Lahi Nakai e Mena Haaku Hane Taute?
1. Ko e heigoa e tau tupetupe ka lauia e Kerisiano fakamooli?
1 Kua hūhū nakai e koe ki a koe e hūhū ia? Liga kua nakai lahi e gahua haau mogonei ke he fonua ha ko e fuakau, gagao, po ke lahi e matagahua fakamagafaoa, ti fakatupu ki a koe e fakaloleloleaga. Ne tohi he taha matakainaga fifine ne tolu e tama, kua kelea e loto haana ha kua tote e gahua he fonua ka e lahi e magaaho mo e malolō ne foaki ke leveki e magafaoa haana. Ko e heigoa ka lagomatai a tautolu ke lagotatai e onoonoaga ke he tau mena ia?
2. Ko e heigoa e manako ha Iehova mai ia tautolu?
2 Mena ne Manako a Iehova Mai ia Tautolu: Kua manako mooli a tautolu oti ke lahi e mena ka taute ke he gahua he fonua. Ka e lahi e kehekehe he mena ka manako a tautolu ke taute mo e mena ka maeke mooli ia tautolu ke taute. Ha kua manako a tautolu ke lahi e mena ka taute to fakakite kua nakai fakateaga a tautolu. Kua lata ia tautolu ke manatu na iloa mitaki e Iehova e tau kūkū ha tautolu ti nakai peehi ke he mena ne nakai maeke mooli ia tautolu ke taute. (Sala. 103:13, 14) Ko e heigoa ne manako a ia mai ia tautolu? Manako a ia ki a tautolu ke fekafekau ki a ia mo e loto katoa he foaki katoatoa ki a ia.—Kolo. 3:23.
3. Maeke fēfē a tautolu ke filifilia e tau laliaga ha tautolu ke he gahua he fonua?
3 Ko e heigoa ka lagomatai a tautolu ke fifili e mena mooli ke lata mo tautolu? Maeke ia tautolu ke ole ki a Iehova ke lagomatai a tautolu ke kitia e mooli he tuaga ha tautolu. (Sala. 26:2) Ko e kapitiga Kerisiano mauokafua ne motua fakaagaaga kua iloa mitaki a tautolu ti nakai matakutaku ke tala mai ki a tautolu e lata ha tautolu ke holo ki mua, ko e puhala foki a ia ke lagomatai. (Fakatai 27:9) Manatu foki, ha kua hikihiki e tau tuaga, kua aoga ke filifilia tumau e tuaga ha tautolu.—Efeso 5:10.
4. Lata fēfē ia tautolu ke onoono ke he tau fakamanatu ne fakavē ke he Tohi Tapu hagaao ke he gahua he fonua?
4 Onoono Fēfē ke he Tau Fakamanatu: He poitufi, fa mahani e tau tagata kitekite ke tauhea e tau manatu fakamalolō. Ko e kakano haia ke lagomatai e tau tagata poitufi ke hoko ke he laini ka e nakai ke fakalolelole a lautolu. Pihia foki, ko e tau fakamalolōaga ne fakavē ke he Tohi Tapu mo e tau fakamanatu ne talahau he tau feleveiaaga mo e i loto he tau tohi ha tautolu ke ‘fakamatala atu e kupu, kia fakamalolo’ kua aoga ma tautolu ka e nakai kakano kua tote e lali ha tautolu. (2 Timo. 4:2) Maeke ia tautolu ke mauokafua ka lali tumau a tautolu ke foaki katoatoa, to manatu fiafia e Iehova ha tautolu a ‘fakaalofa mo e tau gahua.’—Hepe. 6:10.