Fakamatala ke he Tau Magafaoa—Fefe?
1. Ko e ha kua lata ke fakailoilo ka fakamatala ke he tau magafaoa?
1 Ko e lahi mahaki ha ia he olioli ka moua e tautolu ka huhu atu auloa ke he lalolagi fou mo lautolu ne ofania e tautolu, fakalataha mo lautolu he tapuakiaga ki a Iehova! He fakamatala a tautolu ke he tau magafaoa, to liga fakamoli e amaamanakiaga olioli nei. Ka taute pihia ke he puhala fakatotoka, kua lata ke fakailoilo. Ne talahau he taha leveki takaiaga: “Kua mua atu e mitaki e tau fua ne moua e lautolu ne fakalagalaga e fia iloa ke he tau magafaoa ha lautolu he fakamatala fakavalavala.” Liga taute fefe e tautolu e mena nei?
2. Maeke fefe e fiafia moli ke he tau magafaoa ha tautolu ke lagomatai a tautolu ke fakalagalaga ha lautolu a fia iloa?
2 Fakalagalaga ha Lautolu a Fia Iloa: Manamanatu fakamitaki tuai ke he puhala hau ka liga fakalagalaga e fiafia he tau magafaoa hau. (Fakatai 15:28) Ko e heigoa e tau mena ne tupetupe a lautolu ki ai? Ko e heigoa e tau paleko hane fehagai a lautolu ki ai? Liga maeke ia koe ke fakakite age e taha vala tala po ke talahau taha kupu tohi fakaohooho ne hagaao ke he matakupu kua fiafia lahi a lautolu ki ai. Ka nakai nonofo tata mai e tau magafaoa hau, liga maeke ia koe ke taute e mena nei he tohitohi po ke hea he telefoni. He nakai ta omoi ki a lautolu, gana e tau tega he kupu moli, ti ono ki a Iehova ke fakatupu e tau tega ia.—1 Kori. 3:6.
3. Maeke fefe e fiafia he tau magafaoa ha tautolu ki a tautolu ke hafagi e hala ma e fakamatala?
3 Ne tala age a Iesu ke he tagata ne vega mai e ia e tau temoni loga i ai: “Fano a a koe ke he hau a fale, mo e hau a faoa, ti fakamatala e koe kia lautolu e tau mena loga kua eke he Iki kia koe, mo e hana fakaalofa kia koe.” (Mare. 5:19) Manamanatu la ke he logonaaga ne liga moua he tau magafaoa hana ha ko e mena nei! Pete he liga nakai logona e koe ha mena ofoofogia pihia, to liga fiafia e tau magafaoa hau ke he tau gahua hau po ke he tau fanau hau. He talahau e lauga ne taute e koe he Aoga Fekafekau Fakateokarasi, ko e fonoaga ne fina atu a koe ki ai, ko e ahiahi ke he Peteli, po ke taha lakaaga fou hau ka liga hafagi e hala ma hau ke talahau atu foki taha mena ki a lautolu hagaao ki a Iehova mo e hana fakatokatokaaga.
4. Ko e heigoa e tau matahele kua lata ia tautolu ke kalo mai ai ka fakamatala ke he tau magafaoa ha tautolu?
4 Kia Fakailoilo: Ka fakamatala ke he tau magafaoa, kalo mai he lahi mahaki e mena ka tala age ki a lautolu he taha e magaaho. He manatu e magaaho ne kamata a ia ke fakaako e Tohi Tapu, taha e matakainaga tane ne talahau: “Ne fa loloa e tau fakamaamaaga haku ke he matua fifine haku he teitei oti e tau mena haku ne ako ke he Tohi Tapu he tala age ki a ia, ti fa takitaki e mena nei ke he tau taufetoko, mua atu mo e matua tane haku.” Pihia foki ka fakakite he tagata he magafaoa e fiafia ke he fekau he Tohi Tapu, tali ke he puhala ke au atu e fakaohooho he tagata ke fia iloa atu foki. (Fakatai 25:7) Fakakite tumau e fakalilifu, totonu, mo e fakauka, tuga ka tutala a koe ke he tau tagata kehe he fonua.—Kolo. 4:6.
5. Ko e heigoa ha tautolu kua lata ke taute ka nakai talia fakamitaki he tau magafaoa a tautolu ka fakamatala ki a lautolu?
5 He taha magaaho, ne manatu e tau magafaoa ha Iesu kua vikoia a ia. (Mare. 3:21) Ka e fakamui, ne tua e falu. (Gahua 1:14) Ka nakai talia mitaki e tau laliaga fakamua hau ka talahau e kupu moli ke he tau magafaoa hau, kia nakai fiu. Na maeke e tau tutuaga mo e tau aga ke hikihiki. Matutaki ke kumi foki taha magaaho ke tutala ke he taha manatu ne liga fakalagalaga e fia iloa ha lautolu. Neke liga moua e koe e olioli he lagomatai a lautolu ke kamata o he puhala ke he moui tukulagi.—Mata. 7:13, 14.