Kia Mautauteute Fakamatafeiga ma e Fakamanatuaga
Ko e olioli mo e lilifu mooli ma e tau tutaki he Keriso ke mautauteute fakamatafeiga ma e pō ka fakamanatu e mate a Iesu Keriso! (Luka 22:19) Ko e heigoa e tau lakaaga aoga kua lata ke taute ke mautauteute ma e Fakamanatuaga?
◼ Magaaho mo e Matakavi: Kua lata oti ke maama mitaki e tulā mo e matakavi tonu ka fakahoko e Fakamanatuaga. Kaeke ke fai fakapotopotoaga foki ka feleveia he Fale he Kautu, kua latatonu ke hoko atu he magaaho tonu mo e toka fakamafiti he magaaho fakamui, ha ko e magaaho ne kotofa he vahāloto he tau feleveiaaga kua kaupā ni. Kua lata ke taute e tau laliaga ke kalo mai he nakai fakaapiapi e ava ke hū atu po ke gutuhala, he kaupā, he tau hala o hui he tau tagata, mo e ke he tau tuaga motokā.
◼ Tau Uiina: Fai fufuta nakai e tau tagata fakailoa oti ke he tau uiina, ti iloa nakai e lautolu e mena ne talahau i ai? Kua fakamahani nakai e koe e puhala ke foaki aki e uiina nei? Ko hai ka age e koe e uiina ki ai? Kua lata ke taute e tau laliaga ke oti e tau uiina he foaki.
◼ Puhala Ō Fenoga: Liga manako puhala a lautolu ne fiafia ti pihia mo e falu matakainaga ke ō mai po ke falu lagomatai fakatagata. Ko e heigoa e tau fakatokaaga ne taute ke leveki aki e tau manako ha lautolu?
◼ Tau Falaoa mo e Uaina: Mailoga ke nakai maeke ke fakahoko e tau mena fakatai ato mole e tōaga he laā. Kua lata e tau fakatokaaga ke taute ke lagomatai a lautolu ne fakauku ne nakai malolō mo e nakai maeke ke hohoko atu. Lata ke moua e falaoa mo e uaina kua lata tonu mo e fakatoka ai.—Kikite e Kolo Toko ia Mati 1, 2003, lau 10-11, paratafa 14, 17.
◼ Fale he Kautu: Kua lata e fale ke fakameā fakamitaki ato kamata. Kua lata ke tamai tuai mo e fakatokatoka ke he fale ka feleveia ai, e tau kapiniu lapalapa, tau kalase, mo e laulau mo e faliki laulau kua lilifu. Ka fakaaoga e taha fale foki, mailoga ke ha ha i ai e fakatokaaga leo kua mitaki ke maeke he tau tagata oti ke logona e tagata lauga. Kia kotofa tuai e tau fekafekau mo e tau tagata lagomatai ke lata mo e tau matagahua ha lautolu, mo e fakatokaaga kua tonu ke muitua ki ai, mo e lata ke he tau tapulu mo e tauteuteaga lilifu.
He magaaho aoga lahi nei, ko e Fakamanatuaga he mate a Iesu Keriso, kua manako a tautolu ke tauteute fakamatafeiga takitokotaha mo e fakapotopotoaga. To ha ha i ai mooli e monuina lahi a Iehova i luga ha lautolu oti ne fakatātā e loto fakaaue ma e tau mena oti ne foaki e Iehova ma e tau tagata he puhala he poa he haana Tama fakahele, ko Iesu Keriso.