Lagomatai ma e Tau Magafaoa
1. Aoga fēfē ke he tau magafaoa a Isaraela e Sapati he tau faahi tapu takitaha?
1 Ko e fakamanatuaga he Sapati ko e foakiaga fakaalofa mai ia Iehova ne aoga ke he tau magafaoa. Ne okioki e tau Isaraela mai he tau gahua fa mahani ha lautolu ti fai magaaho ke manamanatu ke he mitaki ha Iehova mo e fakafetuiaga ha lautolu mo ia. Maeke he tau matua ke fakaaoga e magaaho nei ke fakaako atu e Fakatufono ke he tau loto he tau fanau ha lautolu. (Teu. 6:6, 7) Ko e Sapati kua foaki e tau magaaho he tau faahi tapu takitaha ke he tau tagata ha Iehova ke kitekite fakahokulo ke he ha lautolu a tuaga fakaagaaga.
2. Ko e heigoa kua fakaako he Sapati ki a tautolu hagaao ki a Iehova?
2 Mooli, kua nakai liu a Iehova amanaki ke he tau magafaoa ke fakamanatu e Sapati. Pete ni, ko e fakatufono ia kua fakaako mai ki a tautolu e taha mena hagaao ke he Atua ha tautolu. Kua fiafia lahi mahaki tumau a ia ke hokulo e moui fakaagaaga he haana tau tagata. (Isaia 48:17, 18) Vahā nei, taha puhala kua fakakite mai e Iehova haana fakaalofa fiafia ko e afiafi he Tapuakiaga Magafaoa.
3. Ko e heigoa e kakano he afiafi Tapuakiaga Magafaoa?
3 Ko e Heigoa e Kakano he Afiafi Tapuakiaga Magafaoa? Ia Ianuari 2009, ko e Fakaakoaga Tohi he Fakapotopotoaga kua kamata fakahoko ai he afiafi ne taute e Aoga Fekafekau Fakateokarasi mo e Feleveiaaga Fekafekau. Taha kakano ke he hikiaga nei kua foaki ke he tau magafaoa e magaaho ke fakamalolō e tuaga fakaagaaga ha lautolu ka fakatoka pauaki e taha afiafi he vahā tapu ke lata mo e tapuakiaga magafaoa. Ko e tau magafaoa oti kua fakamafana ke tuku atu e fakaakoaga fakamagafaoa ke he po ne kua fakaaoga fakamua ma e fakaakoaga tohi, kaeke kua lata, mo e fakaaoga e magaaho nei ma e tau fakatutala mo e fakaako Tohi Tapu ne fakatotoka ke felauaki mo e tau manako he magafaoa.
4. Lata ni kia e magafaoa ke fakakaupa e fakatutalaaga ha lautolu ke he taha e tulā? Fakamaama.
4 Ke fakalataha ke he Fakaakoaga Tohi he Fakapotopotoaga, kua lata ia tautolu ke fai magaaho ke tauteute, o atu, mo e falu mena foki. Ke he tokologa ia tautolu, ko e fakalataha atu ke he tau feleveiaaga taha tulā pehēnei kua fakaaoga e laulahi he afiafi. He hikiaga ke he ha tautolu a fakaholoaga he feleveiaaga, kua ha ha ia tautolu e afiafi nei ke tapuaki ki a Iehova ko e magafaoa. Ko e mena ia, kua nakai lata ke fakakaupa ha tautolu a Tapuakiaga Magafaoa ke he taha e tulā. Ka e lata ke manamanatu ke he tau manako mo e kaupaaga he magafaoa ha tautolu ti fakatoka e magaaho ke lata ai.
5. Lata kia ke fakaaoga e magaaho katoa ke fakatutala auloa? Fakamaama.
5 Lata Kia ke Fakaaoga e Magaaho Katoa ke Fakatutala Auloa? Ka fakatutala auloa e tau hoa mau po ke tau magafaoa mo e tau fanau ke he tau mena faka-Tohi Tapu, kua featihake a lautolu. (Roma 1:12) Kua futiaki fakatata e magafaoa. Ko e mena ia, ko e tau fakatutalaaga ke he tau mena faka-Tohi Tapu kua lata ni ke eke mo matapatu he Tapuakiaga Magafaoa he afiafi. Pete ia, kua lata foki ke igatia e tagata he magafaoa ke fakaaoga taha magaaho ma e fakaako fakatagata. Ma e fakatai, ka oti e fakatutala auloa, maeke ke nonofo auloa e magafaoa ka e igatia ni ke matutaki mo e haana fakaakoaga, liga ke fakaoti haana tau tauteuteaga ke lata mo e tau feleveiaaga po ke totou e tau mekasini. Falu magafaoa kua fifili ke tamate e televisoni he afiafi katoa.
6. Liga taute fēfē e fakatutalaaga?
6 Liga Taute Fēfē e Fakatutalaaga? Ko e fakatokaaga nakai ni ko e tau hūhū mo e tali hokoia. Ke fakatoka e Tapuakiaga Magafaoa he afiafi ke alaala mo e fiafia, tokologa e tau magafaoa kua taute e fakaholoaga ke tuga e feleveiaaga ha tautolu he faahi tapu. Kua vehevehe e lautolu e tau fakatutalaaga ke he loga e vala ti taute ke he tau puhala kehekehe. Ma e fakatai, maeke ia lautolu ke totou auloa e Tohi Tapu, tauteute ke lata mo e taha vala he tau feleveiaaga, ti fakamahani ke lata mo e fekafekauaga. Foaki mai he lau 6 e falu puhala.
7. Ko e heigoa e tuaga kua lata he tau matua ke foli ki ai?
7 Ko e Heigoa e Tuaga kua Lata he Tau Matua ke Foli ki Ai? To mua e mitaki he fakaakoaga ke he magafaoa haau ka ha ha i ai e tuaga fakaalofa mo e totoka mitaki. Liga falu magaaho maeke ia koe ke fakaako i fafo kaeke kua mitaki e matagi. Atāina ke fakamaoki kaeke kua lata. Falu magafaoa ka oti e fakaholoaga ti kai mo e inu māmā. Ha kua kalo kehe e tau mamatua ke fakaaoga e Tapuakiaga Magafaoa he afiafi ke vale po ke akonaki, kua liga lata ke foaki falu magaaho ke fakatonu e falu puhala matakehe po ke lekua ne iloa e laua. Pete ia, liga mitaki ke tutala e tau mena fakatagata mo e tama ni he taha magaaho kehe he faahi tapu ke ua fakama a ia ki mua he haana lafu. Ko e afiafi he Tapuakiaga Magafaoa kua nakai lata ke mateafu mo e pāpā maō ka kua lata ke fakaata mai e fiafia he Atua ne tapuaki a tautolu ki ai.—1 Timo. 1:11.
8, 9. Ko e heigoa e tauteaga kua lata he tau ulu magafaoa?
8 Maeke Fēfē he Ulu Magafaoa ke Tauteute? Kua mua e mitaki ke he magafaoa kaeke kua tauteute tuai e ulu magafaoa ke lata mo e tau Tapuakiaga Magafaoa he afiafi ka fakatoka e mena ke fakatutala ki ai mo e puhala mitaki ke kitekite ki ai. (Fakatai 21:5) Mitaki e taane ke matutaki mo e haana hoana ke lata mo e mena nei. (Fakatai 15:22) Tau ulu magafaoa, ko e ha ne nakai hūhū atu ke he tau fanau he falu magaaho ma e tau manatu ha lautolu? Ka taute pihia e koe, to kitia mitaki e koe e tau mena uho ne fiafia mo e tupetupe a lautolu ki ai.
9 Ke he laulahi he tau faahi tapu nakai lata ke lahi mahaki e magaaho tauteute he ulu magafaoa. Ka e liga to fiafia e magafaoa ke he falu fakatokaaga pauaki he faahi tapu ti nakai lata e ulu magafaoa ke fai fakaholoaga foou he tau magaaho oti. Liga mitaki ki a ia ke tauteute ka oti e tau fakaakoaga takitaha ha kua foou agaia e tau manako fakaagaaga he magafaoa ke he haana loto. Falu ulu magafaoa kua tohi fakaku e fakaholoaga ti tau hake he taha mena ke mukamuka he magafaoa ke kitia, tuga e filisa. Kua maeke he mena nei ke tupu mai ai e amaamanakiaga fiafia mo e tuku e magaaho ke he magafaoa ke mautauteute kaeke kua lata.
10. Fakaaoga fēfē e lautolu kua nonofo takitokotaha e afiafi he Tapuakiaga Magafaoa?
10 Ka e kua Ka Tokotaha Ni Au he Magafaoa Haaku? Ko lautolu ne nonofo takitokotaha kua maeke ke fakaaoga e Tapuakiaga Magafaoa he afiafi mo fakaako fakatagata. Ko e fakavēaga mitaki ke he fakaholoaga fakaako fakatagata kua lata ke putoia ki ai e totou Tohi Tapu, tauteute ke lata mo e tau feleveiaaga mo e totou he Ko e Kolo Toko mo e Awake! Falu tagata fakailoa kua lafi ke he mena nei e matagahua fakaako fakatagata. Falu magaaho, liga manako a lautolu ke uiina taha tagata fakailoa po ke magafaoa ke matutaki auloa mo lautolu ke he tau fakatutalaaga faka-Tohi Tapu kua atihake.
11, 12. Ko e heigoa falu mena aoga he taute tumau e Tapuakiaga Magafaoa he afiafi?
11 Ko e Heigoa e Aoga ka Taute Tumau e Tapuakiaga Magafaoa he Afiafi? Ko lautolu kua fakalataha ke he tapuaki mooli mo e loto katoa kua futiaki fakatata lahi ki a Iehova. Lafi ki ai, ko e tau magafaoa kua tapuaki auloa kua fakamalolō e matutakiaga fakamagafaoa. Tohi he taha hoa-mau hagaao ke he tau monuina ne moua e laua: “Ha ko e tau paionia nakai fai fanau a maua, kua amaamanaki lahi a maua ke he po Tapuakiaga Magafaoa. Logona e maua e fetataaki lahi ha maua ti pihia foki ke he ha tautolu a Matua he lagi. Ka aala hake a maua he aho kua fakatoka ke lata mo e fakaako ha maua, pehē a maua ko e taha ke he taha: ‘Tali manatu la ko e po ha a magaaho? Ko e po Tapuakiaga Magafaoa!’”
12 Ko e fakaholoaga ke he afiafi ma e tapuakiaga magafaoa kua lagomatai foki e tau magafaoa lavelave. Tohia he taha matua fifine nofo tokotaha, ne feaki ua e tama taane mo e ko e paionia tumau: “He tau magaaho kua mole, ko e fakaako fakamagafaoa ha mautolu kua nakai holo mitaki. Kua taute ni he falu magaaho ti ai taute tumau ha kua fa lolelole au. Ai iloa e au e puhala ke fakatokatoka aki. Ti kua tohi atu au ke fakaaue fakalahi atu ke he afiafi he Tapuakiaga Magafaoa. Kua kautū a mautolu he taute tumau e fakaako fakamagafaoa mo e logona ai e aoga.”
13. Ko e heigoa ka fakakite e lahi he aoga ke he magafaoa haau mai he fakaholoaga nei?
13 Ke tuga e Sapati, ko e afiafi Tapuakiaga Magafaoa ko e mena fakaalofa mai he ha tautolu a Matua he lagi ke lagomatai e tau magafaoa. (Iako. 1:17) Ko e puhala ne fakagahuahua ai he tau Isaraela e Sapati kua fakakite mai e aoga fakaagaaga ki a lautolu. Pihia foki, ko e puhala ka fakaaoga e tautolu e afiafi kua foaki ki a tautolu ma e tapuaki fakamagafaoa kua maeke ai ke kitia e lahi he aoga ke he ha tautolu a magafaoa. (2 Kori. 9:6; Kala. 6:7, 8; Kolo. 3:23, 24) Ka fakaaoga fakamitaki e fakaholoaga nei to logona foki he magafaoa haau tuga e logonaaga he salamo: “Ka ko au, ko e mitaki kia au ke fakatata ke he Atua; kua eke e au e Iki ko Iehova mo kolo haku.”—Sala. 73:28.
[Blurb he lau 5]
Ko e afiafi he Tapuakiaga Magafaoa kua nakai lata ke mateafu mo e pāpā maō ka kua lata ke fakaata mai e fiafia he Atua ne tapuaki a tautolu ki ai
[Puha he lau 6]
LEVEKI
Falu Puhala ma e Afiafi Tapuakiaga Magafaoa
Tohi Tapu:
• Totou auloa e taha vala he totouaga Tohi Tapu fakafaahi tapu. Ka lata ke taute pihia, maeke e taha tagata ke totou e tala, ka e totou he falu e tau kupu he tau tagata kehekehe he tala.
• Liu fakataitai e taha vala he totouaga Tohi Tapu.
• Kotofa e magafaoa ke igatia mo e totou tuai e tau veveheaga he Tohi Tapu mo e fakamau hifo taha po ke ua e hūhū haana hagaao ke he vala tala. Ti kumikumi auloa ke he tau hūhū oti ha lautolu.
• He tau faahi tapu takitaha, tauteute e laupepa ne tohi ai e tau kupu Tohi Tapu ti lali ke ako manatu mo e fakamaama ai. Tohi ke loga e tau laupepa, ti liu kitekite ki ai he tau faahi tapu takitaha ke kitia ko e fiha e kupu Tohi Tapu haau ne manatu.
• Fanogonogo ke he leo tapaki he totou Tohi Tapu mo e muitua ki ai he Tohi Tapu.
Tau Feleveiaaga:
• Tauteute auloa ma e taha vala he tau feleveiaaga.
• Fakaako e tau lologo he Kautu ne fakatoka ma e faahi tapu i mua.
• Ka fai lauga taha tagata he Aoga Fekafekau Fakateokarasi po ke fai fakatātā he Feleveiaaga Fekafekau, fakatutala ke he tau puhala ke fakataitai aki, po ke fakamahani ai i mua he magafaoa.
Tau Manako he Magafaoa:
• Kitekite ke he vala tala mai he tohi Young People Ask po ke Learn From the Great Teacher.
• Taute taha fakamahaniaga ke lata mo e taha tuaga ka liga tupu he aoga.
• Taute taha fakamahaniaga ke fehikitaki e tau vala he tau matua mo e tau fanau. Kumikumi he tau fanau e mataulu tala ti fakamaama ke he tau matua.
Fekafekauaga:
• Tauteute e tau fakamahaniaga ke lata mo e tau puhala foaki he matahiku faahi tapu.
• Fakatutala ke he tau foliaga kua maeke he magafaoa ke fakatoka, ke fakalaulahi auloa e fakalatahaaga ke he fekafekauaga he magahala he Fakamanatuaga po ke tau magaaho okioki.
• Fakaatā falu minuti gahoa ke igatia e tagata he magafaoa mo e kumikumi e puhala ke tali e tau hūhū kehekehe ka liga moua mai he fekafekauaga, ti fakamahani ki ai.
Falu Puhala Foki:
• Totou auloa e taha vala tala mai he tau mekasini foou.
• Kia igatia e tagata he magafaoa mo e totou tuai taha vala tala ne fiafia lahi a ia ki ai mai he tau mekasini foou, ti fakaatā a ia ke tutala fakakū hagaao ke he mena ia.
• Falu magaaho, uiina taha tagata fakailoa po ke tau hoa mau ke fakalataha mo mutolu he Tapuakiaga Magafaoa he afiafi ti liga hūhū tala ki a lautolu.
• Kitekite ti fakatutala ke he taha he tau vitiō ha tautolu.
• Fakatutala auloa ke he “Hūhū he Tau Fuata” po ke “Liu Kitekite he Magafaoa” mai he Awake!
• Fakatutala auloa ke he “Fakaako e Tau Tama ha Mutolu” po ke “Ma e Tau Fuata Ikiiki” mai he Ko e Kolo Toko.
• Totou ti fakatutala ke he taha vala he Yearbook foou po ke tohi foou ne moua mai he fonoaga fakahiku he faahimotu.
• Ka mole e o atu ke he fonoaga po ke toloaga, liu fakamanatu e tau uho manatu.
• Onoono ke he tau tufugatia ha Iehova, ti fakatutala ke he mena kua fakaako mai ki a tautolu hagaao ki a Iehova.
• Gahua auloa ke he matagahua tuga e taha mena fakatātā, ko e mepe, po ke tohi fakamau.