Fakamoli ke he Tukuleleaga ha Tautolu
1 Pete he papatiso fou po kua leva a koe, liga manatu e koe e lakaaga ia he moui hau. Ko e papatisoaga ha tautolu nakai ko e fakaotiaga, ka e, ko e kamataaga he moui he fekafekauaga tukulele kua maeke ke tumau tukulagi. (1 Ioa. 2:17) Ko e heigoa ne putoia e fakamoli ke he tukuleleaga ha tautolu?
2 Muitua ke he Fakafifitakiaga ha Keriso: Ha kua papatiso, ne “kamata e gahua hana” ko Iesu, he fakamatala e “vagahau mitaki he kautu he Atua.” (Luka 3:23, NW; 4:43) Tatai ai, he fakamailoga e tukuleleaga ha tautolu ki a Iehova he papatisoaga, ne eke a tautolu mo tau fekafekau fakauku he tala mitaki. He lata ke lahi e magaaho mo e laliaga ke moua e tau manako fakatino he moui, ko e matapatu gahua ha tautolu ko e fekafekauaga Kerisiano. (Mata. 6:33) He nakai tutuli ke moua e mautu po ke matalahi, ko lautolu ne tukulele ke he Atua kua kumi ke ‘nava ha lautolu a feua,’ tuga ne taute he aposetolo ko Paulo. (Roma 11:13) Kua ofania kia e koe e kotofaaga hau he fekafekau ki a Iehova mo e eketaha ki ai?
3 Ke he mena ne tupu ki a Iesu, kua lata ia tautolu ke ‘totoko atu ke he Tiapolo.’ (Iako. 4:7) Ne kamatamata e Satani a Iesu he oti Hana papatiso, ti tatao pihia foki e ia e tau fekafekau tukulele ha Iehova he vaha nei. (Luka 4:1-13) He viko takai he lalolagi ha Satani, kua lata ia tautolu ke fakagahuahua e akonaki fakatagata, he fakamamao mai he ha mena kua takiva aki e tau manamanatuaga ha tautolu po ke fakakelea aki e tau loto ha tautolu. (Fakatai 4:23; Mata. 5:29, 30) Kua tomatoma ke he tau Kerisiano ke “nakai maeke ke fai tufaaga he laulau he Iki katoa mo e laulau he tau temoni.” (1 Kori. 10:21) Kua lata e mena nei ke puipui mai a tautolu he tau fakafiafiaaga nakai mitaki, tau feoakiaga kelea, mo e tau hagahagakelea he Internet. Kua lata foki ia tautolu ke fakamamao mai he tau tohi he tiaki taofiaga. He mataala ke he tau mena nei mo e falu lagatau ha Satani ka lagomatai a tautolu ke fakamoli ke he tukuleleaga ha tautolu.
4 Fakaaoga e Tau Foakiaga he Atua: Ke maeke ke lagomatai a tautolu ke fakamoli ke he tukuleleaga ha tautolu, ne foaki e Iehova e lagomataiaga puhala mai he hana Kupu mo e fakapotopotoaga Kerisiano. Taute e totou Tohi Tapu mo e liogi ki a Iehova mo vala he fakaholoaga hau he tau aho takitaha. (Iosua 1:8; 1 Tesa. 5:17) Kia fiafia ke he tau feleveiaaga he fakapotopotoaga. (Sala. 122:1) Feoaki mo lautolu kua matakutaku ki a Iehova mo e pipiki mau ke he tau fekau hana.—Sala. 119:63.
5 Mo e lagomatai faka-Atua, maeke ia koe ke fakamoli ke he tukuleleaga hau ki a Iehova mo e moua e olioli he fekafekau tukulagi ki a ia.—Sala. 22:26, 27; Filipi 4:13.