Fifitaki e Mahani Mitaki a Iehova
1 He mole e nava ke he toaga la fulufuluola po ke tau kai lolo, nakai kia fakalagalaga a tautolu ke fakaaue ki a Iehova, ko e Punaaga he tau mitaki oti kana? Kua omoomoi he mahani mitaki hana a tautolu ke manako ke fifitaki a ia. (Sala. 119:66, 68; Efe 5:1) Maeke fefe ia tautolu ke fakakite e alito he mahani mitaki?
2 Kia Lautolu ne Nakai Tua: Taha puhala kua maeke ia tautolu ke fifitaki e mahani mitaki ha Iehova he fakakite e manamanatuaga moli ki a lautolu ne nakai fakalataha mo tautolu ke he tua. (Kala. 6:10) He fakakite e mahani mitaki ke he tau puhala aoga kua maeke ke lauia mitaki e puhala kua onoono a lautolu ke he Tau Fakamoli a Iehova mo e fekau ne hahamo e tautolu.
3 Ma e fakatai, he tatali i loto he poko fakatali ke he ekekafo, ko e matakainaga tane paionia fuata ne nofo tapa ke he fuakau fifine ne tuga kua gagao lahi atu ke he falu i ai. He magaaho ne hoko mai e magaaho hana ke kitia e ekekafo, ne fakaata e ia e fifine ia ke fano mua ia ia. Ne liu a ia he mogo fakamui feleveia mo e fifine ia ke he makete, kua fiafia lahi a ia ke kitia a ia. Pete ni he nakai talia e ia e tala mitaki he magaaho fakamua, ne tala age a ia kua iloa e ia mogonei ko e Tau Fakamoli a Iehova kua fakaalofa moli ke he tau katofia ha lautolu. Kua kamata ai e fakaakoaga Tohi Tapu tumau mo ia.
4 Ke he Tau Matakainaga ha Tautolu: Kua fifitaki foki a tautolu ke he mahani mitaki a Iehova he magaaho ka fakaloa atu a tautolu ke lagomatai e tau matakainaga talitonu. He tau magaaho matematekelea, ko tautolu mua ka hohoko atu ke lagomatai e tau matakainaga ha tautolu. Kua fakakite e tautolu e aga taha nei ka lagomatai e tautolu a lautolu ne manako puhala ke o atu ke he tau feleveiaaga, ahi atu ki a lautolu ne gagao, mo e fakalaulahi e logonaaga fakaalofa ki a lautolu kua nakai iloa mitaki e tautolu he fakapotopotoaga.—2 Kori. 6:11-13; Hepe. 13:16.
5 Ko e taha puhala ne fakakite e Iehova e mahani mitaki ko e hana ‘mautali ke fakamagalo.’ (Sala. 86:5) He fifitaki ki a ia, kua maeke ia tautolu ke fakakite e fakaalofa mahani mitaki ha tautolu he fakamagalo atu ke he falu. (Efe 4:32) Kua lagomatai he mena nei e feoakiaga ha tautolu mo e tau matakainaga talitonu ke “mitaki lahi mo e fulufuluola.”—Sala. 133:1-3.
6 Kia fakatupu he mahani mitaki kua lahi mahaki ha Iehova a tautolu ke puapua e fakaheke atu ki a ia mo e kia matala he olioli. Ti fakalagalaga foki a tautolu ke tutuli ke fifitaki e mahani mitaki hana ke he tau mena oti kua taute e tautolu.—Sala. 145:7; Iere. 31:12.