Ofania ha Tautolu a Tau Kotofaaga!
1 Tali mai he momoui e tau tagata, ne foaki e Iehova ke he tau fekafekau haana loga e tau kotofaaga kehekehe. Kua foaki e ia e tau kotofaaga ki a lautolu pete ko e tagata taane po ke fifine, fuakau, po ke tau tuaga ha lautolu he moui. (Luka 1:41, 42; Gahua 7:46; Filipi 1:29) Ko e heigoa e tau kotofaaga ne foaki e Ia ki a tautolu he vahā nei?
2 Falu he Tau Kotofaaga ha Tautolu: Kua ha ha ia tautolu e lilifu ha kua fakaako ai e Iehova. (Mata. 13:11, 15) Ko e fakaheke a Iehova ke he tau talahauaga ha tautolu he tau feleveiaaga he fakapotopotoaga ko e taha kotofaaga ne olioli e tautolu. (Sala. 35:18) Ka moua e tautolu e magaaho ke tali, kua taute fakamakai e tautolu. Pihia foki, ka onoono a tautolu ke he tau kotofaaga takitaha he fakapotopotoaga ko e mena lilifu, to taute e tautolu ke he otiaga he tau lotomatala ha tautolu. Fakalataha tumau nakai a tautolu ke he kotofaaga he fakatumau ke fakameā mo e leveki fakamitaki e Fale he Kautu?
3 Pete he totou miliona ne manamanatu ko e mena logona nakai he Atua e tau liogi ha lautolu, kua olioli e tautolu e lilifu ha kua logona he Peresona ne mua ue atu he lagi mo e lalolagi katoatoa e tau liogi ha tautolu. (Fakatai 15:29) Kua fanogonogo tokotaha a Iehova ke he tau liogi he tau fekafekau haana. (1 Pete. 3:12) Ne nakai fai fakakaupāaga ne tuku e ia ke lata mo e lagaloga he liogi ki a ia. Ko e mena fakaalofa ofania ha ia kua moua e tautolu ke maeke ke liogi “nakai noa”!—Efeso 6:18.
4 ‘Ko e Tau Ekegahua he Atua’: Taha he tau kotofaaga homo ue atu ha tautolu ko e fakamatala e tala mitaki he Kautu he Atua ko e ‘tau ekegahua he Atua.’ (1 Kori. 3:9) Ko e gahua nei ne tamai e makona mo e fakahauhauaga. (Ioane 4:34) Kua maeke ia Iehova ke nakai fakaaoga e tau tagata ke taute e gahua nei, ka kua foaki e ia ki a tautolu e matagahua ko e fakakiteaga he fakaalofa haana. (Luka 19:39, 40) He taute pihia, ne nakai age e Iehova e kotofaaga ke he ha tagata noa ni. Ko lautolu ne fakalataha ke he fekafekauaga he fonua kua lata ke fakamooli mo e fakatumau ke he tau kotofaaga fakaagaaga pauaki. (Isaia 52:11) Fakakite nakai e tautolu e uho he kotofaaga nei he taute e fekafekauaga mo vala aoga he fakaholoaga fakafaahi tapu ha tautolu?
5 Ko e tau kotofaaga mai ia Iehova kua fakamaukoloa aki a tautolu. (Fakatai 10:22) Ua uta fakateaga e tau kotofaaga ia! He fakatātā kua ofania mooli e tautolu e tau kotofaaga he fekafekauaga, kua fiafia a tautolu ke he ha tautolu a Matua he lagi, ko e Foaki he “tau mena mitaki oti kua foaki noa mai, katoa mo e tau mena fakaalofa oti kua katoatoa ai e mitaki.”—Iako. 1:17.