Fakaaoga Nakai e Koe e Tohi Reasoning?
1. Fakaako fēfē he aposetolo ko Paulo mo Iesu e falu?
1 Ne eketaha e aposetolo ko Paulo ke ‘fakamaama mai he tau Tohi.’ (Gahua 17:2, 3; 18:19) He taute pihia, ne fifitaki e ia a Iesu, he fatiaki tumau e tau Tohiaga Tapu mo e fakaaoga e tau fakatai ke lagomatai e tau tagata fanogonogo haana ke maama e finagalo he Atua. (Mata. 12:1-12) Kua talaga e tohi Reasoning From the Scriptures ke lagomatai a tautolu ke taute pihia.
2. Liga maeke fēfē ia tautolu ke fakaaoga e tohi Reasoning ke tauteute e tau fakafeleveiaaga lauia mitaki?
2 Tauteute e Tau Fakafeleveiaaga Lauia Mitaki: Kua ha ha he Reasoning From the Scriptures e tau fakafeleveia fakalagalaga he lau 9-15. He ako mo e fakaaoga e tau fakafeleveiaaga kehekehe, mua atu kaeke kua gahua tumau e fonua ha mutolu, to lafi ke he fekafekauaga ha mutolu e tau puhala kehekehe mo e lagomatai a mutolu ke hikihiki mo e lauia mitaki he kamata e tau fakatutalaaga. Maeke ke totou fakahako mai e tau fakafeleveiaaga he tohi ka fakamatala he telefoni po ke tutala he initakomo he tau fale tokoluga ne puipui malolō.
3. Ko e heigoa kua moua he tohi Reasoning he lau 16-24 ka lagomatai a tautolu he fekafekauaga?
3 Kautū ke he Tau Tagata Taofi Fakatutalaaga: Ko e ha he nakai manamanatu tuai ke he tau tagata taofi fakatutalaaga ka feleveia he matakavi haau ti fakaaoga falu minuti gahoa ato fakamatala ke kitekite e tau tali kua lata he lau 16-21? To liga kia ko e tau Iutaia, Hinitū, Musilimi, po ke tau Puta e tau tagata he kaina? Ka pihia, to lagomatai e vala tala he lau 21-24?
4. Liga fakaaoga fēfē e tautolu e tohi Reasoning ka fai hūhū po ke talahau mai e matakupu totoko?
4 Tali e Tau Hūhū: Kua maeke foki he tohi Reasoning ke lagomatai a tautolu ka fai hūhū po ke talahau mai e matakupu totoko. Kua liga tala age a koe ke he tagata to manako a koe ke fakakite age ki a ia taha mena aoga ne iloa e koe hagaao ke he matakupu ti tamai e tohi Reasoning. Ha kua tohi fakapapahi e tau mataulu ke he alafapete, fuluhi ke he mataulu pauaki ne manatu a koe kua toka ai e tau vala tala ne latatonu. Ti onoono hifo ke he tau hūhū ne matatohi puni uli lahi. Ka nakai kitia mafiti e koe e mena haau ne kumi, fuluhi ke he index i tua. Ka moua e koe e vala tala kua latatonu, totou fakahako mai he tohi. Ka fakatutala a koe ke he kupu tohi pauaki, liga moua e koe e vala kua manako a koe ki ai he lau 445 i lalo he “Scriptures Often Misapplied.”
5. Ko e heigoa foki falu fakaaoga he tohi Reasoning?
5 Falu Fakaaoga: Ne toka he falu e lagaki he tohi Reasoning he gahuaaga po ke aoga ke lagomatai a lautolu ke tali e tau hūhū tuga e, ‘Ko e ha ne nakai fakamanatu e koe e tau aho okioki?’ Ne moua he tau fuata e vala tala i lalo he tau mataulu “Creation” mo e “Evolution” ke lagomatai a lautolu ka tohi tala he aoga. Amanaki kia a koe ke fano ke aahi e tagata gagao po ke taha ne mate e fakahele? Ko e vala tala i lalo he “Encouragement” ka liga lagomatai a koe ke foaki e fakamafanaaga faka-Tohi Tapu. Haia foki he tohi Reasoning e tau vala tala aoga ma lautolu kua tauteute e tau lauga mo e taute e tau feleveiaaga ma e gahua he fonua.
6. Ko e heigoa e foliaga ha tautolu ka fakamatala?
6 Ka fakamatala, ko e foliaga ha tautolu, nakai ke mua he taufetoko; po ke fakahoko hokoia he vala tala. Kua manako a tautolu ke fakamaama fakailoilo mai he tau Tohiaga Tapu. He fakaaoga fakamitaki e tautolu e tohi Reasoning, kua fakakite e tautolu kua mataala tumau a tautolu ke he ha tautolu a fakaako atu.—1 Timo. 4:16.