Ko e Heigoa Haau ne Tuku Fakamua?
1 To tali fēfē e koe e hūhū ia? Mooli, manako oti a tautolu ke tuku fakamua e Kautu. (Mata. 6:33) Ka e liga hūhū hifo ki a tautolu ni, ‘Kua fakakite kia he tau fifiliaga haaku kua pihia mooli au?’ Kua fakamalolō he Tohi Tapu a tautolu: “Kia kumikumi hifo a mutolu kia mutolu.” (2 Kori. 13:5) Maeke fēfē a tautolu ke kumikumi hifo ki a tautolu kua tuku fakamua e tautolu e Kautu?
2 Magaaho ha Tautolu: Maeke ke kamata e tautolu he kumikumi e puhala ne fifili ke fakaaoga aki e tau magaaho ha tautolu. (Efeso 5:15, 16) Lahi fēfē e magaaho ne fakamole e tautolu he tau faahi tapu takitaha ke fakafiafia, kitekite televisoni, fakaaoga e Internet, po ke taute e matafeua? Ka tohi hifo e tautolu e lahi he magaaho ne fakamole e tautolu ke he tau mena ia ti fakatatai mo e lahi he magaaho ne fakaaoga e tautolu ke he tau matagahua fakaagaaga, to liga ofo a tautolu. Lahi mahaki kia e magaaho ne fakamole e tautolu ke gahua ke moua e tau monuina ka e fakateaga ke he tau gahua tapu? Lagafiha e fakatō he tau feleveiaaga po ke fekafekauaga ha tautolu ha ko e fenoga fakafiafia he matahiku vahā tapu?
3 Fakatoka e Tau Mena Mua: Laulahi ia tautolu ne nakai lahi e magaaho ke taute e tau mena oti ne manako a tautolu ki ai. Ti ko e tuku fakamua e tau mena he Kautu, kua lata ia tautolu ke filifilia e tau mena mua ha tautolu ti setulu e tau magaaho ma e “tau mena ne mua atu e aoga lahi.” (Filipi 1:10, NW) Putoia he tau mena nei e fakaako e Kupu he Atua, fakalataha ke he fekafekauaga, leveki e magafaoa, mo e o he tau feleveiaaga Kerisiano. (Sala. 1:1, 2; Roma 10:13, 14; 1 Timo. 5:8; Hepe. 10:24, 25) Ko e falu gahua, tuga e faofao tino kua lata mo e fakafiafiaaga atihake, kua aoga lahi. (Mare. 6:31; 1 Timo. 4:8) Nakai lata ke tuku fakamua e tau mena nei ne tote e aoga.
4 Taha e matakainaga fuata ne tutuli ke tuku fakamua e Kautu he taute e gahua mau ka e nakai tutuli e fakaakoaga tokoluga ke hagaaki atu ke he gahua tupe. Ne ako e ia e vagahau kehe ti hiki atu ke fekafekau he matakavi ne manako lagomatai lahi. Ne pehē a ia: “Kua moua e au e magaaho homo ue atu he moui haaku. Kua fakahauhau lahi mooli e fekafekauaga! Loto au ke he tau tagata fuata oti ke taute taha mena tuga anei ti logona e mena ne logona e au. Nakai fai mena ke tatai mo e fekafekau tumau ki a Iehova.” E, he tuku fakamua e Kautu kua tamai e tau monuina ki a tautolu, ka e mua atu, kua fakafiafia ha tautolu a Matua he lagi, ko Iehova.—Hepe. 6:10.