Fekafekauaga ha Tautolu—Ko e Fakakite he Fakaalofa ha Tautolu ma e Atua
1. Ko e heigoa he fakaalofa ma e Atua ne omoomoi a Iesu ke taute?
1 Kua omoomoi he fakaalofa a Iesu ke taute e fekafekauaga haana. Ko e tau puhala oti he fekafekauaga a Iesu ko e fakamooliaga katoatoa he fakaalofa haana ma Iehova. Ne pehē a Iesu: “Kia iloa he lalolagi, kua fakaalofa au ke he Matua, tuga e poaki mai foki he Matua kia au, pihia he eke e au.” (Ioane 14:31) Ko tautolu ko e tau tutaki ne mumui ki a Iesu, kua moua foki e lilifu ke fakakite e fakaalofa hokulo ha tautolu ma e Atua he fekafekauaga ha tautolu.—Mata. 22:37; Efeso 5:1, 2.
2. Lauia fēfē e fekafekauaga ha tautolu he fakaalofa ma Iehova?
2 “Kia Tapu Hau a Higoa”: Ka fakaaoga fakamakutu e tautolu e tau magaaho oti ke tutala ke he falu hagaao ki a Iehova mo e haana fakatokaaga he Kautu, kua fakakite e tautolu e fakaalofa ha tautolu ma e Atua, kakano kua fai vala a tautolu ke he fakatapuaga he higoa haana. (Sala. 83:18; Eseki. 36:23; Mata. 6:9) Tuga ni e fekafekauaga ha Iesu, ko e fekafekauaga ha tautolu ko e fakakiteaga tumau he manako mooli ha tautolu ke fakatapu e higoa a Iehova mo e ke eke haana a finagalo.—Mata. 26:39.
3. He puhala fe he fakaalofa ha tautolu ma Iehova kua lagomatai a tautolu ke kautū ke he tau mena vihi?
3 Omoomoi he Fakaalofa a Tautolu ke Kautū ke he Tau Mena Vihi: Ko e fakaalofa ma Iehova kua kautū ke he tau mena vihi oti kana. (1 Kori. 13:4, 7) Ne fehagai a Iesu mo e tau tutūaga loga he moui ka fakalolelole a ia mai he taute e fekafekauaga haana. Pete he fehagai a ia mo e tau mena vihi, ko e fakaalofa hokulo mo e manako haana ke taute e fingalo a Iehova kua lagomatai a ia ke kautū. (Mare. 3:21; 1 Pete. 2:18-23) Kua fehagai foki a tautolu mo e tau paleko loga, ti kua maeke he fakaalofa ha tautolu ma e Atua ke lagomatai a tautolu ke kautū. He pipiki mau ke he fakafifitakiaga ne fakatoka e Keriso, kua liga logona e tautolu e mauokafua mo e nakai fakalolelole he taute e fekafekauaga ha tautolu. Pete kua liga lauia a tautolu he totokoaga he magafaoa, tino gagao, fuakau, po ke fakateaga he tau tagata tokologa kua nakai taofi a tautolu he fakakite e fakaalofa ha tautolu ma Iehova he taute e fekafekauaga ha tautolu ke lauia mitaki ke he mena kua maeke.
4. Ko e heigoa e lilifu ne moua e tautolu he fakaalofa ha tautolu ma Iehova?
4 Kua malolō lahi e fakaalofa, ti kua fakamonuina a tautolu aki e lotomatala ke fakakite e fakaalofa katoatoa ha tautolu ma e Atua he fekafekauaga ha tautolu. (1 Kori. 13:13) Hane hohoko atu mafiti a tautolu ke he magaaho ka fakatapu tukulagi e higoa a Iehova, kia ‘fakatupu lahi ue atu ha tautolu a fakaalofa.’—Filipi 1:9; Mata. 22:36-38.