaeke oti e fakafiafiaaga ti logona kua gatigati agaia, nakai fai fakahauhau, lafi fakaagahala, fakakite he mena nei kua lata ke liu hikihiki e tau puhala ne fakaaoga e tau magaaho ha tautolu.
3 Kia Fakailoilo: Ne tomatoma e Paulo “kia fakaaoga e mutolu e tau aho he mouiaga nai” ma e tau mena aoga he mouiaga, ka e “aua neke goagoa.” Nakai lata e tau Kerisiano tukulele ke fakata e tau momoui ha lautolu ke fakauho aki e tau mena fakafiafia tino. Pete ni kua fakamalolo fakatino a tautolu ha kua okioki mo e he fakafiafia tino, ko e punaaga he malolo fakaagaga ko e agaga tapu he Atua. (Isa 40:29-31) Moua e tautolu e agaga hana ha kua tutaki ai ke he tau gahua fakateokarasi—kumikumiaga he Tohi Tapu, feoaki he tau fakapotopotoaga, fakalataha he fekafekauaga—nakai ke he tau fakafiafia tino.
4 Fakatoka Mua e Tau Mena Aoga: Kua fakaako e Paulo e tau Kerisiano “kia iloa e mutolu e finagalo he Iki.” Fakaako e Iesu kua lata ke fakauho e tau gahua ha tautolu mo e Kautu he Atua ko e mena mua a ia he moui ha tautolu. (Mata. 6:33) Uhoaki a tautolu ka taute fakamua e tau mena ne fakagofua a tautolu ke tukulele atu e tau momoui ki a Iehova. Ati fakamui, kua maeke ke tuku e tau fakafiafia tino ke he tokaaga ni kua lata. Kaeke taute pihia, to holo mitaki, mo e au atu foki e fiafiaaga.—Fakama. 5:12.