Feaki e Loto Fakaaue ma e Tau Mahani Mua Ue Atu a Iehova
1 He fekafekauaga ha tautolu, ne nakai ko e fakaako hokoia e tautolu e falu ke he tau kupu mooli he Tohi Tapu. Lagomatai e tautolu e tau tagata ke iloa mooli a ia ko Iehova mo e feaki e loto fakaaue ma e tau mahani mua ue atu haana. Ka ako e lautolu ne loto fakamooli e kupu mooli ke he Atua, kua lauia malolō ai a lautolu, ti fakalagalaga a lautolu ke hikihiki e tau momoui he ‘mahani ke lata mo Iehova, kia fiafia mai a ia ke he tau mena oti.’—Kolo. 1:9, 10; 3:9, 10.
2 Tohi Fakaako Foou ha Tautolu: He kamataaga, ne hagaao e tohi Fakaako he Tohi Tapu ke he tau mahani a Iehova. Ko e veveheaga fakamua ne tali e tau hūhū: Kua manamanatu mai moli kia e Atua ki a koe?, Tuga e heigoa e Atua?, mo e Maeke nakai ke tata atu ke he Atua? Kua fakatōtō foki he veveheaga ia e tapu he Atua (para. 10), haana fakafili tonu mo e fakaalofa hofihofi noa (para. 11), haana fakaalofa (para. 13), haana malolo (para. 16), mo e haana a fakaalofa hofihofi, mo e fakaalofa noa, talia ke fakamagalo, fakauka, mo e mahani fakamoli (para. 19). Kua fakakatoatoa he paratafa 20 e manatu he talahau: “Ka lahi e ako hau hagaao ki a Iehova, to moli lahi a ia ki a koe mo e lahi e kakano hau ke ofania a ia mo e logona e tata ki a ia.”
3 Fakaaoga fēfē e tautolu e tohi Fakaako he Tohi Tapu ke lagomatai e tau tagata fakaako Tohi Tapu ke fakatata ki a Iehova? He oti e fakatutala ke he paratafa ne fakatōtō mai taha he tau mahani he Atua, liga hūhū a tautolu ke he tagata fakaako, “Ko e heigoa ne talahau he mena nei hagaao ki a Iehova ko e peresona?” po ke “Fakakite fēfē he mena nei e fiafia fakatagata he Atua ki a koe?” He fakaaoga tumau e tau hūhū pihia he fakaakoaga, kua fakaako e tautolu e tau tagata fakaako ke manamanatu fakahokulo ke he tau mena ne ako e lautolu ti lagomatai a lautolu ke tupu e loto fakaaue ke he tau mahani mua ue atu a Iehova.
4 Fakaaoga e Puha Fakamanatu: He matahiku he tau veveheaga takitaha, uiina e tagata fakaako ke talahau he tau kupu ni haana e tau manatu takitaha he puha “Tau Mena ne Fakaako he Tohi Tapu.” Kumi e tau kupu tohi ne tūtū ai. Ke futia mai e tau mena he loto he tagata fakaako, kia hūhū he falu magaaho, “Fēfē e logonaaga haau ke he mena ne fakaako he Tohi Tapu ke he manatu nei?” He taute pihia, ne nakai ni peehi e koe e tau matapatu manatu he veveheaga ka e kitia mitaki foki e mena ne talitonu mooli e tagata fakaako ki ai. To lagomatai he mena nei e tagata fakaako ke kamata feaki e fakafetuiaga mo Iehova.