“Moua Mai I Fe e Au e Magaaho?”
1 Hohoha pihia e tokologa ha tautolu, ha kua auhia e tau momoui ha tautolu ke he tau matagahua. Nukua talahau ai ko e magaaho kua uho lahi mo e mafiti lahi he tau tanakiaga ha tautolu. Ti moua i fe e tautolu e magaaho ma e tau mena kua aoga moli, tuga e totou mo e fakaako e Kupu he Atua?—Filipi 1:10.
2 Ko e kei, nakai ko e kumi ke loga e magaaho, ka ko e fifiliaga ke he mena kua manako a tautolu ke taute aki e magaaho kua ha ha ia tautolu. Ha ha ia tautolu oti e 168 e tula he fahitapu, kavi ke 100 e tula ne fakaaoga ai ke mohe mo e gahua. Ti fakaaoga fakamitaki fefe e tautolu e vala magaaho ne tote? Kua fakamalolo he Efeso 5:15-17 a tautolu ke o “nakai tuga ne tau tagata goagoa ka kia tuga e tau tagata iloilo. Kia fakaaoga e mutolu e tau aho he mouiaga nai, . . . kia iloa e mutolu e finagalo he Iki.” Kua fakakite he mena nei e lata ke fakaaoga katoatoa e tau magaaho oti ke taute e tau mena nukua talahau e Iehova kua latatonu.
3 Ne fakatatai e Iesu e vaha ha tautolu mo e ha Noa. (Luka 17:26, 27) Ne lavelave lahi e tau tagata he magahala ia ke he tau gahua he tau aho takitaha he moui. Pete ia, ne moua e Noa e magaaho ke talaga e vaka makimaki mo e ke fakamatala. (Hepe. 11:7; 2 Pete. 2:5) Fefe? He tuku fakamua e finagalo he Atua mo e omaoma ki a ia he “eke pihia ai.”—Kene. 6:22.
4 Heigoa kua Lata ke Hau Mua? Ne pehe a Iesu: “Nakai ko e tau mena kai hokoia ke moui ai ha tagata, ka ko e tau kupu oti ne to mai he fofoga he Atua.” (Mata. 4:4) He tau fahitapu takitaha, ne moua e tautolu e ‘tau mena kai [fakaagaga] ke he tau magaaho tonu?’ (Luka 12:42) Kua lata e mena nei mo e totou tumau fakatagata mo e fakaholoaga kumikumi ke tavili oti ai ka manako moli a tautolu ke aoga ai. Mai he fakaaue ha tautolu ma e tau mena kai fakaagaga, nakai onoono a tautolu ki ai tuga he tau fale kai, ke fakahela noa ke tuga a ia ka liga kai mafiti e tau mena kai tino. Ka e, omoi he loto fakaaue a tautolu ke fakatoka e magaaho ke fakaako mo e fiafia ke he tau mena fakaagaga.
5 Ko e uta he tau mena kai fakaagaga kua takitaki ke he moui tukulagi. (Ioane 17:3) Kua lata ke tu mua he fakaholoaga ha tautolu he tau aho takitaha. Maeke nakai ia tautolu ke fakaata taha magaaho ma e totouaga he Tohi Tapu he aho mo e tauteute ma e tau feleveiaga Kerisiano? E, maeke ia tautolu. Ti, to moua e tautolu e ‘totogi lahi’ kua puna mai he iloa mo e taute e finagalo he Atua.—Sala. 19:7-11.