Fakakite e Fiafia Fakatagata—Ha Ko e Matakite
1 Ko Iehova ko e Atua mo Keriso Iesu ne mailoga mitaki e tau manako pauaki he tau tagata mo e he foaki ki a lautolu e lagomatai. (2 Nofo. 16:9; Mare. 6:34) Ka kitia e tautolu e fiafia mo e tupetupe ha lautolu ne feleveia e tautolu he fekafekauaga, kua liga maeke ia tautolu ke hikihiki fakatatau e fakataitaiaga ha tautolu he tala mitaki.
2 Kia Mataala ke he Tau Takatakaiaga: Ne matakite a Iesu. (Mare. 12:41-43; Luka 19:1-6) Pihia foki, ka o atu a tautolu ke he gutuhala he tagata ti mailoga e tau fakamanaia fakalotu, tau matahigoa he tau peleoafi, po ke tau toi he lotopa, liga maeke ia tautolu ke fakatupu e magaaho ke fakamatala lauia mitaki e tala mitaki.
3 Ko e talahauaga he fofoga mo e mahani he tagata ka fakakite taha mena hagaao ke he tau logonaaga hana. (Fakatai 15:13) Liga ko e galo he fakahele po ke taha tuaga fakatupetupe ati manako a ia taha fakamafanaaga. To liga loto fakaaue a ia kaeke totou e falu kupu tohi kua latatonu. (Fakatai 16:24) Kua fakatepetepe kia e tagata he hu mai he gutuhala po ke lukuluku e tama mukemuke ne tagi? Ka pihia, kua liga mitaki ke pulega ke liu atu he taha magaaho foki. He fai logonaaga mo e ‘fakakite e feofanaki,’ to liga omoomoi e tautolu e tagata ke fanogonogo ka liliu atu a tautolu.—1 Pete. 3:8.
4 Hikihiki Hau a Tau Talahauaga: Ne kitia he aposetolo ko Paulo kua toka he taone ko Atenai e fatapoa ne tukulele ke he ‘Atua Nakai Iloa.’ Kua omoomoi he mena nei e puhala hana ne talahau e tala mitaki, nukua pehe a ia: “Ko ia kua tapuaki ki ai a mutolu, mo e nakai iloa, kua fakamatala atu ai e au kia mutolu.” Ko e fakafeleveiaaga fakailoilo ha Paulo ne fakalagalaga e falu i ai ke manamanatu ke he fekau he Kautu ti eke mo tau tagata talitonu.—Gahua 17:23, 34.
5 Pihia foki, ko e matakite ha tautolu kua lagomatai a tautolu ke mailoga e fiafia he tagata ti fakaata a tautolu ke hikihiki ai e fakafeleveiaaga. Fakaaoga e tau huhu ne liga maeke ke talahau e tau manatu he tagata he kaina. Manamanatu ke he tau kupu tohi ne liga fakaaoga ke fakalaulahi aki hana fiafia. (Fakatai 20:5) Ko e matakite ha tautolu mo e fakakite e fiafia fakatagata moli ke he falu ka lagomatai a tautolu ke tukuogo fakalotomatala e tala mitaki.