Fakaheke a Iehova he Tau Aho Takitaha
1. Ko e heigoa kua omoomoi e tau fekafekau he Atua ke taute, mo e ko e ha?
1 Ne fakakite he Patuiki ko Tavita e mauokafua haana ke fakaheke a Iehova he “tau aho oti kana,” ke hoko atu ke he tukulagi tukumuitea. (Sala. 145:2, 7, 21) Fai kakano mitaki foki a tautolu ke fakaheke a Iehova he tau aho takitaha.—Sala. 37:10; 145:14, 18; 2 Pete. 3:13.
2. Maeke fēfē he tau magafaoa ke fakaheke a Iehova he tau aho takitaha?
2 He Tau Kaina ha Tautolu: Ha ha ia tautolu e tau tohi atihake ne lolomi ma e tau fakatutalaaga fakaagaaga kakano lahi ka taute e lauga ma e aho, he olioli e Tapuakiaga he Magafaoa, mo e ka tauteute ma e tau feleveiaaga he fakapotopotoaga. Loga e magafaoa ne fakamahani ke lagataha e kai auloa he tau aho takitaha. Kua fakaatā he mena ia ke moua e fakatutalaaga ne nakai fakatepetepe, totoka mitaki mo e foaki e tau magaaho ke fakaheke a Iehova. Ko e tau fakatutalaaga nakai tauteute pauaki pihia ne fakatū he tau matua kua eke mo lagomatai aoga he feaki hake e tau fanau ha lautolu ke he puhala he “tau kupu akonaki mo e tau kupu fakamafana he Iki [Iehova].”—Efeso 6:4; Teu. 6:5-7.
3. Ko e heigoa e tau magaaho mitaki kua moua e tautolu ka fakalataha mo e tau matakainaga ha tautolu?
3 Fakalataha mo e Tau Matakainaga ha Tautolu: Ka haia he gahua he fonua po ke he tau feleveiaaga he fakapotopotoaga, kua ha ha ia tautolu e tau magaaho mitaki lahi mahaki ke fakaheke a Iehova fakalataha mo e tau matakainaga talitonu ha tautolu. (Fakatai 15:30; Filipi 4:8; Hepe. 13:15) Ha kua fakaalofa a tautolu oti ki a Iehova, kua lata ke mukamuka ke putoia e tau talahauaga mooli mai he loto fakaaue ke he mitaki lahi a Iehova ka fetutalaaki.—Sala. 106:1.
4. Ko e heigoa e tau tuaga kua maeke ia koe ke fakaheke a Iehova?
4 Ka Tutala ke he Tau Tagata Nakai Talitonu: Pete kua liga nakai fakaatā he tau tuaga a tautolu ke fakalataha ke he gahua he fonua he tau aho takitaha, ko e tutala fakakū foki ke he tau tagata gahua, tau kapitiga aoga, mo e falu ne viko takai ia tautolu, hagaao ki a Iehova mo e haana tau finagalo ka maeke ke fakatupu e amaamanakiaga he tau tagata loto fakamooli. (Sala. 27:14; 1 Pete. 3:15) He fina atu he vakalele, ne maeke e matakainaga fifine ke fakamatala ke he taha fifine ne o fakalataha, ha kua mafanatia mo e atihake lahi ke he mena ne logona e ia ti age ai e matahigoa he kaina mo e numera telefoni haana ke he matakainaga fifine ke maeke ia laua ke matutaki. He matematekelea e lalolagi he lahi mahaki e tau tuaga lekua mo e kelea muitui, ne matutaki e tau tagata ha Iehova ke “talahau mai e tala mitaki” ki a lautolu ne fiafia ke fanogonogo. Kua foaki he mena nei e amaamanakiaga ke he falu mo e taute a lautolu ke fakaheke ki a Iehova.—Isaia 52:7; Roma 15:11.
5. Ko e ha kua manako a tautolu ke fakaheke a Iehova, mo e ko e heigoa ka moua mai he mena nei?
5 Kua fakafiafia mooli he mena ia a Iehova ke logona e tau fekafekau haana hane fakaheke ki a Ia he tau aho takitaha! Ke he tau tufugatia kitia mata ha Iehova ne viko takai ia tautolu, kua maeke foki ia tautolu ke fakailoa e tau fakahekeaga haana he tau aho takitaha he ha tautolu a tau kaina, he fakapotopotoaga, mo e ka tutala mo e falu ne nakaila eke ia mo tau matakainaga tapuaki ha Iehova.—Sala. 19:1-4.