Puha Hūhū
◼ Ka manako e hoa ke fakaaoga e Fale he Kautu ma e fakamauaga ha laua, ko e heigoa e tau matakupu kua lata ia laua ke fakatutala mo e tau motua?
Ko e tau fakamauaga ne fakatokatoka fakatatau ke he tau matapatu fakaakoaga he Tohi Tapu kua tamai e lilifu ki a Iehova. Kua mooli pauaki e mena nei hagaao ke he tau fakamauaga he Fale he Kautu, ha kua kitia he tau tagata he matakavi ia kua fakaata he tau fakaholoaga ne taute i ai e fakatokatokaaga ha tautolu. Ke “eke e tau mena oti mo e fulufuluola mo e taute fakamitaki,” kua latatonu e tau motua he matakavi ke putoia ka ole ke fakaaoga e Fale he Kautu ma e fakamauaga.—1 Kori. 14:40.
Ko e hoa ne manako ke fakaaoga e Fale he Kautu ma e fakamauaga ha laua kua lata ke tuku e tohi ole ke he komiti fekafekau he fakapotopotoaga ne feleveia he fale ia. Lata e tohi ha laua ke age tuai mo e lata ke fakakite e aho mo e tulā kua manako a laua ke fakaaoga e fale. Kua lata ia laua ke tokaloto to nakai hikihiki he tau motua e setulu ma e feleveiaaga ke felauaki mo e fakamauaga. Lafi ki ai, ko e kitofaihoana mo e kitofaitaane kua lata ke mitaki e tuaga, he momoui fakatatau ke he tau matapatu fakaaoga he Tohi Tapu mo e tau tuaga tututonu ha Iehova.
Ke mailoga mooli kua fakaata mitaki he fakamauaga e Atua lilifu ha tautolu, kua lata e hoa ke fakatutala e tau fakaholoaga he fakamauaga mo e komiti fekafekau ato fakakatoatoa ai. Pete to nakai peehi he tau motua e tau manatu fakatagata ha lautolu ke he hoa, kaeke ke fai fakaholoaga fakahanoa kua fakatokatoka, kua lata ke hikihiki. Ko e tau leo kofe ne fifili mai he Kingdom Melodies po ke i loto he tohi lologo ha tautolu ka maeke ke fakaaoga. Ko e ha fakamanaia ke he Fale he Kautu po ke hikihiki e tau nofoa kua lata ni ke moua foki e fakaatāaga. Kaeke ke pokiata po ke poki vitiō, kia nakai fakatauhele he mena nei e lilifu he matafekau. Maeke e tau motua ke fakaatā e fakataitai (rehearsal) he Fale he Kautu kaeke kua nakai fakatauhele e falu fakaholoaga he fakapotopotoaga. Nakai lata ke tuku hake e tau uiina he lapa fakailoa. Pete ia, to liga taute he tau motua e fakailoaaga kū he Feleveiaaga Fekafekau ke fakailoa ke he fakapotopotoaga hagaao ke he fakamauaga ka fakahoko he Fale he Kautu.
Ne nakai ko e poakiaga ke papatiso oti e tau tagata ne putoia ke he matakau he fakamauaga, ka kua nakai latatonu foki ke fakalataha a lautolu he matakau ia ne nakai fakatatau e puhala moui mo e tau matapatu fakaakoaga he Tohi Tapu po kua nakai felauaki e tau mahani ha lautolu mo e tau manatu he tau tagata ne hohoko atu. Kua lata e fakamauaga ke taute he motua ne kua kotofa, kaeke kua atā. Ko e tau motua ko e tau faiaoga kua latatonu ke he Kupu he Atua, ti kua latatonu lahi a lautolu ke fakamaama e tau matapatu fakaakoaga he Tohi Tapu ne kua felauaki mo e matafekau aoga nei.—1 Timo. 3:2.
Ha kua fakaata foki he fakamauaga e motua ka taute e fakamauaga, kua lata foki a ia ke iloa e tau fakaholoaga he fakamauaga. To feleveia a ia mo e hoa ke iloa e tuaga he tau mahani ha laua ke he fakamahaniaga; to manako e hoa ke vagahau fakamooli mo e atāina ki a ia. Kaeke kua mau e tagata taane po ke fifine he magaaho fakamua, kua lata ia ia ke fakakite kua atāina faka-Tohi Tapu mo e matafakatufono a ia ke mau. (Mata. 19:9) To putoia he mena nei e fakakite ke he motua e lagaki he fakamooliaga fakahiku kua tau vevehe.
Ka tutala fakamooli mo e kaufakalataha katoatoa e hoa mo e tau motua, to eke e fakamauaga mo magaaho fiafia ma e tau tagata oti.—Fakatai 15:22; Hepe. 13:17.